గణేష్ నిమజ్జనంలో ఫోన్ తడిసిందా? పాడవకుండా ఉండాలంటే ఈ జాగ్రత్తలు తప్పనిసరి!

సెప్టెంబర్ 14 నుంచి గణేష్ నిమజ్జన శోభాయాత్రలు ప్రారంభమవుతున్నాయి. మంటపాల వద్ద లేదా నిమజ్జనం సమయంలో మీ ఫోన్ నీళ్లలో తడిస్తే మాత్రం అస్సలు ఆలస్యం చేయకండి. వెంటనే ఫోన్‌ను స్విచ్ ఆఫ్ చేసి, కేస్‌ను తీసేయండి. ఛార్జింగ్ పోర్ట్ కిందికి ఉండేలా ఫోన్‌ను నిటారుగా ఉంచండి. ఎలాంటి పరిస్థితుల్లోనూ ఛార్జింగ్ పెట్టొద్దు. మెత్తటి, కాటన్ గుడ్డతో నీటిని జాగ్రత్తగా తుడవండి. పదే పదే బటన్లు నొక్కడం లేదా ఫోన్‌ను గట్టిగా ఊపడం లాంటివి చేయకండి.

చాలామంది చేసేలా ఫోన్‌ను బియ్యం డబ్బాలో పెట్టడం లేదా హెయిర్ డ్రైయర్ వాడటం సరికాదు. బియ్యం నూకలు పోర్ట్‌లోకి వెళ్లే ప్రమాదం ఉంది, డ్రైయర్ వేడి వల్ల నీరు ఫోన్ లోపలికి చేరుతుంది. దానికి బదులు సిలికా జెల్ ప్యాకెట్లు ఉంటే వాడండి. ఫ్యాన్ గాలి కింద ఫోన్‌ను ఉంచడం మంచిది. ఛార్జింగ్ పోర్ట్ కిందకు ఉంచి మెల్లగా తట్టండి. ఆ తర్వాత నీటిని పీల్చుకునే టవల్‌పై ఫోన్‌ను నీడలో ఉంచండి. ఫోన్ బోర్డు తుప్పు పట్టకుండా ఉండాలంటే కాస్త ఓపిక పట్టక తప్పదు.

USB‑C/Lightning మోయిశ్చర్ అలర్ట్స్ వస్తే ఏం చేయాలి? ఎంతసేపు ఆగాలి?

ఫోన్‌లో 'మోయిశ్చర్ అలర్ట్' (Moisture alert) వస్తే వెంటనే కేబుల్ తీసేసి, పోర్ట్ కిందకు ఉండేలా పెట్టండి. తేలిగ్గా తడుతు ఫ్యాన్ గాలికి ఆరబెట్టండి. కనీసం 30 నిమిషాల తర్వాత మళ్లీ ట్రై చేయండి. ఫోన్ పూర్తిగా ఆరడానికి 24 గంటల సమయం కూడా పట్టొచ్చు. ఇయర్ బడ్స్, కాటన్ స్వాబ్స్ లేదా ఎయిర్ బ్లోయర్లు అస్సలు వాడొద్దు. కేబుల్ ఛార్జింగ్ పెట్టడానికి కనీసం 5 గంటలు వేచి చూడటం మంచిది. అయితే ఫోన్ వెనుక భాగం పొడిగా ఉంటే వైర్‌లెస్ ఛార్జింగ్ వాడుకోవచ్చు.

IP రేటింగ్‌లు, వర్షం నీరు, ఉప్పు నీటి నిజాలు!

ఫోన్‌కి ఉన్న IP68 రేటింగ్ అనేది ల్యాబ్‌లో ప్రశాంతంగా ఉండే మంచి నీటిలో మాత్రమే టెస్ట్ చేస్తారు. శోభాయాత్రల్లో పడే భారీ వర్షం, ఎగిసిపడే అలలు లేదా స్పీడ్‌గా పడే నీటి ధారలకు ఇది వర్తించదు. పైగా ఫోన్ పాతబడే కొద్దీ ఈ వాటర్ రెసిస్టెన్స్ తగ్గిపోతుంది. ఉప్పు నీరు, సబ్బులు, శానిటైజర్లు ఫోన్ సీల్స్‌ను పాడుచేస్తాయి. ఒకవేళ ఇవి ఫోన్‌పై పడితే, మంచి నీటితో కడిగి ఆ తర్వాత పొడి గుడ్డతో జాగ్రత్తగా తుడవండి.

స్క్రీన్ లేదా ఛార్జింగ్ సమస్య వస్తే.. క్విక్ చెకప్, సర్వీస్ సెంటర్ల వివరాలు

బాగా పనిచేస్తున్న వేరే కేబుల్, అడాప్టర్‌తో ఛార్జింగ్ చెక్ చేయండి. వాయిస్ నోట్ రికార్డ్ చేసి స్పీకర్లు, మైక్రోఫోన్ సరిగ్గా ఉన్నాయో లేదో చూడండి. ఫోన్ ఆరిపోయిన తర్వాత మాత్రమే వైర్‌లెస్ ఛార్జింగ్ ఉపయోగించండి. సమస్యలు అలానే ఉంటే సర్వీస్ సెంటర్‌ను సంప్రదించండి. ముంబైలోని యాపిల్ BKC జెనియస్ బార్ సేవలు రోజూ అందుబాటులో ఉంటాయి, ఫోన్ సపోర్ట్ ఉదయం 9 నుండి రాత్రి 9 వరకు ఉంటుంది. హైదరాబాద్‌లోని ఆప్ట్రానిక్స్ (Aptronix) సోమ-శని ఉదయం 10:30 నుండి సాయంత్రం 7:00 వరకు పనిచేస్తుంది. ముంబైలోని అనేక యూనికార్న్ (Unicorn) సెంటర్లు ఆదివారాల్లో కూడా ఉదయం 10:30 నుండి సాయంత్రం 6:30 వరకు తెరిచి ఉంటాయి.

శోభాయాత్రకు వెళ్లే ముందు ఫైండ్ మై, IMEI, పవర్ బ్యాంక్ సేఫ్టీ టిప్స్

వేడుకలకు వెళ్లేముందు ఐఫోన్‌లో 'Find My', ఆండ్రాయిడ్‌లో 'Find My Device' ఫీచర్లు ఆన్ చేసుకోండి. *#06# డయల్ చేసి లేదా సెట్టింగ్స్‌లో మీ ఫోన్ IMEI నంబర్‌ను సేవ్ చేసుకోండి. ఫోన్ పోయినా లేదా దొంగతనానికి గురైనా CEIR పోర్టల్‌లో బ్లాక్ చేయవచ్చు. బయటకు వెళ్లేటప్పుడు తాడు ఉన్న IPX8 వాటర్‌ప్రూఫ్ పౌచ్‌లో ఫోన్‌ ఉంచుకోవడం మంచిది. అలాగే BIS సర్టిఫైడ్ పవర్ బ్యాంక్‌ను మాత్రమే వాడండి, దాన్ని తడవకుండా చూసుకోండి. ఈ చిన్న జాగ్రత్తలు మీ ఫోన్‌ను, జ్ఞాపకాలను పదిలంగా ఉంచుతాయి.