జేబులో ఫోన్ పేలిందా? ఈ చిన్న తప్పులే మీ ప్రాణాలకు ముప్పు, వెంటనే ఇలా చేయండి!

గ్రేటర్ నోయిడాలో ఒకరి ప్యాంట్ జేబులోనే ఫోన్ పేలిపోయిన ఘటన దేశవ్యాప్తంగా తీవ్ర కలకలం సృష్టిస్తోంది. ప్రయాణంలో ఉన్న సమయంలో ప్యాంట్ పాకెట్‌లో ఉన్న స్మార్ట్‌ఫోన్ ఒక్కసారిగా తీవ్రంగా వేడెక్కి, మంటలు వ్యాపించాయి. చుట్టుపక్కల ఉన్నవారు వెంటనే స్పందించి ఆ బాధితుడికి సాయం చేశారు. తీవ్రంగా గాయపడిన అతడిని చికిత్స కోసం ఆస్పత్రికి తరలించారు. ఈ ప్రమాదానికి అసలు కారణమేంటనేది ఇంకా అధికారికంగా తేలనప్పటికీ, మొబైల్ బ్యాటరీల భద్రత విషయంలో ఎంత జాగ్రత్తగా ఉండాలో ఈ ఘటన మరోసారి గుర్తుచేస్తోంది.

మీ జేబులో ఉన్న ఫోన్ ఒక్కసారిగా వేడెక్కుతున్నట్లు అనిపిస్తే, మెటల్ భాగాలను తాకకుండా వెంటనే దాన్ని బయటకు తీయండి. ఫోన్ నుంచి పొగలు వస్తుంటే.. బట్టలు, పెట్రోల్ లేదా ఇతర ద్రవాలకు దూరంగా మంటలు అంటుకోని నేల లేదా ఉపరితలంపై ఉంచండి. ముఖ్యంగా వర్షాకాలంలో గాలిలో తేమ శాతం ఎక్కువగా ఉండటం వల్ల ఛార్జింగ్ పోర్టుల్లోకి నీటి చుక్కలు చేరి షార్ట్ సర్క్యూట్ అయ్యే అవకాశముంది. మీ ఫోన్‌లో 'Charging Paused' లేదా 'Moisture Detected' అని వార్నింగ్ మెసేజ్ వస్తే, దాన్ని అస్సలు నిర్లక్ష్యం చేయకండి. ఛార్జింగ్ కేబుల్‌ను బలవంతంగా పోర్ట్‌లోకి తోసే ప్రయత్నం చేయవద్దు.

మొబైల్ వినియోగదారులు తప్పక తెలుసుకోవాల్సిన కీలక బ్యాటరీ భద్రతా నియమాలు

ఇప్పటి స్మార్ట్‌ఫోన్లలో వాడే లిథియం బ్యాటరీలు అతిగా వేడెక్కకుండా ఉండాలంటే సరైన జాగ్రత్తలు తీసుకోవడం అవసరం. వోల్టేజ్‌లో వ్యత్యాసాలు రాకుండా ఉండేందుకు ఎల్లప్పుడూ 'బ్యూరో ఆఫ్ ఇండియన్ స్టాండర్డ్స్' (BIS) ధ్రువీకరించిన ఛార్జింగ్ అడాప్టర్లనే వాడాలి. ఛార్జింగ్ కేబుల్ పాడైపోయిందా? పిన్స్ లోపల వైర్లు కట్ అయ్యాయా లేదా దుమ్ము, జేబులోని దారాలు ఏమైనా పేరుకుపోయాయా? అనేది క్రమం తప్పకుండా చెక్ చేసుకోవాలి. వైర్‌లెస్ ఛార్జింగ్ ఉపయోగిస్తున్నప్పుడు ఫోన్ కవర్‌కు ఉన్న మెటల్ రింగ్స్ లేదా మాగ్నెటిక్ కేస్‌లను తీసివేయడం మంచిది. లేదంటే హీట్ ఎక్కువగా ప్రొడ్యూస్ అయి ప్రమాదానికి దారితీస్తుంది.

ఫోన్ పేలితే పరిహారం పొందేందుకు క్లెయిమ్ నమోదు ఇలా..

ఒకవేళ మీ ఫోన్ వేడెక్కి పేలడం లేదా కాలిపోవడం లాంటి ప్రమాదం జరిగితే.. నష్టపరిహారం క్లెయిమ్ చేయడానికి తగిన ఆధారాలు భద్రపరుచుకోవాలి. ఫోన్ కొనుగోలు చేసిన ఒరిజినల్ బిల్లు (ఇన్‌వాయిస్), IMEI నంబర్‌ను సురక్షితంగా ఉంచుకోండి. దెబ్బతిన్న ఫోన్, కాలిపోయిన దుస్తులు, శరీరానికి అయిన గాయాలను స్పష్టంగా ఫొటోలు తీసి పెట్టుకోండి. ఫోన్‌ను సర్వీస్ సెంటర్‌లో ఇచ్చే సమయంలో తప్పనిసరిగా ఆఫీషియల్ వర్క్ టికెట్ (జాబ్ షీట్) అడిగి తీసుకోవడం మర్చిపోవద్దు.

సర్వీస్ సెంటర్‌లో మీ సమస్య పరిష్కారం కాకపోతే, నేరుగా నేషనల్ కన్స్యూమర్ హెల్ప్‌లైన్ (National Consumer Helpline) పోర్టల్‌ ద్వారా ఫిర్యాదు చేయవచ్చు. సకాలంలో అధికారులకు సమాచారం ఇవ్వడం వల్ల వినియోగదారుల హక్కులు కాపాడబడటమే కాకుండా, తయారీ లోపాలు ఉన్న హార్డ్‌వేర్ బ్యాచ్‌లపై అధికారులు తగిన చర్యలు తీసుకోవడానికి వీలవుతుంది. ఛార్జింగ్, నిర్వహణ విషయంలో సరైన భద్రతా నియమాలు పాటించడం వల్ల అనుకోని ప్రమాదాలను అరికట్టడంతో పాటు మీ వ్యక్తిగత భద్రతను కూడా కాపాడుకోవచ్చు.