పాత ఫోన్ అమ్మేస్తున్నారా? మీ బ్యాంక్ వివరాలు ఇతరులకు చిక్కకుండా ఉండాలంటే ఇలా చేయండి!

ఇండియాలో ఇండిపెండెన్స్ వీక్ సేల్స్ మొదలయ్యాయి. దీంతో పాత స్మార్ట్‌ఫోన్‌లను ఎక్స్ఛేంజ్ చేసే వారి సంఖ్య భారీగా పెరిగింది. అయితే, కేవలం ఫోన్ రీసెట్ చేస్తే మీ డేటా సేఫ్ అని అనుకుంటే పొరపాటే. మీ పర్సనల్, ఫైనాన్షియల్ డేటా ఇతరుల చేతికి చిక్కకుండా ఉండాలంటే కొన్ని జాగ్రత్తలు తప్పనిసరి. డోర్‌స్టెప్ ఎక్స్ఛేంజ్ లేదా స్టోర్‌లో ఫోన్ ఇచ్చే ముందు ఈ టిప్స్ ఫాలో అవ్వండి.

ముందుగా మీ డేటాను గూగుల్ డ్రైవ్ లేదా ఐక్లౌడ్‌లో బ్యాకప్ తీసుకోండి. వాట్సాప్ చాట్స్, మీడియా కూడా క్లౌడ్‌లో సింక్ అయ్యాయో లేదో ఒకసారి చెక్ చేసుకోండి. ఆ తర్వాత మీ గూగుల్ లేదా యాపిల్ ఐడీ నుంచి మాన్యువల్‌గా సైన్ అవుట్ అవ్వండి. ఇలా చేయడం వల్ల 'ఫ్యాక్టరీ రీసెట్ ప్రొటెక్షన్' (FRP) డిసేబుల్ అవుతుంది, లేదంటే ఫోన్ కొనేవారికి ఇబ్బంది కలగవచ్చు.

ఫోన్ ఎక్స్ఛేంజ్ చేసే ముందు బ్యాంకింగ్, UPI భద్రత ముఖ్యం

మీ ఫోన్‌లో అన్నిటికంటే ముఖ్యమైనది బ్యాంకింగ్ డేటా. అందుకే అన్ని బ్యాంకింగ్ యాప్స్ నుంచి లాగ్ అవుట్ అవ్వండి, మీ UPI అకౌంట్‌లను డీ-లింక్ చేయండి. బ్రౌజర్‌లోని ఆటో-ఫిల్ సెట్టింగ్స్ నుంచి సేవ్ చేసిన క్రెడిట్ కార్డ్ వివరాలను కూడా తొలగించండి. మీ పాత ఫోన్ ద్వారా ఎవరూ మీ డబ్బును దొంగిలించకుండా ఉండాలంటే ఈ స్టెప్స్ చాలా కీలకం.

సిమ్ కార్డ్, మైక్రో ఎస్‌డీ కార్డ్‌లను తీయడం మర్చిపోవద్దు. అలాగే సెట్టింగ్స్‌లోకి వెళ్లి యాక్టివ్‌గా ఉన్న ఈ-సిమ్ (eSIM) ప్రొఫైల్స్‌ను డిలీట్ చేయండి. ఒకవేళ మీ ఆండ్రాయిడ్ ఫోన్ చాలా పాతదైతే, రీసెట్ చేసే ముందు డేటాను 'ఎన్‌క్రిప్ట్' చేయండి. దీనివల్ల ఎవరైనా మీ డేటాను రికవరీ చేయడానికి ప్రయత్నించినా అది వారికి అర్థం కాదు.

ఆండ్రాయిడ్, ఐఫోన్ డేటా క్లీన్ చేయడానికి ఫైనల్ చెక్‌లిస్ట్

ఎక్స్ఛేంజ్ ప్రక్రియ పూర్తయ్యాక, మీ కొత్త ఫోన్ నుంచి పాత సెషన్లను రివోక్ (Revoke) చేయండి. వాట్సాప్, గూగుల్ సెక్యూరిటీ సెట్టింగ్స్‌లోకి వెళ్లి పాత ఫోన్ యాక్సెస్‌ను తొలగించండి. భవిష్యత్తులో అవసరమైతే మీ ఫోన్ గుర్తింపు కోసం IMEI నంబర్ ఉన్న రసీదును జాగ్రత్తగా ఉంచుకోండి. ఈ జాగ్రత్తలు పాటిస్తే మీ కొత్త స్మార్ట్‌ఫోన్ జర్నీ సేఫ్‌గా మొదలవుతుంది.