మీ స్మార్ట్ టీవీ స్లో అయిపోయిందా.. దాని వేగాన్ని చిటికెలో పెంచే 6 సులభమైన చిట్కాలు!

Smart TV Slow Loading Fix: మన ఇళ్లలో స్మార్ట్ టీవీలు ఏళ్ల తరబడి ఉంటాయి, వాటిని స్మార్ట్‌ఫోన్లలా ఒకటి రెండేళ్లకే మార్చలేం. కానీ వాడే కొద్దీ అవి స్లో అయిపోతాయి. యాప్స్ లోడ్ అవ్వడానికి ఎక్కువ టైమ్ పడుతుంది, చిన్న చిన్న పనులు కూడా నెమ్మదిగా అనిపిస్తాయి. దీనికి కారణం హార్డ్‌వేర్ పాతబడటం, స్టోరేజ్ తక్కువగా ఉండటం. అయితే కొన్ని సింపుల్ ట్రిక్స్‌తో స్మార్ట్ టీవీని మళ్లీ ఫాస్ట్‌గా మార్చుకోవచ్చు. అవేవో చూద్దాం.

* క్లీనింగ్ యాప్స్‌తో చెత్తను వదిలించుకోండి..
ఫోన్‌లో జంక్ ఫైల్స్ ఎలా క్లీన్ చేస్తామో, స్మార్ట్ టీవీలకు కూడా అలాంటి క్లీనింగ్ అవసరం. మీ టీవీలోని ప్లే స్టోర్ నుంచి మంచి ఆప్టిమైజేషన్ (Optimization) యాప్స్ ఇన్‌స్టాల్ చేసుకోవచ్చు. ఈ యాప్స్ క్యాచీ (Cache) మెమరీని క్లియర్ చేస్తాయి, బ్యాక్‌గ్రౌండ్‌లో నడిచే అనవసరమైన ప్రాసెస్‌లను ఆపేస్తాయి, మెమరీని ఫ్రీ చేస్తాయి.

ఉదాహరణకు, 'ఫైల్ మేనేజర్' (File Manager) లాంటి యాప్స్.. పెద్ద సైజు ఫైల్స్‌ను తీసేయడానికి, ఎంత స్టోరేజ్ వాడారో చూపించడానికి బాగా హెల్ప్ అవుతాయి. ఇలాంటి చాలా యాప్స్ ఫ్రీగానే దొరుకుతాయి, కొన్నింటిలో అదనపు ఫీచర్ల కోసం డబ్బులు పెట్టాల్సి రావచ్చు. అప్పుడప్పుడు ఈ యాప్స్ వాడితే మీ టీవీ స్మూత్‌గా రన్ అవుతుంది.

* యానిమేషన్లను ఆపేసి స్పీడ్ పెంచండి!
యానిమేషన్లు (Animations) చూడటానికి బాగుంటాయి కానీ, అవి టీవీని స్లో చేస్తాయి, ముఖ్యంగా పాత టీవీల్లో ఈ సమస్య ఎక్కువ. వీటిని ఆపేస్తే స్పీడ్ పెరుగుతుంది. దీనికోసం, ముందుగా డెవలపర్ ఆప్షన్స్ (Developer Options) ఎనేబుల్ చేయాలి. సెట్టింగ్స్ > అబౌట్ (Settings > About)లోకి వెళ్లాలి.

ఆపై 'ఆండ్రాయిడ్ టీవీ ఓఎస్ బిల్డ్' (Android TV OS Build) అనే ఆప్షన్‌పై ఏడు సార్లు ట్యాప్ చేయండి. అప్పుడు డెవలపర్ ఆప్షన్స్ కనిపిస్తాయి. దానిలోకి వెళ్లి, విండో యానిమేషన్ స్కేల్ (Window animation scale), ట్రాన్సిషన్ యానిమేషన్ స్కేల్ (Transition animation scale), యానిమేటర్ డ్యూరేషన్ స్కేల్ (Animator duration scale) కనిపిస్తాయి.

ఈ మూడింటినీ ఆఫ్ చేసేయండి. ఇలా చేస్తే ప్రాసెసర్‌పై భారం తగ్గుతుంది, నెట్‌ఫ్లిక్స్ లాంటి యాప్స్ కూడా కొంచెం స్పీడ్‌గా ఓపెన్ అవుతాయి. దీనివల్ల మొత్తం టీవీ పనితీరు మెరుగుపడి, అప్లికేషన్ల మధ్య మారడం సులభతరం అవుతుంది, మీకు మంచి వీక్షణ అనుభవం లభిస్తుంది, చిరాకు తగ్గుతుంది.

* టీవీ సాఫ్ట్‌వేర్‌ను ఎప్పటికప్పుడు అప్‌డేట్ చేయండి!
పాత సాఫ్ట్‌వేర్ వాడటం వల్ల కూడా టీవీ లాగ్ అవ్వచ్చు, యాప్స్ మధ్యలో ఆగిపోవచ్చు (క్రాష్ అవ్వచ్చు). అందుకే స్మార్ట్ టీవీ కంపెనీలు పనితీరు మెరుగుదలలు (Performance fixes), కొత్త ఫీచర్లతో అప్‌డేట్స్ ఇస్తుంటాయి. అందుకే అప్‌డేట్స్ ఎప్పటికప్పుడు ఇన్‌స్టాల్ చేసుకోవాలి, అదెలాగంటే..

