నకిలీ mParivahan APK మెసేజ్‌లతో సైబర్ దాడి! పొరపాటున క్లిక్ చేశారా? వెంటనే చేయాల్సిన పనులివే!

2026 ఆగస్టు 21 నుంచి ఆగస్టు 24 మధ్య దేశవ్యాప్తంగా నకిలీ "mParivahan/RTO e-Challan" APK ఫైళ్లు విపరీతంగా పెరిగిపోయాయి. ఇవి వాట్సాప్ ద్వారా వేగంగా వ్యాపిస్తున్నాయి. ఈ లింక్‌లపై క్లిక్ చేయగానే ఫోన్‌లో సైడ్‌లోడ్ యాప్‌లు ఇన్‌స్టాల్ అయి.. యాక్సెసిబిలిటీ, డివైజ్ అడ్మిన్ పర్మిషన్లను దుర్వినియోగం చేస్తూ ఫోన్‌ను హ్యాక్ చేస్తున్నాయి. దీనివల్ల యూపీఐ పిన్ (UPI PIN) చోరీకి గురవ్వడంతో పాటు లింక్ అయిన డివైజ్‌ల ద్వారా వాట్సాప్ సెషన్లు కూడా సైబర్ నేరగాళ్ల చేతుల్లోకి వెళ్తున్నట్లు బాధితులు పేర్కొంటున్నారు. "RTO Challan.apk", "MParivahan.apk" పేరుతో వచ్చే APK ఫైళ్ల పట్ల జాగ్రత్తగా ఉండాలని CERT-In తీవ్ర హెచ్చరికలు జారీ చేసింది. మిమ్మల్ని భయపెట్టి వెంటనే జరిమానా కట్టించుకునేందుకు.. మీ వాహనం నంబర్‌తో పాటు నకిలీ ఫైన్ అమౌంట్‌ను ఈ మెసేజ్‌లలో పంపుతున్నారు.

పొరపాటున ఆ లింక్ క్లిక్ చేశారా? అయితే వెంటనే ఫోన్‌ను నెట్‌వర్క్ నుంచి డిస్‌కనెక్ట్ చేయండి. ఎయిర్‌ప్లేన్ మోడ్ ఆన్ చేసి, వైఫై ఆఫ్ చేయండి.. అలాగే సిమ్ కార్డును బయటకు తీసేయండి. వెంటనే వాట్సాప్ ఓపెన్ చేసి, లింక్ అయి ఉన్న అన్ని డివైజ్‌ల యాక్సెస్‌ను రద్దు (Revoke) చేయండి. టూ-స్టెప్ వెరిఫికేషన్‌ను ఎనేబుల్ చేసుకోండి. మీ యూపీఐ యాప్‌లోకి వెళ్లి యూపీఐ పిన్‌ను రీసెట్ చేయండి. మీ యూపీఐ ఆటోపే (UPI Autopay) పర్మిషన్లను ఒకసారి సరిచూసుకుని రద్దు చేయండి. ఆ తర్వాత వెంటనే 1930 నంబర్‌కు కాల్ చేసి, నేషనల్ సైబర్ క్రైమ్ రిపోర్టింగ్ పోర్టల్ (NCRP)లో ఫిర్యాదు చేయండి. పోలీసులు మీ డబ్బులను త్వరగా ఫ్రీజ్ చేయడానికి వీలుగా.. ఇటీవల వచ్చిన మెసేజ్‌లు లేదా కాల్స్ వివరాలను నోట్ చేసి ఉంచండి.

