మీ ఫోన్ హ్యాక్ అయ్యే ప్రమాదం! ఏఐ బ్యాంకింగ్ ట్రోజన్ నుంచి తప్పించుకోవాలంటే వెంటనే ఈ సెట్టింగ్స్ మార్చండి!

సెప్టెంబర్ 17 నుంచి 21 మధ్య కాలంలో ఒక ప్రమాదకరమైన 'ఏఐ ఆధారిత' ఆండ్రాయిడ్ బ్యాంకింగ్ ట్రోజన్‌ను సెక్యూరిటీ పరిశోధకులు గుర్తించారు. ఇది ఫోన్‌లోని ‘యాక్సెసిబిలిటీ’ ఫీచర్‌ను వాడుకుని, బ్యాంకింగ్ స్క్రీన్‌లపై నకిలీ పేజీలు (Overlays) సృష్టించి యూపీఐ లాగిన్ వివరాలను దొంగిలిస్తోంది. నోటిఫికేషన్‌లను చదవడం ద్వారా రియల్ టైమ్‌లోనే ఆటోమేటిక్‌గా ఓటీపీలను కూడా కాజేస్తోంది. కొన్నిసార్లు ‘వైర్‌లెస్ డిబగ్గింగ్’ను ఉపయోగించి, డిలీట్ చేసినా మళ్లీ ఫోన్‌లోకి జొరబడుతోంది. ఈ హ్యాకర్ల బారిన పడకుండా ఉండాలంటే మీ ఫోన్‌లో వెంటనే కొన్ని సెట్టింగ్స్ మార్చుకోవాలి.

భారత్‌లో వాట్సాప్, ఎస్‌ఎంఎస్, టెలిగ్రామ్‌ల ద్వారా నకిలీ ఏపీకే (APK) ఫైళ్లను పంపుతూ సైబర్ నేరగాళ్లు వల వేస్తున్నారు. వీటితో పాటు నకిలీ ప్రకటనలు, నమ్మదగని వెబ్‌సైట్లలో ఉండే క్లోన్ యాప్‌ల ద్వారా ఈ వైరస్ వేగంగా వ్యాపిస్తోంది. ఒక్కసారి ఫోన్‌లో ఇన్‌స్టాల్ అయ్యాక, బ్యాంకింగ్, యూపీఐ యాప్‌ల లాగే కనిపించే నకిలీ స్క్రీన్‌లను చూపిస్తూ యూజర్ వివరాలను దొంగిలిస్తుంది. నోటిఫికేషన్‌లను చదివి ఓటీపీలను సేకరిస్తూ మీ యూపీఐ సెషన్‌ను హ్యాక్ చేస్తుంది. కొన్ని వెర్షన్లు వైర్‌లెస్ డిబగ్గింగ్‌ను ఆన్ చేసుకుని, యాప్‌ను డిలీట్ చేసిన తర్వాత కూడా మళ్లీ ఫోన్‌పై నియంత్రణ సాధిస్తున్నాయి. అకస్మాత్తుగా 'యాక్సెసిబిలిటీ' పర్మిషన్లు కోరడం లేదా "Install unknown apps" ఆన్ చేయమని అడగడం లాంటివి కనిపిస్తే ప్రమాదకర సంకేతంగా భావించాలి.

