మీ ఫోన్‌కు ఈ-చలాన్ మెసేజ్ వచ్చిందా? ఆ లింక్ క్లిక్ చేస్తే బ్యాంక్ ఖాతా ఖాళీ అవ్వొచ్చు!

దేశవ్యాప్తంగా వాహనదారులే లక్ష్యంగా భారీ ఈ-చలాన్ స్కామ్ జరుగుతోంది. ఆర్టీఓ (RTO) పేరుతో నకిలీ మెసేజ్‌లు పంపి కేటుగాళ్లు మోసాలకు పాల్పడుతున్నారు. ఈ మెసేజ్‌లలో ఉండే లింక్‌లను క్లిక్ చేస్తే ప్రమాదకరమైన ఏపీకే (APK) ఫైల్స్ మీ ఫోన్‌లో ఇన్‌స్టాల్ అవుతాయి. దీనివల్ల మీ బ్యాంక్ వివరాలు చోరీకి గురయ్యే ప్రమాదం ఉంది. ఒకవేళ మీరు పొరపాటున ఇలాంటి అనుమానాస్పద లింక్‌లపై క్లిక్ చేసి ఉంటే వెంటనే అప్రమత్తం అవ్వండి.

మీకు ట్రాఫిక్ ఫైన్ పడిందని, వెంటనే చెల్లించాలంటూ ఈ నకిలీ మెసేజ్‌లు వస్తుంటాయి. సాక్ష్యాలు చూడాలన్నా లేదా వెంటనే ఫైన్ కట్టాలన్నా ఈ లింక్ క్లిక్ చేయమని నమ్మిస్తారు. కానీ ఆ లింక్ మిమ్మల్ని ప్రభుత్వ వెబ్‌సైట్‌కు కాకుండా వేరే థర్డ్ పార్టీ సైట్‌కు తీసుకెళ్తుంది. ఆ యాప్ ఇన్‌స్టాల్ అయితే మీ ఫోన్ మెసేజ్‌లు, నోటిఫికేషన్లపై హ్యాకర్లకు పూర్తి పట్టు దొరుకుతుంది. చివరకు మీ యూపీఐ (UPI) కోడ్‌లను కూడా వారు తస్కరించే అవకాశం ఉంది.

మీ ఫోన్ హ్యాక్ అయిందని గుర్తించడం ఎలా?

మీ ఫోన్‌లో మీకు తెలియని యాప్స్ ఏవైనా ఉన్నాయా? బ్యాటరీ వేగంగా అయిపోతోందా? ఒకసారి చెక్ చేసుకోండి. సెట్టింగ్స్‌లోకి వెళ్లి 'Accessibility' లేదా 'Device Admin' పర్మిషన్లు ఏ యాప్స్‌కు ఉన్నాయో చూడండి. గూగుల్ ప్లే ప్రొటెక్ట్ (Google Play Protect) నుంచి అలర్ట్స్ వస్తున్నాయంటే మీ ఫోన్ ప్రమాదంలో ఉన్నట్లే. ఇలాంటి మాల్వేర్ యాప్స్ ఇన్‌స్టాల్ అయ్యాక కనిపించకుండా దాక్కుంటాయి. వెంటనే ఆ పర్మిషన్లను రద్దు చేయడం ద్వారా మీ డేటా చోరీ కాకుండా ఇప్పుడే అడ్డుకోండి.

ఈ-చలాన్ మాల్వేర్ నుంచి ఫోన్‌ను క్లీన్ చేయడం ఎలా?

ముందుగా మీ ఫోన్‌లో 'ఏరోప్లేన్ మోడ్' ఆన్ చేయండి, దీనివల్ల హ్యాకర్ కనెక్షన్ కట్ అవుతుంది. సెట్టింగ్స్‌లోకి వెళ్లి అనుమానాస్పద యాప్స్‌ను మాన్యువల్‌గా అన్‌ఇన్‌స్టాల్ చేయండి. మీ పర్మిషన్ లేకుండా ఎస్ఎంఎస్ (SMS) యాప్ మారిపోతే, దాన్ని మళ్లీ డిఫాల్ట్‌కు మార్చండి. భద్రత కోసం మీ బ్యాంక్ అకౌంట్లు, యూపీఐ ఆటోపే సెట్టింగ్స్‌ను తాత్కాలికంగా నిలిపివేయండి (Freeze). వాట్సాప్ సెక్యూరిటీ సెట్టింగ్స్‌లో 'టూ-స్టెప్ వెరిఫికేషన్' ఆన్ చేసుకోవడం మర్చిపోవద్దు.

ఒకవేళ సమస్య ఇంకా తగ్గకపోతే, ఫోన్‌ను పూర్తిగా 'ఫ్యాక్టరీ రీసెట్' చేయండి. అయితే దీనికంటే ముందు మీ డేటాను బ్యాకప్ తీసుకోవడం ముఖ్యం. ఇలాంటి మోసాలకు గురైతే వెంటనే 1930 నంబర్‌కు కాల్ చేసి నేషనల్ సైబర్ క్రైమ్ హెల్ప్‌లైన్‌కు ఫిర్యాదు చేయండి. ప్రభుత్వ అధికారిక సైబర్ క్రైమ్ పోర్టల్‌లో కూడా కంప్లైంట్ ఇవ్వొచ్చు. ట్రాఫిక్ ఫైన్లు కట్టేటప్పుడు ఎప్పుడూ అధికారిక వెబ్‌సైట్లను మాత్రమే వాడండి.