వాట్సాప్ యూజర్లకు బిగ్ అలర్ట్: ఫేక్ ఇన్‌వాయిస్ ఫైల్స్‌తో డేటా చోరీ.. మీ అకౌంట్ సురక్షితమేనా?

వాట్సాప్‌ను హ్యాక్ చేసేలా మాల్‌వేర్‌తో కూడిన ఫేక్ "ఇన్‌వాయిస్" ఫైళ్లపై కేంద్ర సైబర్ సెక్యూరిటీ సంస్థ CERT-In సెప్టెంబర్ 14న హెచ్చరికలు జారీ చేసింది. ఈ సైబర్ దాడులు ఎక్కువగా వాట్సాప్ వెబ్ లేదా డెస్క్‌టాప్ వర్షన్‌ల ద్వారానే మొదలవుతున్నట్లు గుర్తించారు. కేటుగాళ్లు వీటిద్వారా మీ చాట్‌లను చదవడమే కాకుండా, పేమెంట్ లింకులు పంపి UPI ఫ్రాడ్‌లకు తెగబడే ప్రమాదముంది. ఒకవేళ మీరు కూడా ఇటీవల ఏవైనా అనుమానాస్పద ఇన్‌వాయిస్ ఫైళ్లను క్లిక్ చేసి ఉంటే మాత్రం తక్షణమే అప్రమత్తమవ్వాలి. కొన్ని నిమిషాల్లోనే మీ ఫోన్‌ను సురక్షితంగా మార్చుకోవడంతో పాటు పోయిన చాట్‌లను కూడా రికవర్ చేసుకోవచ్చు.

తెలియని నంబర్లు లేదా ఈమెయిళ్ల నుంచి కొనుగోలు ఇన్‌వాయిస్‌లు, రీఫండ్ వివరాల పేరుతో ఈ ఫైళ్లు వస్తుంటాయి. మీరు కంప్యూటర్‌లో వీటిని ఓపెన్ చేస్తే.. వాట్సాప్ వెబ్ టోకెన్‌లను దొంగిలించేలా బ్యాక్‌గ్రౌండ్‌లో హిడెన్ స్క్రిప్ట్‌లు రన్ అవుతాయి. అదే ఫోన్లలో అయితే థర్డ్ పార్టీ యాప్‌లు ఇన్‌స్టాల్ చేసుకునేలా లేదా ప్రమాదకర పర్మిషన్లు ఇచ్చేలా మిమ్మల్ని బురిడీ కొట్టిస్తాయి. మీ వాట్సాప్ ఖాతా అకస్మాత్తుగా లాగౌట్ కావడం, కొత్తగా ‘Linked devices’ కనిపించడం, మీరు పంపని మెసేజ్‌లు వేరేవారికి వెళ్లడం, బ్యాటరీ వేగంగా డ్రైన్ అవ్వడం వంటివి కనిపిస్తే మీ వాట్సాప్ హ్యాక్ అయిందని గుర్తించాలి.

వెంటనే చేయాల్సిన పనులు: మీ ఫోన్, వాట్సాప్ వెబ్‌లను రక్షించుకోండిలా..

ముందుగా మీ ఫోన్‌లో ఇంటర్నెట్ కనెక్షన్‌ను బంద్ చేసి, ఏరోప్లేన్ మోడ్ ఆన్ చేయండి. ఆ తర్వాత వాట్సాప్ ఓపెన్ చేసి Settings > Linked devices లోకి వెళ్లి ‘Log out from all computers’ పై ట్యాప్ చేయండి. ఇటీవల ఇన్‌స్టాల్ అయిన తెలియని యాప్‌లను డిలీట్ చేయండి. ‘Google Play Protect’ స్కానింగ్ రన్ చేయండి. ఐఫోన్ వినియోగదారులు ఏవైనా అనుమానాస్పద కాన్ఫిగరేషన్ ప్రొఫైల్స్ ఉంటే వాటిని వెంటనే తొలగించాలి. ఇప్పుడు ఫోన్‌ను ఒకసారి రీస్టార్ట్ చేసి.. మీ గూగుల్ లేదా ఆపిల్ పాస్‌వర్డ్‌లను మార్చండి. యాప్‌లతో పాటు సిమ్‌కి కూడా బయోమెట్రిక్ లాక్ సెట్ చేసుకోండి.

