వాట్సాప్‌లో నకిలీ ఆర్‌టీవో మెసేజ్‌లు! ఈ తప్పు చేస్తే మీ బ్యాంక్ ఖాతా ఖాళీ అవ్వడం ఖాయం!

వాట్సాప్‌లో నకిలీ ఆర్‌టీవో (RTO) ఫైన్ మెసేజ్‌లతో సైబర్ ముఠాలు వాహనదారులను బురిడీ కొట్టిస్తున్నాయి. ట్రాఫిక్ నిబంధనలు ఉల్లంఘించారంటూ మెసేజ్‌లతో పాటు APK ఫైళ్లను పంపుతూ బ్యాంకింగ్ మాల్వేర్‌ను ఫోన్‌లలోకి జొరబడేలా చేస్తున్నాయి. చలానా వెరిఫికేషన్ పేరుతో చిన్న మొత్తంలో ఫీజు కట్టాలని నమ్మిస్తాయి. ఒకసారి ఈ ఫైల్ డౌన్‌లోడ్ చేస్తే చాలు.. మీ వ్యక్తిగత డేటా, మెసేజ్‌లు మొత్తం స్కామర్ల చేతికి చిక్కినట్లే. అందుకే గుర్తుతెలియని లింకులు, ఫైళ్లను అస్సలు ఓపెన్ చేయకూడదు.

ఈ ఫేక్ ఈ-చలానా మెసేజ్‌ల ద్వారా ఫోన్‌లలోకి హానికరమైన పర్మిషన్లు పొందుతున్నారు. దీనివల్ల ఫోన్‌కి వచ్చే ఓటీపీలు (OTP), బ్యాంకింగ్ అలెర్ట్‌లను ఈ మాల్వేర్ సైలెంట్‌గా కాపీ చేస్తుంది. అంతేకాకుండా మీ ఫోన్ కాంటాక్ట్స్‌లో ఉన్న అందరికీ ఈ స్కామ్ లింకులను ఆటోమేటిక్‌గా పంపేస్తుంది. ఆ తర్వాత మీ బ్యాంక్ వివరాలతో క్షణాల్లో ఖాతాలోని డబ్బు ఖాళీ చేసేస్తారు. కొద్దిపాటి జాగ్రత్తతోనే ఈ మాల్వేర్ దాడుల నుంచి మన సొమ్మును కాపాడుకోవచ్చు.

RTO ఈ-చలానాను సురక్షితంగా ఎలా చెక్ చేసుకోవాలి?

ట్రాఫిక్ పోలీసులు లేదా ఆర్టీవో అధికారులు వాట్సాప్ చాట్‌లలో ఎప్పుడూ APK ఫైళ్లను పంపరు. మీ వాహనంపై ఫైన్లు ఉన్నాయో లేదో తెలుసుకోవాలంటే అధికారిక ప్రభుత్వ వెబ్‌సైట్లు లేదా యాప్‌ల ద్వారానే చెక్ చేసుకోవాలి. 'పరివాహన్' (Parivahan) ఈ-చలానా వెబ్‌సైట్‌కి వెళ్లి మీ వెహికల్ రిజిస్ట్రేషన్ నంబర్ ఎంటర్ చేస్తే సరిపోతుంది. అసలైన పోర్టల్స్‌లో చలానా ఫోటోలు నేరుగా కనిపిస్తాయి కానీ ఎలాంటి ఫైళ్లు డౌన్‌లోడ్ చేసుకోమని అడగవు. అధికారిక వనరులను మాత్రమే వాడటం వల్ల స్కామర్ల బారిన పడకుండా జాగ్రత్తపడవచ్చు.

ఒకవేళ పొరపాటున ఆ ఫైల్ ఇన్‌స్టాల్ చేస్తే, వెంటనే మీ ఫోన్ ఇంటర్నెట్‌ను ఆఫ్ చేయండి. మీ ఆండ్రాయిడ్ ఫోన్ సెట్టింగ్స్‌లోకి వెళ్లి ఆ యాప్‌ను ఆలస్యం చేయకుండా డిలీట్ చేయండి. డివైజ్ అడ్మినిస్ట్రేషన్, యాక్సెసిబిలిటీ పర్మిషన్లలో ఆ యాప్‌నకు ఇచ్చిన అనుమతులను వెంటనే రద్దు చేయండి. దాగి ఉన్న వైరస్‌లను గుర్తించడానికి Google Play Protect తో స్కాన్ చేయండి. ఇలా పర్మిషన్లు రద్దు చేయడం వల్ల మీ డేటా చోరీ కాకుండా వెంటనే ఆగిపోతుంది.

ఒకవేళ APK యాప్ డౌన్‌లోడ్ చేస్తే.. అకౌంట్ ఎలా కాపాడుకోవాలి?

హానికరమైన యాప్‌ను తొలగించిన వెంటనే మీ బ్యాంక్ ఖాతాలను సురక్షితం చేసుకోండి. మీ యూపీఐ (UPI) పిన్, ఆన్‌లైన్ బ్యాంకింగ్ పాస్‌వర్డ్‌లను వెంటనే మార్చండి. ఒకవేళ మీ ఖాతా నుంచి డబ్బులు కట్ అయితే ఆలస్యం చేయకుండా 1930 సైబర్ క్రైమ్ హెల్ప్‌లైన్ నంబర్‌కు కాల్ చేయండి. ఆ స్కామ్ మెసేజ్‌ల స్క్రీన్‌షాట్లతో cybercrime.gov.in లో ఫిర్యాదు నమోదు చేయండి. త్వరితగతిన ఫిర్యాదు చేస్తే పోలీసులు నేరస్థులను పట్టుకుని మీ డబ్బును రికవర్ చేసే అవకాశం ఉంటుంది.

వైరస్ మీ ఫోన్ సిస్టమ్ పర్మిషన్లను మార్చేస్తే ఫ్యాక్టరీ రీసెట్ (Factory Reset) చేయడమే మంచిది. మీ ప్రధాన ఈమెయిల్ పాస్‌వర్డ్‌లను మార్చి, ఖాతాకి లింక్ అయిన తెలియని పరికరాలను తొలగించండి. లావాదేవీల రికార్డులు, మెసేజ్ చాట్‌లను భద్రపరచడం వల్ల సైబర్ క్రైమ్ పోలీసులకు ఆధారాలు లభిస్తాయి. సందేహాస్పద మెసేజ్ అటాచ్‌మెంట్లతో అప్రమత్తంగా ఉంటే మీ స్మార్ట్‌ఫోన్ భద్రంగా ఉంటుంది. ఈ సమాచారాన్ని మీ మిత్రులు, కుటుంబ సభ్యులతో పంచుకోండి.