నకిలీ ఐఫోన్ ఛార్జర్లతో ఫోన్ పేలిపోయే ప్రమాదం! మీ ఛార్జర్ అసలో కాదో ఇలా చెక్ చేసుకోండి

2026 ఆగస్టు 26న రాజస్థాన్‌లోని అజ్మీర్‌లో పోలీసులు భారీగా నకిలీ ఐఫోన్ ఛార్జర్లు, లైట్నింగ్ కేబుళ్లను సీజ్ చేశారు. పలు షాపులు, గోడౌన్లలో యాపిల్ ప్రతినిధులతో కలిసి ఈ దాడులు నిర్వహించారు. విశ్వసనీయమైన మార్కెట్లలోకి ఇలాంటి ఫేక్ ప్రొడక్ట్స్ రావడం వల్ల యూజర్ల భద్రతకే కాకుండా వారి ఫోన్ వారంటీకి కూడా ముప్పు ఏర్పడుతోంది. ఈ నేపథ్యంలో మీరు వాడుతున్న ఛార్జర్ అసలైందో కాదో బ్యూరో ఆఫ్ ఇండియన్ స్టాండర్డ్స్ (BIS) ద్వారా ఎలా చెక్ చేసుకోవాలో ఇప్పుడు చూద్దాం.

దాడుల సమయంలో అడాప్టర్లపై యాపిల్ లోగోతో ఉన్న స్టిక్కర్లు, సేమ్ ఒరిజినల్ ప్యాకింగ్ తరహాలోనే ఉండటాన్ని పోలీసులు గుర్తించారు. గంటల తరబడి సాగిన ఈ శోధనలో భారీగా నకిలీ స్టాక్‌ను స్వాధీనం చేసుకోవడంతో పాటు ఒకరిని అదుపులోకి తీసుకున్నారు. ప్యాకింగ్ ఎంత పర్ఫెక్ట్‌గా ఉన్నా అందులో ప్రమాదకరమైన నకిలీ హార్డ్‌వేర్ ఉండే అవకాశం ఉందనడానికి ఈ ఘటనే నిదర్శనం. తక్కువ ధరకే వస్తున్నాయని కేవలం లేబుళ్లను చూసి మోసపోవద్దని అధికారులు హెచ్చరిస్తున్నారు. పోలీసులు తనిఖీలు నిరంతరం జరుపుతున్నప్పటికీ, వినియోగదారులు సొంతంగా జాగ్రత్తలు తీసుకోవడమే అత్యంత ముఖ్యం.

నకిలీ ఐఫోన్ ఛార్జర్లతో ముప్పు.. ఈ 60 సెకన్ల సేఫ్టీ టెస్ట్‌తో చెక్ చేయండి!

సాధారణంగా నకిలీ ఛార్జర్లలో ప్రాథమిక భద్రతా ప్రమాణాలు (Safety standards) పాటించరు. దీనివల్ల షాక్ కొట్టడం లేదా ఫోన్ తగలేబడటం వంటి ప్రమాదాలు జరుగుతాయి. అందుకే మీ ఛార్జర్‌ను 60 సెకన్లలో ఇంట్లోనే ఇలా టెస్ట్ చేయండి: ఛార్జర్ పిన్లు (Prongs) సరిగ్గా ఉన్నాయో లేదో చూడండి, దానిపై ఉన్న అక్షరాల ఫాంట్‌ను పరిశీలించండి. ఛార్జ్ అవుతున్నప్పుడు ఏమైనా బుజ్జింగ్ (Buzzer) శబ్దం వస్తోందో లేదో వినండి. సాకెట్‌లో ఛార్జర్ సరిగ్గా ఫిట్ అవుతుందో లేదో చెక్ చేయండి, ఛార్జ్ పెట్టిన 10 నిమిషాల తర్వాత ఛార్జర్ విపరీతంగా వేడెక్కుతుందా? అనేది గమనించండి. ఛార్జర్ మరీ తేలికగా ఉన్నా, అక్షరాలు స్పష్టంగా ముద్రించకపోయినా అది నకిలీదని గ్రహించాలి. ఏమాత్రం అనుమానం ఉన్నా వెంటనే దాన్ని వాడటం ఆపేయండి.

