WhatsApp డెస్క్‌టాప్ యాప్ అస్సలు సురక్షితం కాదట.. ప్రభుత్వం హెచ్చరిక.. ఇప్పుడే తెలుసుకోండి..!!

WhatsApp security alert : వాట్సాప్ వాడేవాళ్లకు భారత ప్రభుత్వం ఒక ముఖ్యమైన హెచ్చరిక జారీ చేసింది. ముఖ్యంగా, విండోస్ కంప్యూటర్‌లో వాట్సాప్ డెస్క్‌టాప్ యాప్ వాడుతున్నట్లయితే, మీరు వెంటనే అప్రమత్తం అవ్వాలి. ఎందుకంటే, మీ సిస్టమ్‌కు ప్రమాదం పొంచి ఉందని భారత ప్రభుత్వానికి చెందిన 'ఇండియన్ కంప్యూటర్ ఎమర్జెన్సీ రెస్పాన్స్ టీమ్' (CERT-In) హెచ్చరిస్తోంది.

ఇది చాలా తీవ్రమైన సమస్య అని తెలిపింది. వాట్సాప్ డెస్క్‌టాప్ పాత వెర్షన్లలో ఉన్న ఒక భద్రతా లోపం వల్ల హ్యాకర్లు మీ కంప్యూటర్‌ను తమ ఆధీనంలోకి తీసుకునే ప్రమాదం ఉంది. ఎవరికి ప్రమాదం, ఎందుకు ప్రమాదమో తెలుసుకుంటే.. విండోస్ కంప్యూటర్‌లో వాట్సాప్ డెస్క్‌టాప్ వెర్షన్ 2.2450.6 కన్నా పాతది వాడుతున్నట్లయితే, మీరు రిస్క్‌లో ఉన్నట్టే.

* ఆ పొరపాటు వల్లే ఈ సమస్య
CERT-In ప్రకారం, ఫైల్ రకం (MIME type), ఫైల్ పేరుకు (File extension) సంబంధించిన ఒక చిన్న సాంకేతిక పొరపాటు వల్ల ఈ సమస్య తలెత్తింది. దీనివల్ల వాట్సాప్, దానికి వచ్చే ఫైల్స్‌ను సురక్షితంగా హ్యాండిల్ చేయలేకపోతోంది. ఎవరైనా హ్యాకర్ ఒక మోసపూరిత ఫైల్ పంపి, దాన్ని మీ డెస్క్‌టాప్ యాప్‌లో ఓపెన్ చేస్తే చాలు.

వాళ్లు మీ కంప్యూటర్‌లో ప్రమాదకరమైన కోడ్‌ను రన్ చేయగలరు లేదా మిమ్మల్ని నమ్మించి మోసం చేయగలరు (స్పూఫింగ్). దీని వల్ల మీ విలువైన సమాచారం దొంగిలించబడవచ్చు లేదా మీ కంప్యూటర్ మొత్తం వారి చేతుల్లోకి వెళ్లిపోవచ్చు. దీని ఫలితంగా మీరు చాలా ఇబ్బందులు, నష్టాలు ఎదుర్కోవాల్సి వస్తుంది.

* హెచ్చరికను పట్టించుకోకపోతే ఏమవుతుంది..
ఈ సమస్య (దీనికి CVE-2025-30401 అనే కోడ్ పేరు పెట్టారు) చాలా ప్రమాదకరమైనది. ఎందుకంటే హ్యాకర్లు మీ కంప్యూటర్ దగ్గరకు భౌతికంగా రావాల్సిన అవసరం లేదు. వాట్సాప్ ద్వారా ఒక ప్రత్యేకమైన ఫైల్ పంపిస్తే చాలు. మీరు దానిని డెస్క్‌టాప్ యాప్‌లో తెరిచిన వెంటనే, మీకు తెలియకుండానే మీ కంప్యూటర్‌ను వారు హైజాక్ చేయగలరు.

మీ వ్యక్తిగత లేదా ఆఫీస్ ఫైల్స్, ఫొటోలు, ఇతర సమాచారం మొత్తం వారి చేతికి చిక్కవచ్చు, దాన్ని వారు దొంగిలించవచ్చు లేదా మార్చేయవచ్చు. భారతదేశంలో 40 కోట్లకు పైగా వాట్సాప్ యూజర్లు ఉన్నందున, ఈ లోపాన్ని సరిచేయకపోతే జరిగే నష్టం చాలా పెద్దదిగా ఉంటుంది.

* ప్రభుత్వం ఇప్పుడు ఏం చేయమంటోంది..
విండోస్‌లో వాట్సాప్ డెస్క్‌టాప్ వాడే ప్రతి ఒక్కరూ వెంటనే తమ యాప్‌ను అప్‌డేట్ చేసుకోవాలని ప్రభుత్వం గట్టిగా సూచిస్తోంది. అప్‌డేట్ చేయడానికి, మీ కంప్యూటర్‌లోని 'మైక్రోసాఫ్ట్ స్టోర్' (Microsoft Store) ఓపెన్ చేసి, 'వాట్సాప్ మెసెంజర్' (WhatsApp Messenger) అని వెతికి, 'అప్‌డేట్' (Update) బటన్ నొక్కాలి.

* సురక్షితంగా ఉండటం ఎలా..
వాట్సాప్ ఇప్పటికే ఈ సమస్యను పరిష్కరించి, కొత్త వెర్షన్‌ను విడుదల చేసింది. దీనికి సంబంధించిన అధికారిక సమాచారాన్ని వాట్సాప్ తమ వెబ్‌సైట్‌ (https://www.whatsapp.com/security/advisories/2025) లో కూడా పెట్టింది. యాప్‌ను అప్‌డేట్ చేయడంతో పాటు, తెలియని వ్యక్తులు, తెలిసిన వారి నుంచి అయినా సరే, అనుమానాస్పదంగా అనిపించే ఫైల్స్‌ను అస్సలు ఓపెన్ చేయవద్దు.

ఎప్పటికప్పుడు మీ సాఫ్ట్‌వేర్‌లకు వచ్చే కొత్త అప్‌డేట్‌ల పట్ల అప్రమత్తంగా ఉండాలి, మంచి సైబర్ భద్రతా అలవాట్లను పాటించాలి. సాఫ్ట్‌వేర్‌ను తాజాగా ఉంచుకోవడం, అనుమానాస్పద ఫైల్స్ విషయంలో జాగ్రత్తగా ఉండటం ద్వారా ఇలాంటి దాడుల నుండి మీ డేటాను, మీ డివైస్‌లను కాపాడుకోవచ్చు.

వాట్సాప్ లాంటి మనం రోజూ నమ్మకంగా వాడే యాప్స్‌ను కూడా ఎప్పటికప్పుడు అప్‌డేట్ చేయకపోతే వాటిలో కూడా తెలియని ప్రమాదాలు దాగి ఉండవచ్చు అని ఈ హెచ్చరిక చెప్పకనే చెబుతోంది. కాబట్టి, ఆలస్యం చేయకుండా ఇప్పుడే మీ వాట్సాప్ డెస్క్‌టాప్ యాప్‌ను అప్‌డేట్ చేసి, మీ సిస్టమ్‌ను సురక్షితంగా ఉంచుకోండి.