వర్షాల్లో ఫోన్ నీళ్లలో పడిందా? ఈ తప్పులు చేస్తే మీ డేటా శాశ్వతంగా పోతుంది!

అక్టోబర్ 21 వరకు దక్షిణ భారతదేశంలో పలుచోట్ల భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది. ఈ వర్షాల్లో ఒకవేళ మీ ఫోన్ నీళ్లలో తడిస్తే మాత్రం అస్సలు అలస్యం చేయకండి... ప్రతీ నిమిషం చాలా ముఖ్యం! తడిచిన వెంటనే ఫోన్‌ను స్విచ్ ఆఫ్ చేసి, కవర్ తొలగించండి. స్క్రీన్‌ను అన్‌లాక్ చేయడం గానీ, టచ్ చేయడం గానీ చేయవద్దు. మీరు చేసే చిన్న పొరపాటు వల్ల షార్ట్ సర్క్యూట్ అయ్యి ఫోటోలు, కాంటాక్ట్స్, వాట్సాప్ డేటా శాశ్వతంగా పోయే ప్రమాదం ఉంది.

ఫోన్‌ను ఛార్జింగ్ పెట్టడం, గట్టిగా ఊపడం లేదా బటన్లు నొక్కడం లాంటివి అస్సలు చేయకండి. హెయిర్ డ్రయర్లు, ఒవెన్లు వాడటం వల్ల వేడికి లోపలి సీల్స్ దెబ్బతిని తేమ మరింత లోపలికి వెళ్తుంది. ఇక ఫోన్‌ను బియ్యంలో పెట్టే పాత చిట్కాను పక్కన పెట్టండి... బియ్యంలోని పిండిపదార్థం, ధూళి ఫోన్‌లోకి చేరి మరింత పాడుచేస్తాయి. నీటిలోని ఉప్పు శాతాలు విద్యుత్ ప్రసారానికి దారితీసి కొద్ది గంటల్లోనే ఫోన్ మదర్‌బోర్డ్‌ను తుప్పు పట్టేలా చేస్తాయి. దీనివల్ల ఫోన్ రీస్టార్ట్ అవ్వడం, గోస్ట్ టచ్‌ రావడం, బ్యాటరీ వేగంగా తగ్గిపోవడం లాంటి సమస్యలొస్తాయి.

IMD వర్షాల హెచ్చరికలు: నీళ్లలో తడిసిన ఫోన్‌ను కాపాడుకోండి ఇలా!

ఫోన్‌పై ఉన్న నీటిని టిష్యూ పేపర్ లేదా మైక్రోఫైబర్ గుడ్డతో మెల్లగా తుడవండి. సిమ్ ట్రే, మెమరీ కార్డ్, ఇతర యాక్సెసరీలను వెంటనే తీసేయండి. ఛార్జింగ్ పోర్ట్ కిందికి ఉండేలా ఉంచితే నీరు సులువుగా బయటకు వస్తుంది. ఆ తర్వాత ఒక గాలి ఆడే బాక్స్‌లో ఫోన్‌తో పాటు సిలికా జెల్ ప్యాకెట్లు ఉంచండి. దాదాపు 24 నుంచి 48 గంటల పాటు ఫోన్‌ను అస్సలు తాకకుండా అలానే ఉంచాలి. ఎంత అత్యవసరమైన OTP లేదా కాల్స్ వచ్చినా ఫోన్ ఆన్ చేయకూడదు.

ఫోటోలు, కాంటాక్ట్స్, వాట్సాప్ డేటాను రికవర్ చేయడం ఎలా?