BIS Care యాప్ ద్వారా ఐఫోన్ ఛార్జర్‌ను ఎలా వేరిఫై చేయాలి?

మీ ఛార్జర్ ఒరిజినలో కాదో BIS Care యాప్‌లో సులభంగా చెక్ చేసుకోవచ్చు. ముందుగా యాప్ ఓపెన్ చేసి "Verify R No. under CRS" పై క్లిక్ చేయండి. ఛార్జర్ అడాప్టర్‌పై ఉన్న 'R-Number'ను ఎంటర్ చేయండి లేదా QR కోడ్‌ను స్కాన్ చేయండి. అందులో వచ్చే బ్రాండ్, మోడల్, తయారీదారు వివరాలు మీ ఛార్జర్‌తో మ్యాచ్ అవుతున్నాయో లేదో సరిచూసుకోండి. ఏ వివరాలు మ్యాచ్ కాకపోయినా లేదా ‘Invalid’ అని వచ్చినా అది నకిలీదని అర్థం. మీకు కావాలనుకుంటే యాప్ మెనూ నుంచి భాషను 'తెలుగు'కి మార్చుకోవచ్చు. అంతేకాకుండా యాప్ నుంచే నేరుగా ఫిర్యాదు కూడా చేయవచ్చు.

నకిలీ ఛార్జర్ కొంటే రీఫండ్ పొందడం ఎలా? ఎక్కడ ఫిర్యాదు చేయాలి?

ఒకవేళ మీరు నకిలీ ఛార్జర్ కొనుగోలు చేసినట్లయితే.. దానికి సంబంధించిన బిల్‌ (Invoice), ఫోటోలు, చాట్ రికార్డులను జాగ్రత్తగా ఉంచుకోండి. ముందుగా సదరు విక్రేతను సంప్రదించి రీఫండ్ కోరండి. ఆన్‌లైన్ లేదా UPI చెల్లింపులు చేసి ఉంటే బ్యాంక్ లేదా UPI యాప్‌ ద్వారా డిస్ప్యూట్ (Dispute) రేజ్ చేయండి. చట్టపరమైన చర్యల కోసం నేషనల్ కన్స్యూమర్ హెల్ప్‌లైన్ (NCH) టోల్ ఫ్రీ నెంబర్ 1915కు కాల్ చేయవచ్చు లేదా 8800001915కు వాట్సాప్ చేయవచ్చు. లేదా consumerhelpline.gov.in వెబ్‌సైట్‌లోనూ ఫిర్యాదు నమోదు చేయవచ్చు. 2025 ఏప్రిల్ నుంచి 2026 జనవరి మధ్య కాలంలో వినియోగదారులకు ఏకంగా ₹52 కోట్ల రీఫండ్ ఇప్పించినట్లు NCH తెలిపింది.

ఎప్పుడైనా ఆథరైజ్డ్ రిటైలర్ల వద్ద మాత్రమే ఛార్జర్లు కొనుగోలు చేయండి. BIS రిజిస్టర్ అయిన అడాప్టర్లు, సర్టిఫైడ్ కేబుళ్లను మాత్రమే ఎంచుకోండి. లూజ్ సాకెట్లలో ఛార్జింగ్ పెట్టవద్దు, వర్షాలు పడే సమయంలో సర్జ్ ప్రొటెక్టర్ ఉపయోగించండి. మంటలు వ్యాపించే ప్రమాదం ఉన్న ఉపరితలాలపై ఫోన్‌ను ఉంచి ఛార్జింగ్ పెట్టకండి. రాజస్థాన్‌లో జరిగిన దాడుల నేపథ్యంలో, కొత్త ఛార్జర్ కొనే ప్రతిసారీ BIS వేరిఫికేషన్‌ చేసుకోవడం అలవాటు చేసుకోండి. ఇది మీ ఫోన్ బ్యాటరీని, మీ భద్రతను మరియు ఫోన్ వారంటీని కాపాడుతుంది.