బెంగళూరులో పవర్ కట్: కరెంట్ లేని సమయంలో మీ ఫోన్ బ్యాటరీని ఇలా సేవ్ చేసుకోండి!

బెంగళూరులో ఆగస్టు 23, 24 తేదీల్లో విద్యుత్ సరఫరాకు తీవ్ర విఘాతం కలగనుంది. నిర్వహణ పనుల కారణంగా నగరంలోని దాదాపు 70కి పైగా ప్రాంతాల్లో పొద్దున్నుంచి సాయంత్రం వరకు కరెంట్ కట్ చేయనున్నట్లు బెస్కామ్ (BESCOM) ప్రకటించింది. మల్లేశ్వరం, బిఈఎల్ రోడ్, సదాశివనగర్, కనకపుర మెయిన్ రోడ్, తలఘట్టపుర వంటి కీలక ప్రాంతాలు ఈ జాబితాలో ఉన్నాయి. ఇక గోవిందపుర, హెగ్డే నగర్‌లలో సోమవారం పవర్ కట్ ఉండనుంది. కాబట్టి స్మార్ట్‌ఫోనే మీ సర్వస్వం అయితే.. ఇప్పటినుంచే సిద్ధమైపోవడం మంచిది!

అందరికంటే ముందుగా.. మీ ఏరియా ఫీడర్ ఏంటో, ఏ సమయానికి కరెంట్ పోతుందో తెలుసుకోండి. దీనికోసం X (ట్విట్టర్)లో 'BESCOM Helpline' ఖాతాలో ఇచ్చే అప్‌డేట్లను పరిశీలించండి. మీ కరెంట్ బిల్లు లేదా మీటర్ స్టిక్కర్‌పై ఉన్న ఫీడర్, సబ్‌స్టేషన్ పేర్లను సరిచూసుకోండి. అవసరమైతే మీ అపార్ట్‌మెంట్ అసోసియేషన్ లేదా సెక్యూరిటీని అడిగి తెలుసుకోండి. మీ ఏరియా టైమింగ్స్‌కు సంబంధించిన స్క్రీన్‌షాట్‌లు దాచుకుని, ఫోన్‌లో క్యాలెండర్ అలారమ్స్ సెట్ చేసుకోండి.

బెంగళూరు పవర్ కట్: కరెంట్ పోకముందే ఫోన్ చార్జింగ్ పెంచుకోండిలా..

కరెంట్ పోవడానికి ముందే ఫోన్‌ను 90 శాతం వరకు చార్జ్ చేసి అన్‌ప్లగ్ చేయండి (ఇది ఫోన్ వేడెక్కకుండా చూస్తుంది). ఫోన్‌లో 'ఎక్స్‌ట్రీమ్ బ్యాటరీ సేవర్' ఆన్ చేయండి. ఎక్కువ డేటా వాడే యాప్‌లకు బ్యాక్‌గ్రౌండ్ డేటాను నిలిపివేయండి. ఆఫ్‌లైన్ మ్యాప్స్, మీకు కావాల్సిన ప్లేలిస్ట్‌లను ముందే డౌన్‌లోడ్ చేసుకోండి. యుపిఐ (UPI) లావాదేవీల కోసం ఎస్‌ఎంఎస్ ఆప్షన్‌ను అందుబాటులో ఉంచుకుని, ఖాతాలో తగినంత బ్యాలెన్స్ ఉందో లేదో చూసుకోండి. ఆధార్ కాపీలు, ప్రయాణ టికెట్ల వంటి అత్యవసర డాక్యుమెంట్లను ఆఫ్‌లైన్‌లో సేవ్ చేసుకోండి. స్క్రీన్ బ్రైట్‌నెస్ తగ్గించడంతో పాటు సిగ్నల్ బలహీనంగా ఉన్నప్పుడు 4Gకి మారడం మంచిది.