ఫేక్ mParivahan e-Challan APK: ఆండ్రాయిడ్ ఫోన్లలో కనిపించే ప్రమాదకర సంకేతాలు

ఫోన్ డిఫాల్ట్ ఎస్ఎమ్‌ఎస్ యాప్ మారినా, లేదా విచిత్రమైన ఓటీపీ ఫార్వార్డర్లు ఉన్నట్లు అనుమానం వచ్చినా అలర్ట్ అవ్వండి. Settings > Accessibility > Installed services కి వెళ్లి యాక్సెసిబిలిటీ సెట్టింగ్స్‌ను ఒకసారి చెక్ చేయండి. Settings > Security > Device admin apps కి వెళ్లి డివైజ్ అడ్మిన్ యాప్‌లను పరిశీలించండి. అలాగే Settings > Apps > Special app access > Install unknown apps లో స్పెషల్ యాప్ యాక్సెస్ పర్మిషన్లను చూడండి. ఏవైనా అపరిచిత వీపీఎన్ (VPN) ప్రొఫైల్స్ ఉంటే అవి ప్రమాదకర సంకేతాలే! అనుమానాస్పద వాట్సాప్ సెషన్‌లను మళ్లీ అన్‌లింక్ చేయండి. ఫోన్‌ను రీబూట్ చేసిన తర్వాత కూడా ఏదైనా సెట్టింగ్ పాత స్థితికి మారితే, మీ డివైజ్ హ్యాక్ అయిందని గ్రహించండి.

ఫేక్ APKని సురక్షితంగా తొలగించే ప్రాసెస్

ఫోన్‌లో ఉన్న ఆ హానికరమైన యాప్‌ను వెంటనే అన్‌ఇన్‌స్టాల్ చేయండి. ఒకవేళ బ్లాక్ అయితే, దాని 'Device admin' పర్మిషన్‌ను తొలగించి, ఆపై మళ్లీ ట్రై చేయండి. కేవలం సిస్టమ్ యాప్‌లు మాత్రమే పనిచేసేలా ఫోన్‌ను 'Safe Mode'లోకి రీబూట్ చేయండి. గూగుల్ ప్లే స్టోర్ ఓపెన్ చేసి, 'Play Protect' ద్వారా ఫుల్ స్కాన్ చేయండి. సమస్య ఇంకా పరిష్కారం కాకపోతే, మీ డేటాను క్లౌడ్‌లో బ్యాకప్ చేసుకుని ఫోన్‌ను 'Factory Reset' చేయండి. అధికారిక యాప్ స్టోర్‌ల నుంచి మాత్రమే నమ్మకమైన యాప్‌లను తిరిగి డౌన్‌లోడ్ చేసుకోండి. రీసెట్ చేయడానికి ముందే వాట్సాప్ చాట్‌లను మ్యాన్యువల్‌గా బ్యాకప్ చేయడం వల్ల మీ డేటా సేఫ్‌గా ఉంటుంది.

సైబర్ దాడికి గురికాకుండా జాగ్రత్తలు.. అధికారిక ఈ-చలానా చెకింగ్ పద్ధతి

బ్రౌజర్‌లు, ఫైల్ మేనేజర్‌లలో 'Install unknown apps' ఆప్షన్‌ను ఆపివేయడం ద్వారా APK సైడ్‌లోడింగ్‌ను డిసేబుల్ చేయండి. ప్లే ప్రొటెక్ట్ (Play Protect), హానికరమైన యాప్‌లను గుర్తించే ఫీచర్లను ఎప్పుడూ ఆన్‌లోనే ఉంచండి. వాట్సాప్‌లో టూ-స్టెప్ వెరిఫికేషన్, స్క్రీన్ లాక్‌లను తప్పనిసరిగా ఆన్ చేసుకోండి. మీ ట్రాఫిక్ చలానాలను కేవలం అధికారిక ఈ-చలానా పోర్టల్ లేదా రాష్ట్ర రవాణా శాఖ వెబ్‌సైట్లలో మాత్రమే వెరిఫై చేయండి. ఇందుకోసం మీ వాహనం నంబర్, డ్రైవింగ్ లైసెన్స్ లేదా చలానా నంబర్‌ను ఉపయోగించవచ్చు. మోసపూరిత కార్యకలాపాలు కనిపిస్తే 1930 హెల్ప్‌లైన్ లేదా NCRP పోర్టల్ ద్వారా ఫిర్యాదు చేయండి. ఆండ్రాయిడ్ కొత్త డెవలపర్ వెరిఫికేషన్ ఫీచర్ కూడా చాలా ఫోన్లలో అనధికార యాప్‌ల ఇన్‌స్టాలేషన్‌ను సమర్థవంతంగా అడ్డుకుంటోంది.