ఫోన్ పని చేయకపోతే వేరే డివైజ్ లేదా కంప్యూటర్ ద్వారా క్లౌడ్ బ్యాకప్‌లను తనిఖీ చేయండి. గూగుల్ ఫోటోస్, డ్రైవ్‌లోకి లాగిన్ అయి ఇటీవల బ్యాకప్ అయిందో లేదో చూడండి. మీ కాంటాక్ట్స్ సాధారణంగా గూగుల్ ఖాతా నుంచే రికవర్ అవుతాయి. ఐఫోన్ వినియోగదారులు ఐక్లౌడ్ ఫోటోస్, డ్రైవ్‌ను చెక్ చేసుకోవచ్చు. మైక్రోసాఫ్ట్ వన్‌డ్రైవ్ వాడేవారు క్యామెరా అప్‌లోడ్ స్టేటస్‌ను సరిచూసుకోండి. వాట్సాప్ విషయానికొస్తే, చివరిగా ఎప్పుడు బ్యాకప్ అయిందో తెలుసుకోండి. ఆండ్రాయిడ్ ఫోన్లకు గూగుల్ డ్రైవ్, ఐఫోన్లకు ఐక్లౌడ్ బ్యాకప్ సదుపాయం ఉంటుంది.

వాట్సాప్ రీస్టోర్: ఆండ్రాయిడ్, ఐఫోన్ వినియోగదారులు గమనించాల్సిన విషయాలు

వేర్వేరు ఆపరేటింగ్ సిస్టమ్‌ల (ఆండ్రాయిడ్, ఐఓఎస్) మధ్య డేటా రీస్టోర్ చేయడానికి కొన్ని పరిమితులు ఉంటాయి. వాట్సాప్ రెండు వేర్వేరు బ్యాకప్‌లను కలపలేదు. డైరెక్ట్ ట్రాన్స్‌ఫర్ చేయాలంటే రెండు ఫోన్లు అన్‌లాక్ అయి, పక్కపక్కనే ఉండాలి. అందుకోసం అధికారిక ట్రాన్స్‌ఫర్ టూల్, ఒకే మొబైల్ నంబర్‌ను ఉపయోగించాలి. తడిసిన ఫోన్ అస్సలు ఆన్ కాకపోతే క్లౌడ్ బ్యాకప్ ఒక్కటే మీకు దిక్కు. ఆండ్రాయిడ్‌లో ఉండే లోకల్ బ్యాకప్ ఇంటర్నల్ స్టోరేజ్‌లో ఉంటుంది కాబట్టి, ఫోన్ పూర్తిగా పాడైతే ఆ డేటాను తిరిగి పొందడం కష్టం.

IP రేటింగ్ నిజాలు.. ఇన్సూరెన్స్ క్లెయిమ్ వివరాలు

ఫోన్ నీళ్లలో మునిగిపోయినా, కెమెరా లెన్స్‌పై మబ్బులా పేరుకుపోయినా లేదా స్పీకర్ సౌండ్ స్పష్టంగా రాకపోయినా వెంటనే సర్వీస్ సెంటర్‌కు తీసుకెళ్లండి. నీటి వల్ల పాడైందని స్పష్టంగా చెప్పి, మదర్‌బోర్డ్ మార్చే ముందే ఆల్ట్రాసోనిక్ క్లీనింగ్ చేయమని అడగండి. ఫోన్‌కు ఉన్న IP67 లేదా IP68 రేటింగ్‌లు కేవలం ల్యాబ్ పరీక్షలకు సంబంధించినవి మాత్రమే, పూర్తి గ్యారెంటీ కాదని గుర్తుంచుకోండి. ఇన్సూరెన్స్ క్లెయిమ్ కోసం సంఘటన వివరాలు, ఫోన్ బిల్లు, IMD వర్షాల అలర్ట్ స్క్రీన్‌షాట్లను సిద్ధం చేసుకోండి. ఆలస్యం చేయకుండా ఇన్సూరెన్స్ క్లెయిమ్ నమోదు చేసి, భవిష్యత్తు కోసం నిరంతరం క్లౌడ్ బ్యాకప్ తీసుకోవడం అలవాటు చేసుకోండి.