మీ ఫోన్ ఛార్జింగ్ పోర్ట్‌లో 'Moisture Detected' అని వస్తుందా? ఈ తప్పులు చేస్తే ఫోన్ ఖతం!

భారత వాతావరణ శాఖ (IMD) దేశంలోని పలు రాష్ట్రాలకు నేడు రెడ్, ఆరెంజ్ అలర్ట్‌లు జారీ చేసింది. ఈ భారీ వర్షాల నేపథ్యంలో స్మార్ట్‌ఫోన్ వినియోగదారులు ఒక వింత సమస్యను ఎదుర్కొంటున్నారు. అదే 'Moisture detected in USB-C' వార్నింగ్. వర్షంలో తడిసినా లేదా ప్రయాణాల్లో గాలిలో తేమ ఎక్కువగా ఉన్నా ఫోన్‌లోని సెన్సార్లు ఈ హెచ్చరికను జారీ చేస్తాయి. ఫోన్ లోపలి భాగాలు దెబ్బతినకుండా ఉండేందుకు, ఈ సేఫ్టీ ఫీచర్ విద్యుత్ ప్రవాహాన్ని ఆటోమేటిక్‌గా నిలిపివేస్తుంది.

గాలిలో హ్యుమిడిటీ పెరిగినా లేదా ఛార్జింగ్ పోర్ట్‌లోకి నీటి చుక్కలు వెళ్లినా ఈ అలర్ట్ కనిపిస్తుంది. ఈ వార్నింగ్‌ను నిర్లక్ష్యం చేస్తే షార్ట్ సర్క్యూట్ అవ్వడమే కాకుండా, లోపల ఉండే మెటల్ పిన్స్ త్వరగా తుప్పు పట్టే ప్రమాదం ఉంది. పోర్ట్ తడిగా ఉన్నప్పుడు ఛార్జర్ కనెక్ట్ చేస్తే పవర్ సర్జ్ అయ్యే అవకాశం ఉంటుంది. కాబట్టి, స్క్రీన్‌పై అలర్ట్ కనిపిస్తున్నప్పుడు బలవంతంగా ఛార్జింగ్ పెట్టడానికి ప్రయత్నించకండి. ఇలా చేయడం వల్ల మదర్‌బోర్డ్ పాడవ్వడమే కాకుండా, మీ మొబైల్ వారంటీ కూడా రద్దవుతుంది.

USB-C పోర్ట్‌లో తేమ ఉంటే అనుసరించాల్సిన చిట్కాలు

ముందుగా మీ ఫోన్‌ను వెంటనే స్విచ్ ఆఫ్ చేయండి. ఛార్జింగ్ పోర్ట్ కిందికి ఉండేలా చూస్తూ, అరచేతితో ఫోన్‌ను మెల్లగా తట్టండి. దీనివల్ల లోపల చిక్కుకున్న నీటి చుక్కలు బయటకు వచ్చేస్తాయి. చాలామంది ఫోన్‌ను బియ్యం డబ్బాలో పెడుతుంటారు, కానీ అలా చేయకండి. బియ్యంలోని పిండి పదార్థం, దుమ్ము పోర్ట్‌లోకి వెళ్లి మరింత నష్టం కలిగిస్తాయి. ఫోన్‌ను కనీసం రెండు గంటల పాటు గాలి తగిలే చోట ఉంచండి.

మళ్లీ మళ్లీ తేమ సమస్య రాకుండా ఉండాలంటే..

ఫోన్ త్వరగా ఆరాలంటే ఫ్యాన్ కింద ఉంచవచ్చు. ఒకవేళ అత్యవసరంగా ఛార్జింగ్ కావాల్సి వస్తే, ఫిజికల్ పోర్ట్‌తో సంబంధం లేకుండా వైర్‌లెస్ ఛార్జర్‌ను వాడుకోవచ్చు. ఆధునిక ఐఫోన్, ఆండ్రాయిడ్ ఫోన్లలో ఈ సదుపాయం ఉంటుంది. ఒకవేళ 48 గంటల తర్వాత కూడా అదే వార్నింగ్ వస్తుంటే, వెంటనే ప్రొఫెషనల్ సర్వీస్ సెంటర్‌ను సంప్రదించండి. ముఖ్యంగా సముద్రపు నీరు (ఉప్పు నీరు) తగిలితే మాత్రం ఆలస్యం చేయకుండా నిపుణులకు చూపించడం మేలు.

వర్షాకాలంలో ప్రయాణించేటప్పుడు ఛార్జింగ్ పోర్ట్ డస్ట్ ప్లగ్స్ వాడటం ద్వారా ఇలాంటి సమస్యలను నివారించవచ్చు. భారీ వర్షంలో వెళ్తున్నప్పుడు ఫోన్‌ను వాటర్‌ప్రూఫ్ పౌచ్‌లో ఉంచండి. పోర్ట్‌ను శుభ్రం చేయడానికి ఆల్కహాల్ వైప్స్ లేదా సూదులు వంటి పదునైన వస్తువులను ఎప్పుడూ వాడకండి. ఈ చిన్నపాటి జాగ్రత్తలు పాటిస్తే, వర్షాకాలంలో మీ స్మార్ట్‌ఫోన్ పాడవకుండా సురక్షితంగా ఉంటుంది.