ఫ్రీడమ్ సేల్ పేరుతో సైబర్ మోసాలు! మీ బ్యాంక్ ఖాతా ఖాళీ కాకుండా ఉండాలంటే ఈ జాగ్రత్తలు తప్పనిసరి!

రేపటి నుంచే దేశంలో పండుగ సీజన్ షాపింగ్ సందడి మొదలుకాబోతోంది. అయితే, ఈ జోష్‌ను క్యాష్ చేసుకునేందుకు సైబర్ నేరగాళ్లు కూడా రెడీ అయిపోయారు. ప్రస్తుతం ఆన్‌లైన్‌లో నకిలీ 'ఫ్రీడమ్ సేల్' (Freedom Sale) లింకులతో వల విసురుతున్నారు. ప్రముఖ షాపింగ్ వెబ్‌సైట్లను పోలిన నకిలీ లింకులను క్రియేట్ చేసి, యూజర్ల డబ్బులు కొల్లగొడుతున్నారు. వీటితో పాటు కొరియర్ సర్వీసులు, ఫాస్ట్‌ట్యాగ్ (FASTag) కేవైసీ వెరిఫికేషన్ పేరుతో జరిగే మోసాలు కూడా విపరీతంగా పెరిగిపోతున్నాయి. కాబట్టి, యూజర్లు వెంటనే తమ పర్సనల్ అకౌంట్లను సురక్షితంగా ఉంచుకోవడం చాలా అవసరం.

ఈ కేటుగాళ్లు షార్ట్ చేసిన యూఆర్‌ఎల్‌లు (shortened URLs), అసలైన వెబ్‌సైట్లను పోలి ఉండే స్పెల్లింగ్ తప్పులతో కూడిన డొమైన్లను (typo domains) వాడుతుంటారు. నమ్మశక్యం కాని డిస్కౌంట్లు, ఫేక్ రీఫండ్ ఆఫర్లతో కస్టమర్లను ఊరిస్తుంటారు. కొన్ని మెసేజ్‌లలోనైతే తెలియని యాప్స్ డౌన్‌లోడ్ చేసుకోవాలంటూ లింకులు పంపుతారు. మరికొన్నింటిలో స్టార్ 21 స్టార్ (*21*) లాంటి ప్రమాదకరమైన కాల్-ఫార్వార్డింగ్ కోడ్‌లను డయల్ చేయమని అడుగుతుంటారు. ఆర్డర్ క్యాన్సిల్ చేసుకోవడానికి ఓటీపీ (OTP) చెప్పాలంటూ వచ్చే ఫోన్ కాల్స్ అస్సలు నమ్మకండి. మీ మొబైల్ అకౌంట్లను హ్యాక్ చేయడానికి వేసే ప్లాన్ ఇదని గుర్తుంచుకోండి.

ఫ్రీడమ్ సేల్ స్కామ్స్ నుంచి వాట్సాప్, యూపీఐ అకౌంట్లను కాపాడుకోండిలా..

మొదటగా, మీ వాట్సాప్ అకౌంట్‌కు వెంటనే 'టూ-స్టెప్ వెరిఫికేషన్' సెట్ చేసుకోండి. ఈ చిన్న పిన్ (PIN) నంబర్ వల్ల హ్యాకర్లు మీ ప్రొఫైల్‌ను హ్యాక్ చేయలేరు. ఆ తర్వాత, మీ యూపీఐ (UPI) డివైజ్ బైండింగ్‌ను ఒకసారి చెక్ చేసుకోండి. గుర్తుతెలియని వ్యక్తుల నుంచి వచ్చే మనీ కలెక్ట్ రిక్వెస్ట్‌లను వెంటనే బ్లాక్ చేయండి. మీ బ్యాంకింగ్ యాప్స్‌లో రోజువారీ ట్రాన్స్‌ఫర్ లిమిట్‌ను తగ్గించుకోండి. ప్రమాదకరమైన ఫైళ్లను గుర్తించేందుకు గూగుల్ ప్లే ప్రొటెక్ట్ (Google Play Protect) ఆప్షన్‌ను ఆన్‌లో ఉంచండి. ఈ చిన్న జాగ్రత్తలు మీ డబ్బును సురక్షితంగా ఉంచుతాయి.

ఒకవేళ మీరు పొరపాటున ఏదైనా అనుమానాస్పద లింక్‌పై క్లిక్ చేస్తే, అస్సలు ఆలస్యం చేయకండి. వెంటనే ఫోన్‌ను 'ఏరోప్లేన్ మోడ్'లో పెట్టి ఇంటర్నెట్ కనెక్షన్ కట్ చేయండి. మెసేజ్‌లు, యాక్సెసిబిలిటీ సెట్టింగ్స్‌కు ఇచ్చిన పర్మిషన్లను రద్దు చేయండి. మీ ఫోన్‌లో ఉన్న తెలియని యాప్స్ లేదా సాఫ్ట్‌వేర్‌లను వెంటనే అన్‌ఇన్‌స్టాల్ చేయండి. సురక్షితమైన మరో డివైజ్ ద్వారా మీ యూపీఐ, ఈమెయిల్ పాస్‌వర్డ్‌లను వెంటనే మార్చేయండి. ఈ చర్యలు మీ ఫోన్ హ్యాక్ కాకుండా కాపాడతాయి.

ఆన్‌లైన్ మోసాల బారిన పడితే ఫిర్యాదు చేయడం ఎలా?

ఒకవేళ మీరు సైబర్ మోసానికి గురై డబ్బులు పోగొట్టుకుంటే, వెంటనే ఫిర్యాదు చేయాలి. ఏమాత్రం ఆలస్యం చేయకుండా జాతీయ హెల్ప్‌లైన్ నంబర్ 1930 కి కాల్ చేయండి. అలాగే నేషనల్ సైబర్ క్రైమ్ రిపోర్టింగ్ పోర్టల్ (National Cyber Crime Reporting Portal) వెబ్‌సైట్‌లో ఆన్‌లైన్ ద్వారా ఫిర్యాదు నమోదు చేయండి. మీ బ్యాంక్‌ను సంప్రదించి, హ్యాక్ అయిన కార్డులను, పేమెంట్ ఐడీలను వెంటనే బ్లాక్ చేయించండి. ఈ పండుగ సీజన్‌లో ఆన్‌లైన్ షాపింగ్ చేసేటప్పుడు పేమెంట్ లింకులను జాగ్రత్తగా పరిశీలించడం చాలా ముఖ్యం. అప్రమత్తంగా ఉండటమే సైబర్ మోసాల నుంచి మిమ్మల్ని కాపాడుతుంది.