ఫోన్ బ్యాటరీ లైఫ్ పెరగాలా? చార్జింగ్ అలవాట్లలో ఈ మార్పులు తప్పనిసరి!

వర్షాకాలంలో ఉండే ఉక్కపోత సమయంలో స్క్రీన్ టైమ్ కంటే అధిక వేడే బ్యాటరీని త్వరగా పాడుచేస్తుంది. కాబట్టి ఫోన్‌ను దిండ్ల కింద లేదా కార్ డాష్‌బోర్డ్‌లపై ఉంచకుండా నీడలో ఉంచండి. చార్జింగ్ పెట్టేటప్పుడు మందపాటి కేస్ (కవర్) తీసేయండి. ఫోన్ వేడెక్కినట్లు వార్నింగ్ వస్తే, వెంటనే చార్జింగ్ ఆపి చల్లారనివ్వండి. ఇన్వర్టర్లపై చార్జ్ చేసేటప్పుడు స్లో చార్జింగ్‌కే ప్రాధాన్యమివ్వండి.. పదే పదే ఫాస్ట్ చార్జింగ్ పెట్టకండి. కరెంట్ వచ్చేంత వరకు గేమింగ్‌కు బ్రేక్ ఇవ్వండి.

ఇన్వర్టర్, యుపిఎస్ వాడేటప్పుడు సేఫ్ చార్జింగ్ చెక్‌లిస్ట్ ఇదే!

చౌకబారు మల్టీ-ప్లగ్స్ కాకుండా బిఐఎస్ (BIS) సర్టిఫైడ్ సర్జ్ ప్రొటెక్టర్ మాత్రమే వాడండి. కరెంట్ వచ్చే సమయానికి ముందే చార్జర్లను ప్లగ్ నుంచి తీసేయండి. కరెంట్ వచ్చాక ఐదు నిమిషాలు ఆగి మళ్లీ కనెక్ట్ చేయండి. చార్జర్లు, పవర్ బ్యాంకులను తడి నేలలపై ఉంచొద్దు. మెటల్ ఫ్రేమ్‌ల పక్కన చార్జింగ్ పెట్టకూడదు. ఇంట్లోని ఇన్వర్టర్లు లేదా యుపిఎస్‌ల (UPS) పై ఫోన్లకు ఫాస్ట్ చార్జింగ్ పెట్టేటప్పుడు హెవీ అప్లయెన్సెస్ వాడటం మానేయండి. ఇక పవర్ బ్యాంకుల్లో ఎప్పుడూ 20 నుంచి 80 శాతం మధ్య చార్జింగ్ ఉండేలా చూసుకోండి.

బెంగళూరు పవర్ కట్స్: చుట్టుపక్కల చార్జింగ్ ఆప్షన్లు, అత్యవసర సమాచారం

ఆఫీసులు, లైబ్రరీలు, కేఫ్‌లు లేదా మెట్రో స్టేషన్లలో సిబ్బంది అనుమతితో సురక్షితమైన చార్జింగ్ సాకెట్లను వినియోగించుకోండి. మీ వద్ద ఎప్పుడూ ఒక చిన్న దృఢమైన కేబుల్, కాంపాక్ట్ సర్జ్ ప్రొటెక్టర్ ఉండేలా చూసుకోండి. పవర్ రాగానే ఒక 40 నిమిషాలు ఫాస్ట్ చార్జింగ్ చేసుకుని, ఆ తర్వాత ట్రికిల్ చార్జింగ్‌కు మారండి. ఆండ్రాయిడ్ లేదా ఐఫోన్‌లో అత్యవసర SOS ఆప్షన్ ఆన్ చేసి, కుటుంబ సభ్యులతో లైవ్ లొకేషన్ షేర్ చేసుకోండి. నెట్‌వర్క్ సమస్యలు ఉన్నప్పుడు వైఫై కాలింగ్ లేదా ఎస్‌ఎంఎస్‌లనే ఎంచుకోండి.