పండగ షాపింగ్ చేస్తున్నారా? ఈ చిన్న తప్పు చేస్తే మీ బ్యాంక్ ఖాతా ఖాళీ అవ్వడం ఖాయం!

పండగ షాపింగ్ జోరుగా సాగుతున్న వేళ, ఆన్‌లైన్ కొనుగోలుదారులకు సైబర్ ముప్పు పొంచి ఉంది. అమెజాన్, ఫ్లిప్‌కార్ట్ సేల్స్ పేరుతో కేటుగాళ్లు నకిలీ (ఫిషింగ్) లింకులను పంపుతూ ఆఫర్ల కోసం చూసేవారిని బురిడీ కొట్టిస్తున్నారు. డెలివరీ ఫెయిల్ అయిందనో, లేదా రీఫండ్ పెండింగ్‌లో ఉందనో ఫేక్ మెసేజ్‌లు పంపి కంగారు పెడుతున్నారు. ఈ లింకులపై క్లిక్ చేస్తే చాలు.. క్షణాల్లో బ్యాంక్ ఖాతాలు ఖాళీ అయిపోతున్నాయి. కాబట్టి, ఈ పండగ సీజన్‌లో తొందరపాటుతో మీ ఆన్‌లైన్ షాపింగ్ ఆనందాన్ని పాడుచేసుకోవద్దు.

డెలివరీ బాయ్స్ లాగా నటిస్తూ కేటుగాళ్లు ఓటీపీ (OTP) అడుగుతుంటారు. పొరపాటున ఈ కోడ్ చెబితే.. మీ బ్యాంక్ అకౌంట్ ఖాళీ అవ్వడం ఖాయం. అంతేకాదు, బిజీగా ఉండే కస్టమర్లను నమ్మించి ఫోన్లలో ప్రమాదకరమైన రిమోట్-యాక్సెస్ యాప్‌లను ఇన్‌స్టాల్ చేయిస్తున్నారు. గుర్తుతెలియని వ్యక్తుల నుంచి వచ్చే ఫోన్ కాల్స్ నమ్మి పాస్‌వర్డ్‌లు చెప్పడం కానీ, యాప్స్ డౌన్‌లోడ్ చేయడం కానీ అస్సలు చేయొద్దు. ఆన్‌లైన్ సేల్స్ సమయంలో అప్రమత్తంగా ఉంటూ మీ కష్టార్జితాన్ని కాపాడుకోండి.

అమెజాన్, ఫ్లిప్‌కార్ట్ సేల్స్ పేరుతో జరిగే మోసాలు ఇవే..

యూపీఐ (UPI) కలెక్ట్ రిక్వెస్ట్‌ల రూపంలో కూడా పెద్ద ఎత్తున మోసాలు జరుగుతున్నాయి. ఆర్డర్ క్యాన్సిల్ అయిందని, దానికి సంబంధించిన రీఫండ్ ఇస్తామంటూ నకిలీ పేమెంట్ లింకులు పంపుతున్నారు. వీటిని క్లిక్ చేసి యూజర్లు పేమెంట్‌ను అప్రూవ్ చేయగానే అకౌంట్ నుంచి డబ్బులు కట్ అయిపోతాయి. ఏ యాప్‌లోనైనా పిన్ (PIN) ఎంటర్ చేసే ముందు లావాదేవీ వివరాలను సరిచూసుకోవడం చాలా ముఖ్యం. గుర్తుతెలియని నంబర్ల నుంచి వచ్చే పేమెంట్ రిక్వెస్ట్‌లను తిరస్కరించడం ద్వారా సురక్షితంగా ఉండొచ్చు.

ఇలాంటి మోసాల బారిన పడకుండా ఉండాలంటే, అధికారిక షాపింగ్ యాప్స్‌లోనే ఆర్డర్ స్టేటస్ చెక్ చేసుకోండి. ఆర్డర్ సమస్యల పరిష్కారం కోసం ఎస్ఎంఎస్ (SMS) ద్వారా వచ్చే లింకులను అస్సలు క్లిక్ చేయొద్దు. వీలైతే క్యాష్ ఆన్ డెలివరీ (COD) ఆప్షన్ ఎంచుకోవడం మరింత సురక్షితం. కస్టమర్ కేర్ ప్రతినిధులు ఎప్పుడూ మీ క్రెడిట్ కార్డ్ పిన్ లేదా ఓటీపీలను అడగరనే విషయం గుర్తుంచుకోండి. ఏదైనా చేసే ముందు మీ అఫీషియల్ ఆర్డర్ హిస్టరీని ఒకసారి చెక్ చేసుకోండి.

ఆన్‌లైన్ షాపింగ్ మోసాలపై ఫిర్యాదు చేయడం ఎలా?

ఒకవేళ మీరు మోసపోయి డబ్బులు పోగొట్టుకుంటే, వెంటనే 1930 హెల్ప్‌లైన్ నంబర్‌కు కాల్ చేసి మీ ట్రాన్సాక్షన్‌ను ఫ్రీజ్ చేయించండి. ఆలస్యం చేయకుండా స్క్రీన్‌షాట్లతో సహా ఆన్‌లైన్‌లో సైబర్ క్రైమ్ ఫిర్యాదును నమోదు చేయండి. సదరు నంబర్లను బ్లాక్ చేసి, మీ బ్యాంక్ కార్డులను సురక్షితం చేసుకోండి. పండగ సీజన్ ఆఫర్ల వెనుక ఉండే ఇలాంటి ముప్పుల నుంచి తప్పించుకోవడానికి అప్రమత్తతే శ్రీరామరక్ష. ఈ సేల్స్ సమయంలో కాస్త జాగ్రత్తగా వ్యవహరించి మీ బ్యాంక్ బ్యాలెన్స్‌ను కాపాడుకోండి.