ఏఐ ఆండ్రాయిడ్ బ్యాంకింగ్ ట్రోజన్: మీ ఫోన్‌ను వెంటనే ఇలా చెక్ చేసుకోండి

ముందుగా, మీ ఫోన్‌లోని ‘Developer options’ లో ‘Wireless Debugging’ ఆన్‌లో ఉంటే వెంటనే ఆఫ్ చేయండి. ‘Security’ సెట్టింగ్స్‌లోకి వెళ్లి గుర్తుతెలియని ‘Device Admin’ యాప్‌లను తొలగించండి. అవసరం లేని యాప్‌లకు ఇచ్చి ఉన్న 'యాక్సెసిబిలిటీ' అనుమతులను తీసేయండి (బ్యాంకింగ్ యాప్‌లకు ఈ పర్మిషన్ అసలు అవసరం ఉండదు). బ్రౌజర్లు, ఫైల్ మేనేజర్లు, మెసేజింగ్ యాప్‌లకు "Install unknown apps" అనుమతిని డిసేబుల్ చేయండి. ఆ తర్వాత గూగుల్ ప్లే స్టోర్ ఓపెన్ చేసి, ప్రొఫైల్ ఐకాన్‌పై టాప్ చేసి 'Play Protect' ద్వారా ఫోన్‌ను స్కాన్ (Scan) చేయండి. ఈ జాగ్రత్తలు ట్రోజన్ దాడుల నుంచి మీ ఫోన్‌కు రక్షణ ఇస్తాయి.

భారతీయ యూపీఐ వినియోగదారులు పాటించాల్సిన సెక్యూరిటీ స్టెప్స్

ఏదైనా సమస్య రాకముందే మీ యూపీఐ ఖాతాను మరింత సురక్షితంగా మార్చుకోండి. యూపీఐ యాప్‌లో రోజువారీ లావాదేవీల పరిమితిని (Daily limit) తగ్గించి పెట్టుకోండి. మీ బ్యాంక్ సదుపాయం ఉంటే ‘డివైజ్ లేదా యాప్ బైండింగ్’ (Device binding) ఆన్ చేసుకోండి. పేమెంట్ సెటప్ చేసే సమయంలో ఎవరితోనూ స్క్రీన్ షేర్ చేయకండి. లాక్‌స్క్రీన్‌పై ఎస్‌ఎంఎస్‌ల ప్రివ్యూలు, నోటిఫికేషన్‌లు కనిపించకుండా హైడ్ చేయండి. మీ యూపీఐ పిన్‌ను సీక్రెట్‌గా ఉంచండి, ఏ చిన్న అనుమానం వచ్చినా వెంటనే పిన్ మార్చండి. సైబర్ ముప్పుల నుంచి తప్పించుకోవడానికి భారత బ్యాంకింగ్ మార్గదర్శకాలు కూడా ఇవే సూచిస్తున్నాయి.

ఒకవేళ వైరస్ సోకితే.. వెంటనే ఈ తక్షణ చర్యలు తీసుకోండి

ఒకవేళ మీరు ఆ పొరపాటు లింక్‌లపై క్లిక్ చేసినా లేదా నకిలీ యాప్ ఇన్‌స్టాల్ చేసుకున్నా గాబరా పడకుండా వెంటనే స్పందించండి. ముందుగా ఫోన్‌ను ‘ఎయిర్‌ప్లేన్ మోడ్’ (Airplane mode) లో పెట్టి, ఆ తర్వాత ‘సేఫ్ మోడ్’ (Safe Mode) లో రీబూట్ చేయండి. అనుమానాస్పద యాప్‌లను అన్‌ఇన్‌స్టాల్ చేసి, తెలియని డివైజ్ అడ్మిన్ పర్మిషన్లను తీసేయండి. వేరే సురక్షితమైన ఫోన్ లేదా డివైజ్ ద్వారా మీ యూపీఐ పిన్, బ్యాంకింగ్ పాస్‌వర్డ్‌లను వెంటనే మార్చేయండి. మీ బ్యాంకుకు సమాచారం అందించి, 1930 హెల్ప్‌లైన్‌కు కాల్ చేయండి. అలాగే cybercrime.gov.in లో ఫిర్యాదు నమోదు చేయండి. సెప్టెంబర్ ఆండ్రాయిడ్ సెక్యూరిటీ ప్యాచ్, తాజా గూగుల్ ప్లే సిస్టమ్ అప్‌డేట్‌తో మీ ఫోన్‌ను అప్‌డేట్ చేయండి. ఎంత త్వరగా స్పందిస్తే ఆర్థిక నష్టాన్ని అంతగా నివారించవచ్చు.