ఇంటర్నెట్ లేకపోయినా గూగుల్ మ్యాప్స్ వాడొచ్చు.. ఎలాగో తెలుసా?

Google maps offline: ఈ రోజుల్లో మనం వాడుతున్న చాలా యాప్స్ ఇంటర్నెట్ ఉంటేనే పనిచేస్తాయి. వాట్సాప్, ఫేస్‌బుక్, యూట్యూబ్, ఇన్‌స్టా.. ఇలా చాలానే ఉన్నాయి. ఇవే కాదు, మన రోజువారీ జీవితంలో ఉపయోగపడే యాప్స్ కూడా ఇంటర్నెట్ ఉంటేనే పనిచేస్తాయి. వాటిలో గూగుల్ మ్యాప్స్ ఒకటి. కానీ ఒక చిన్న ట్రిక్ తెలిస్తే, ఇంటర్నెట్ లేకపోయినా ఈ గూగుల్ మ్యాప్స్‌ను వాడుకోవచ్చు. ఆఫ్‌లైన్ కోసం మ్యాప్స్‌ను డౌన్‌లోడ్ చేసుకుంటే సరిపోతుంది.

ఇంటర్నెట్ సరిగా లేని ప్రదేశాల్లో ప్రయాణిస్తున్నప్పుడు ఈ ఫీచర్ చాలా ఉపయోగపడుతుంది. ఆండ్రాయిడ్ మొబైల్ లో మాత్రమే కాదు ఐఓఎస్ డివైజ్‌లలో సైతం గూగుల్ మ్యాప్స్ ని ఇంటర్నెట్ లేకుండా ఉపయోగించవచ్చు. మరి ఆయా యూజర్లు దీనికోసం ఎలాంటి స్టెప్స్ ఫాలో అవ్వాలో తెలుసుకుందాం.

* ఆండ్రాయిడ్‌లో ఆఫ్‌లైన్ మ్యాప్స్‌ డౌన్‌లోడ్ చేయండిలా

స్టెప్ 1: మీ ఆండ్రాయిడ్ ఫోన్‌లో గూగుల్ మ్యాప్స్ యాప్‌ను ఓపెన్ చేయాలి. ఆఫ్‌లైన్ మ్యాప్స్‌కి వెళ్లాలి. అందుకు కుడివైపు పైన మీ ప్రొఫైల్ పిక్చర్ లేదా పేరు మొదటి అక్షరం మీద నొక్కాలి. ఒక మెనూ ఓపెన్ అవుతుంది. మెనూలో "ఆఫ్‌లైన్ మ్యాప్స్" ఆప్షన్‌ను సెలెక్ట్ చేసుకోవాలి.

స్టెప్ 2: మీ మ్యాప్ ఏరియాని ఎంచుకోవాలి. "సెలెక్ట్ యువర్ ఓన్ మ్యాప్‌" అనే ఆప్షన్‌ను నొక్కాలి. మ్యాప్ కనిపిస్తుంది. కావాల్సిన ప్రాంతాన్ని జూమ్ ఇన్ లేదా జూమ్ ఔట్ చేసి సెలెక్ట్ చేసుకోవచ్చు. ఏరియా సెలెక్ట్ చేశాక, "డౌన్‌లోడ్" బటన్ నొక్కాలి. ఆ మ్యాప్ మీ డివైజ్‌లో సేవ్ అయిపోతుంది.

* iOSలో ఆఫ్‌లైన్ మ్యాప్స్‌ డౌన్‌లోడ్ చేయండిలా

స్టెప్ 1: మీ ఐఫోన్ లేదా ఐప్యాడ్‌లో గూగుల్ మ్యాప్స్ యాప్‌ను ఓపెన్ చేయాలి. కుడివైపు పైన మీ ప్రొఫైల్ పిక్చర్ లేదా పేరు మొదటి అక్షరం మీద నొక్కాలి. మెనూ వస్తుంది. మెనూలో "ఆఫ్‌లైన్ మ్యాప్స్" ఆప్షన్‌ని సెలెక్ట్ చేయాలి.

స్టెప్ 2: ఇప్పుడు మ్యాప్ ఏరియాని ఎంచుకోవాలి. అందుకు "సెలెక్ట్ యువర్ ఓన్ మ్యాప్‌" ఆప్షన్‌ను నొక్కాలి. మీకు కావాల్సిన ఏరియా కవర్ అయ్యేలా మ్యాప్‌ని అడ్జస్ట్ చేసుకోవాలి. ఏరియా సెలెక్ట్ చేశాక, "డౌన్‌లోడ్" మీద నొక్కాలి. మ్యాప్ మీ డివైజ్‌లో సేవ్ అవుతుంది.