చాట్‌లను రికవర్ చేయండి: గూగుల్ డ్రైవ్, ఐక్లౌడ్ బ్యాకప్ రీస్టోర్

వాట్సాప్ చాట్‌లను రికవర్ చేయడం కేవలం యాప్ సెటప్ చేసే సమయంలో మాత్రమే సాధ్యమవుతుంది. కాబట్టి ఈ స్టెప్‌ను అస్సలు స్కిప్ చేయకండి. ఆండ్రాయిడ్ యూజర్లు ముందుగా వాట్సాప్‌ను అన్‌ఇన్‌స్టాల్ చేసి, మళ్లీ ఇన్‌స్టాల్ చేసుకోండి. ఫోన్ నంబర్ వెరిఫికేషన్ పూర్తయ్యాక, మీ పాత గూగుల్ అకౌంట్‌తో 'Restore from Google Drive' ఆప్షన్‌ను ఎంచుకోండి. ఐఫోన్ వినియోగదారులు 'Restore from iCloud' ఆప్షన్ ఎంచుకోవాలి. ఒకవేళ ఎండ్-టు-ఎండ్ ఎన్‌క్రిప్టెడ్ బ్యాకప్ ఆన్‌లో ఉంటే.. మీ పాస్‌వర్డ్ లేదా 64-డిజిట్ కీ ని ఎంటర్ చేయాల్సి ఉంటుంది. అలా కాకుండా చాట్‌లు రీస్టోర్ చేయకుండానే వాట్సాప్ ఓపెన్ చేస్తే.. పాత చాట్‌లన్నీ పోయి కొత్తగా ఖాళీ బ్యాకప్ క్రియేట్ అవుతుంది.

ఎన్‌క్రిప్టెడ్ బ్యాకప్, టు-స్టెప్ వెరిఫికేషన్ ఆన్ చేసుకోండి

భద్రత కోసం వాట్సాప్ Settings > Chats > Chat backup లోకి వెళ్లి 'End-to-End Encrypted Backup' ఆన్ చేసి, బలమైన పాస్‌వర్డ్‌ను క్రియేట్ చేయండి. ఆ తర్వాత Account > Two-step verification కి వెళ్లి, 6 అంకెల పిన్ (PIN), రికవరీ ఈమెయిల్‌ను సెట్ చేసుకోండి. నెలకు ఒకసారైనా ‘Linked devices’ చెక్ చేసుకుంటూ, తెలియని సెషన్లు ఉంటే వెంటనే లాగౌట్ అవ్వండి. అలాగే తెలియని వ్యక్తుల నుంచి వచ్చే ప్రమాదకర ఫైళ్లు ఆటోమేటిక్‌గా డౌన్‌లోడ్ కాకుండా ఉండటానికి ‘మల్టీమీడియా ఆటో-డౌన్‌లోడ్’ ఆప్షన్‌ను డిసేబుల్ చేసుకోండి.

యూపీఐ సెక్యూరిటీ: యూపీఐ పిన్ మార్చండి, 1930 టోల్ ఫ్రీ నంబర్‌కు ఫిర్యాదు చేయండి

మీ బ్యాంకింగ్ యాప్ ద్వారా తక్షణమే మీ UPI PIN ను మార్చుకోండి. మీ బ్యాంక్ మెసేజ్‌లు, స్టేట్‌మెంట్‌లను ఒకసారి చెక్ చేసి, తెలియని డెబిట్‌లు లేదా మర్చంట్ పేర్లు ఉన్నాయేమో పరిశీలించండి. ఏమైనా అనుమానాస్పద లావాదేవీలు కనిపిస్తే వెంటనే బ్యాంక్‌కు సమాచారం ఇచ్చి UPI సేవలను నిలిపివేయండి. ఒకవేళ డబ్బులు పోగొట్టుకుంటే ఆలస్యం చేయకుండా 1930 హెల్ప్‌లైన్ నంబర్‌కు కాల్ చేయండి లేదా నేషనల్ సైబర్ క్రైమ్ రిపోర్టింగ్ పోర్టల్‌లో ఫిర్యాదు నమోదు చేయండి. ఫోన్ డేటా బ్యాకప్ తీసుకున్న తర్వాత, వైరస్‌లను పూర్తిగా వదిలించుకోవడానికి 'ఫ్యాక్టరీ రీసెట్' చేయడం మంచిది. మీరు వేగంగా స్పందిస్తేనే ఆస్తి నష్టాన్ని నివారించవచ్చు.