ముందుగా సెట్టింగ్స్ > డివైస్ ప్రిఫరెన్సెస్ > అబౌట్ > సాఫ్ట్‌వేర్ అప్‌డేట్ (Settings > Device Preferences > About > Software Update)లోకి వెళ్లి, మీ టీవీకి ఏదైనా కొత్త అప్‌డేట్ వచ్చిందేమో చెక్ చేసుకోండి. సాఫ్ట్‌వేర్‌ను అప్‌డేట్‌గా ఉంచుకుంటే టీవీ ఎఫీషియంట్‌గా పనిచేస్తుంది, యాప్స్ కూడా స్టెబుల్‌గా ఉంటాయి.

* మీ ఇంటర్నెట్ స్పీడ్, కనెక్షన్ సరిగ్గా ఉందో లేదో చూడండి..
ఇంటర్నెట్ స్లోగా ఉన్నా లేదా కనెక్షన్ సరిగా లేకపోయినా యాప్స్ లోడ్ అయ్యే వేగం తగ్గిపోతుంది. చాలా స్ట్రీమింగ్ యాప్స్ మంచి ఇంటర్నెట్‌పైనే ఆధారపడతాయి. మీ వై-ఫై (Wi-Fi) సిగ్నల్ వీక్‌గా ఉంటే, యాప్స్ ఫ్రీజ్ అవ్వచ్చు లేదా ఓపెన్ అవ్వడానికి చాలా టైమ్ పట్టొచ్చు.

మీ టీవీలోనే ఏదైనా స్పీడ్ టెస్ట్ యాప్‌తో మీ నెట్ స్పీడ్‌ను టెస్ట్ చేయండి. ఒకవేళ మీ టీవీలో ఈథర్‌నెట్ పోర్ట్ (LAN పోర్ట్) ఉంటే, వైర్ కనెక్షన్ (కేబుల్) వాడటం ఉత్తమం. దీనివల్ల స్పీడ్ ఎక్కువగా, కనెక్షన్ కూడా చాలా స్థిరంగా ఉంటుంది.

* వాడని యాప్స్‌ను తీసేసి స్టోరేజ్ ఖాళీ చేయండి..
స్మార్ట్ టీవీల్లో స్టోరేజ్, ర్యామ్ మెమరీ (RAM) చాలా తక్కువగా ఉంటాయి. మీరు వాడకపోయినా సరే, ఎక్కువ యాప్స్ ఇన్‌స్టాల్ చేసి ఉంటే సిస్టమ్ స్లో అవుతుంది. ఎందుకంటే కొన్ని యాప్స్ బ్యాక్‌గ్రౌండ్‌లో రన్ అవుతూనే ఉంటాయి. అందుకే, మీకు అవసరం లేని యాప్స్‌ను తీసెయ్యడం మంచిది.

సెట్టింగ్స్ > యాప్స్ > సీ ఆల్ యాప్స్ (Settings > Apps > See all apps) లోకి వెళ్లి, మీకు వద్దనుకున్న యాప్‌ను సెలెక్ట్ చేసి, అన్‌ఇన్‌స్టాల్ (Uninstall) చేసేయండి. ఇలా చేస్తే స్టోరేజ్ ఖాళీ అవ్వడమే కాకుండా, బ్యాక్‌గ్రౌండ్‌లో జరిగే అనవసర పనులు తగ్గుతాయి, టీవీ మరింత చురుగ్గా పనిచేస్తుంది.

* వేగవంతమైన కొత్త లాంచర్‌ను ట్రై చేయండి..
టీవీతో పాటు వచ్చే గూగుల్ టీవీ లాంచర్ (Default Google TV launcher) చాలాసార్లు బరువుగా ఉంటుంది. దానిలో బోలెడన్ని ట్యాబ్స్, యాడ్స్ ఉండటం వల్ల టీవీ స్లో అవుతుంది. దీనికి బదులుగా 'ఎఫ్‌లాంచర్' (FLauncher) లాంటి తేలికైన థర్డ్-పార్టీ లాంచర్‌ను వాడితే చాలా తేడా కనిపిస్తుంది. ఇది చూడటానికి సింపుల్‌గా ఉంటుంది.

అలాగే తక్కువ సిస్టమ్ రిసోర్స్‌లను (టీవీ శక్తిని) వాడుకుంటుంది, దాంతో టీవీ వేగం పెరుగుతుంది. అయితే, ఆండ్రాయిడ్ టీవీల్లో కొత్త లాంచర్‌ను డీఫాల్ట్‌గా సెట్ చేయడం కొంచెం క్లిష్టమైన వ్యవహారం. దీనికోసం 'బటన్ మ్యాపర్' (Button Mapper) లాంటి అదనపు యాప్ వాడి, రిమోట్‌లోని హోమ్ బటన్‌ను మీకు నచ్చిన కొత్త లాంచర్‌కు పనిచేసేలా మార్చుకోవాలి.

* లాస్ట్ టిప్
స్మార్ట్ టీవీలు కొత్త స్మార్ట్‌ఫోన్‌లంత వేగంగా ఉండకపోవచ్చు, కానీ పైన చెప్పిన ఈ ఆరు సింపుల్ స్టెప్స్‌తో మీ టీవీ పనితీరును కచ్చితంగా మెరుగుపరుచుకోవచ్చు. అనవసరమైన చెత్తను క్లీన్ చేయండి, ఎప్పటికప్పుడు అప్‌డేట్ చేయండి, వాడని యాప్స్‌ను తీసేయండి. ఇలా చేస్తే మీ యాప్స్ వేగంగా లోడ్ అవుతాయి, మీ టీవీ వాడటానికి మళ్లీ కొత్తదానిలా అనిపిస్తుంది.