* ఆఫ్‌లైన్ మ్యాప్స్‌ని వాడటం ఎలా

మ్యాప్స్ డౌన్‌లోడ్ చేశాక, ఇంటర్నెట్ లేకుండా వాటిని చూడవచ్చు. గూగుల్ మ్యాప్స్ టర్న్-బై-టర్న్ నావిగేషన్ చూపిస్తుంది, లొకేషన్స్ వెతకడానికి హెల్ప్ చేస్తుంది, ఇంకా ఆ సేవ్ చేసిన ఏరియాలో ఉపయోగపడే ఇన్ఫర్మేషన్ కూడా చూపిస్తుంది. కానీ ఒక విషయం గుర్తుపెట్టుకోవాలి.

రియల్-టైమ్ ట్రాఫిక్ అప్‌డేట్స్, వేరే రూట్స్ వంటి ఫీచర్లు మాత్రం ఇంటర్నెట్ ఉంటేనే పనిచేస్తాయి. అవి ఆఫ్‌లైన్‌లో ఉండవు. ఈ విషయాన్ని తప్పనిసరిగా గుర్తుపెట్టుకోవాలి. మీరు వెళ్లే ప్రాంతంలో ఇంటర్నెట్ అసలే లేదు అనుకుంటే దీని గురించి పెద్దగా చింతించాల్సిన అవసరమే లేదని చెప్పుకోవచ్చు.

* ఆఫ్‌లైన్ మ్యాప్స్‌ని మేనేజ్ చేయడం

అప్‌డేట్స్: ఆఫ్‌లైన్ మ్యాప్స్‌కి కొంతకాలం తర్వాత ఎక్స్‌పైరీ డేట్ ఉంటుంది. ఎందుకంటే మీకు ఎప్పుడూ కరెక్ట్ ఇన్ఫర్మేషన్ ఉండాలి. వై-ఫైకి కనెక్ట్ అయినప్పుడు గూగుల్ మ్యాప్స్ ఆటోమేటిక్‌గా వీటిని అప్‌డేట్ చేస్తుంది. ఒకవేళ మ్యాన్యువల్‌గా చెక్ చేయాలి లేదా అప్‌డేట్ చేయాలనుకుంటే, "ఆఫ్‌లైన్ మ్యాప్స్" సెక్షన్‌కి వెళ్లి, మ్యాప్ ఏరియా మీద నొక్కితే ఆప్షన్స్ కనిపిస్తాయి.

స్టోరేజ్ స్పేస్: డౌన్‌లోడ్ చేసిన మ్యాప్స్ మీ ఫోన్‌లో ప్లేస్ తీసుకుంటాయి. మీ ఫోన్‌లో స్టోరేజ్ తక్కువగా ఉంటే, మీకు ఇకపై అవసరం లేని మ్యాప్స్‌ని డిలీట్ చేయడం మంచిది. "ఆఫ్‌లైన్ మ్యాప్స్" సెక్షన్‌కి వెళ్లి, మీరు తీసేయాలనుకున్న మ్యాప్‌ని సెలెక్ట్ చేసి "డిలీట్" నొక్కేస్తే సరిపోతుంది.

* ఎఫెక్టివ్‌గా వాడటానికి టిప్స్

మీరు కొత్త ప్రదేశానికి వెళ్లే ముందు, ముఖ్యంగా ఇంటర్నెట్ సరిగా ఉండని ఏరియాలకు వెళ్తున్నప్పుడు, కావాల్సిన మ్యాప్స్‌ని ముందుగానే డౌన్‌లోడ్ చేసుకోవాలి. మ్యాప్స్ డౌన్‌లోడ్ చేయడానికి ఎక్కువ డేటా వాడాల్సి వస్తుంది. అందుకే వై-ఫై కనెక్షన్ వాడడం బెస్ట్. డేటా ఛార్జీలు తప్పుతాయి. మీరు వెళ్లాలనుకుంటున్న ప్లేసెస్ అన్నీ కవరయ్యేలా మ్యాప్ ఏరియాని సెలెక్ట్ చేసుకోవాలి.

ఒకవేళ మీరు పెద్ద ప్రాంతాల్లో తిరుగుతుంటే, చాలా మ్యాప్స్‌ను డౌన్‌లోడ్ చేసుకోవచ్చు. ఈ స్టెప్స్ ఫాలో అయితే, ఇంటర్నెట్ లేకపోయినా గూగుల్ మ్యాప్స్‌ని మామూలుగా కాకుండా ప్రో లాగా వాడొచ్చు. మీరు ఎక్కడికి వెళ్లినా నావిగేషన్ టూల్స్ మీ చేతిలో ఉన్నట్టే.