ఇన్‌స్టాగ్రామ్ యూజర్లకు గుడ్‌న్యూస్.. రీల్స్‌కు సపరేట్ యాప్.. టిక్‌టాక్‌కు షాక్?

Instagram: ఇన్‌స్టాగ్రామ్ డెవలపర్లు రీల్స్ వీడియోల కోసం ఒక కొత్త యాప్‌ను తీసుకురావాలని ఆలోచిస్తున్నారు. రీల్స్ అంటే టిక్‌టాక్ లాంటి చిన్న వీడియోలు చేసుకునే ఫీచర్. ఇప్పుడు టిక్‌టాక్‌కు అమెరికాలో కష్టాలు రావడంతో, ఇన్‌స్టాగ్రామ్ దీన్నే అదునుగా భావించి పాపులర్ అవ్వాలని చూస్తోంది. ఇటీవలే అమెరికా ప్రభుత్వం టిక్‌టాక్‌ను బ్యాన్ కూడా చేసింది, కానీ మళ్లీ 12 గంటల్లోనే ఎత్తివేశారు. కానీ కొత్త రూల్స్ పాటించడానికి 75 రోజులు గడువు ఇచ్చారట.

ఇలా టిక్‌టాక్ భవిష్యత్తు అయోమయంలో పడిపోయింది. టిక్‌టాక్ స్టార్లు చాలా ఆందోళన పడుతున్నారు. ఈ టైమ్‌లో రీల్స్‌కు సపరేట్ యాప్ తెస్తే, యూజర్లను లాగేసుకోవచ్చని ఇన్‌స్టాగ్రామ్ ప్లాన్ చేస్తోంది. అయితే ఇది ఇంకా ఆలోచనల్లోనే ఉంది, కచ్చితంగా యాప్ వస్తుందా రాదా అని చెప్పలేం.

* రీల్స్ యాప్ కోసం ఇన్‌స్టాగ్రామ్ ప్లాన్

ఇన్‌స్టాగ్రామ్ హెడ్ ఆడమ్ మోస్సేరి తన ఉద్యోగులతో రీల్స్ కోసం వేరే యాప్ ఆలోచన ఉందని చెప్పారట. 'ది ఇన్ఫర్మేషన్’ అనే వెబ్‌సైట్ ఈ విషయం రాసింది. అయితే రీల్స్ యాప్ వస్తే, ఇప్పుడున్న ఇన్‌స్టాగ్రామ్ యాప్‌లో రీల్స్ ఫీచర్ ఉంటుందా లేదా పూర్తిగా కొత్త యాప్‌కే మారుస్తారా అనేది ఇంకా తెలియదు.

సపరేట్ యాప్ వస్తే మాత్రం, చాలా మంది కొత్త యూజర్లు ఇన్‌స్టాగ్రామ్‌కు వస్తారని అనుకుంటున్నారు, ముఖ్యంగా టిక్‌టాక్ మీద నమ్మకం పోయినవాళ్లు జంప్ అవుతారు. ఇన్‌స్టాగ్రామ్ ఇప్పుడు రీల్స్‌పైనే ఎక్కువ ఫోకస్ పెట్టింది. చిన్న వీడియోలకే ఎక్కువ ఇంపార్టెన్స్ ఇస్తోంది. అందుకే రీల్స్ వీడియోలు చేయడానికి 'ఎడిట్స్’ అనే కొత్త యాప్‌ను కూడా తీసుకొచ్చింది.

* ఎడిట్స్

ఇది టిక్‌టాక్ కంపెనీ బైట్‌డాన్స్ చేసిన 'క్యాప్‌కట్’ అనే వీడియో ఎడిటింగ్ యాప్‌కు పోటీ. ఈ కొత్త టూల్స్‌తో రీల్స్ యూజర్లకు మంచి ఎక్స్‌పీరియన్స్ ఇవ్వాలని, టిక్‌టాక్‌ను డామినేట్ చేయాలని ఇన్‌స్టాగ్రామ్ చూస్తోంది. టిక్ టాక్ ని వెనక్కి నెట్టడం ఇన్‌స్టా మాతృ సంస్థ మెటాకు అతిపెద్ద విజయం అవుతుంది.

* రీల్స్‌లో తప్పుడు వీడియోలపై కంప్లైంట్స్

ఇదిలా ఉండగా, రీల్స్‌లో కొందరు యూజర్లు దారుణమైన, అసభ్యకరమైన వీడియోలు చూపిస్తున్నారని కంప్లైంట్ చేస్తున్నారు. చాలా హింస, పోర్న్ వీడియోలు వాళ్ల ఫీడ్‌లో కనిపిస్తున్నాయట. వాళ్లు అలాంటి వీడియోలు చూడకపోయినా, ఇష్టం లేదని చెప్పినా కూడా వస్తున్నాయట.

'నాట్ ఇంట్రెస్టెడ్’ అని సెలెక్ట్ చేసినా కూడా ఈ వీడియోలు ఆగడం లేదని కొందరు యూజర్లు అంటున్నారు. ఇన్‌స్టాగ్రామ్ కంపెనీ మెటా దీనిపై స్పందించింది. ఈ సమస్యను పరిష్కరించామని చెప్పింది. యాప్ అల్గారిథమ్‌ను రీసెట్ చేసుకునే ఆప్షన్ కూడా ఇచ్చారట. కానీ అందరికీ ఈ సమస్య తగ్గిందా లేదా అనేది ఇంకా క్లారిటీ లేదు.

ఈ ఇన్సిడెంట్ వల్ల ఇన్‌స్టాగ్రామ్ కంటెంట్ కంట్రోల్ సరిగా లేదా, రికమెండేషన్ సిస్టమ్ ఎలా పనిచేస్తుందో అని చాలా మంది అనుకుంటున్నారు. ఇన్‌స్టాగ్రామ్ రీల్స్‌కు ఇంత ఇంపార్టెన్స్ ఇస్తూ, ఇప్పుడు సపరేట్ యాప్ కూడా తెస్తే, టిక్‌టాక్‌తో గట్టి పోటీ పడొచ్చు. కానీ యూజర్లు కంప్లైంట్ చేస్తున్న ఈ తప్పుడు వీడియోల సమస్యను కూడా సరిచేస్తేనే ఇన్‌స్టాగ్రామ్‌కు మంచి పేరు ఉంటుంది, యూజర్లు నమ్ముతారు.