ఫోన్‌లో 'Moisture Detected' అలర్ట్ వస్తుందా? ఈ తప్పులు చేస్తే మీ ఫోన్ ఖతం!

దేశవ్యాప్తంగా కురుస్తున్న వర్షాలు, గాల్లో పెరిగిన తేమ కారణంగా చాలామంది స్మార్ట్‌ఫోన్లలో ‘Moisture Detected’ అలర్టులు వస్తున్నాయి. ముఖ్యంగా శామ్‌సంగ్, గూగుల్ పిక్సెల్, వన్‌ప్లస్ డివైజ్‌లు ఛార్జింగ్ పోర్ట్ పాడవకుండా ఉండేందుకు వైర్డ్ ఛార్జింగ్‌ను ఆటోమేటిక్‌గా నిలిపివేస్తాయి. పోర్ట్ లోపల ఉన్న చిన్న చిన్న నీటి చుక్కల వల్ల షార్ట్ సర్క్యూట్ జరగకుండా చూసేందుకు ఇదొక సేఫ్టీ మెకానిజమ్. ఈ తేమను ఎలా సురక్షితంగా ఆరబెట్టాలో తెలుసుకుంటే, ఫోన్ పాడవకుండా కాపాడుకోవచ్చు.

మీ ఫోన్‌లో బ్యాటరీ బాగా తగ్గిపోయి అత్యవసరంగా ఛార్జ్ చేయాల్సి వస్తే, వేరే మార్గాలు ప్రయత్నించండి. వైర్‌లెస్ ఛార్జింగ్ ప్యాడ్‌లు లేదా రివర్స్ పవర్ షేరింగ్ ఫీచర్ ద్వారా పోర్ట్‌తో సంబంధం లేకుండా ఫోన్‌ను ఛార్జ్ చేసుకోవచ్చు. ఛార్జింగ్ పోర్ట్ పూర్తిగా ఐసోలేట్ అయి ఉన్నప్పటికీ, ఇవి కాంటాక్ట్‌లెస్ పద్ధతిలో సురక్షితంగా పవర్‌ను ట్రాన్స్‌ఫర్ చేస్తాయి. అయితే పోర్ట్ పూర్తిగా ఆరేంత వరకు కార్ ఛార్జర్లు లేదా పవర్ బ్యాంకులను కనెక్ట్ చేయకపోవడమే మంచిది.

'Moisture Detected' సమస్యను సురక్షితంగా పరిష్కరించుకోండిలా..

ఫోన్ పోర్ట్‌లోని తేమను తొందరగా ఆరబెట్టడానికి ఫ్యాన్ నుంచి వచ్చే చల్లని గాలికి పెట్టండి. లేదా కొన్ని సిలికా జెల్ ప్యాకెట్లతో కలిసి ఫోన్‌ను ఒక ఎయిర్‌టైట్ బాక్స్‌లో ఉంచండి. ఒకవేళ పోర్ట్‌లో ఏమైనా జిడ్డుగా ఉంటే, దూదిని ఐసోప్రొపైల్ ఆల్కహాల్ (IPA)లో ముంచి మెల్లగా తుడవండి. IPA చాలా వేగంగా ఆవిరైపోతుంది, లోపల ఉన్న నీటిని తొలగిస్తూ షార్ట్ సర్క్యూట్ కాకుండా కాపాడుతుంది.

ఇలాంటి సమయంలో ఫోన్‌ను బియ్యం డబ్బాలో పెట్టడం లేదా హెయిర్ డ్రైయర్లతో వేడి గాలి ఊదడం వంటి పొరపాట్లు అస్సలు చేయవద్దు. హెయిర్ డ్రైయర్ వేడికి పోర్ట్‌లోని రబ్బర్ సీళ్లు దెబ్బతినడమే కాకుండా, మదర్‌బోర్డ్ సర్క్యూట్లు కరిగిపోయే ప్రమాదం ఉంది. ఇక బియ్యంలోని పిండి, ధూళి పోర్ట్ లోపల గట్టిగా పేరుకుపోయి పిన్‌లను పాడుచేస్తుంది. అలాగే పోర్ట్ తడిగా ఉన్నప్పుడు డెవలపర్ ఆప్షన్స్ ద్వారా సేఫ్టీ హెచ్చరికలను బైపాస్ చేయడానికి ప్రయత్నించకండి.

ఛార్జింగ్ వార్నింగ్ పోకపోతే ఏం చేయాలి?

ఒకవేళ హెచ్చరికలు వస్తూనే ఉంటే, ముందుగా వేరే అడాప్టర్, కేబుల్ తో ఛార్జ్ చేసి చూడండి. తరచూ జేబుల్లో ఫోన్ పెట్టడం వల్ల లోపలికి చేరే చెత్త గాల్లోని తేమను పీల్చుకుని పదే పదే ఈ అలర్ట్స్‌కు కారణమవుతుంది. పవర్ కండక్ట్ చేయని చెక్క టూత్‌పిక్‌తో లోపలి చెత్తను పిన్‌లకు తగలకుండా జాగ్రత్తగా తీసేయండి. అలాగే ఛార్జింగ్ కేబుల్ పిన్‌లను కూడా శుభ్రంగా తుడిచి కనెక్ట్ చేయండి.

నాలుగు గంటల పాటు ఆరబెట్టిన తర్వాత కూడా మాయిశ్చర్ వార్నింగ్ పోకపోతే, వెంటనే ఆథరైజ్డ్ సర్వీస్ సెంటర్‌ను సంప్రదించండి. ఒకవేళ పోర్ట్‌లో పచ్చటి రంగులో ఏమైనా కనిపిస్తే, లోపల ఆక్సిడేషన్ (తుప్పు) పట్టిందని అర్థం. దానికి నిపుణులతో హార్డ్‌వేర్ రిపేర్ చేయించాలి. సర్వీస్ సెంటర్‌కు వెళ్లేటప్పుడు ఎర్రర్ అలర్ట్ స్క్రీన్‌షాట్‌లు, కొనుగోలు బిల్లు, వారంటీ పత్రాలను వెంట తీసుకెళ్తే ప్రాసెస్ సులువవుతుంది.