శామ్‌సంగ్ యూజర్లకు గుడ్‌న్యూస్! గ్యాలరీలోనే గూగుల్ ఫొటోస్ బ్యాకప్.. ఎలా ఎనేబుల్ చేయాలో తెలుసా?

భారత్‌లోని శామ్‌సంగ్ గెలాక్సీ స్మార్ట్‌ఫోన్ యూజర్లకు గుడ్‌న్యూస్! సెప్టెంబర్ 18–19 నుంచి 'గూగుల్ ఫొటోస్' (Google Photos) బ్యాకప్ సదుపాయం నేరుగా శామ్‌సంగ్ గ్యాలరీ యాప్‌లోనే అందుబాటులోకి వస్తోంది. గ్యాలరీ సెట్టింగ్స్‌లోకి వెళ్తే కొత్తగా 'సింక్ ఫొటోస్ అండ్ వీడియోస్' (Sync photos and videos) అనే ఆప్షన్ కనిపిస్తుంది. దీని ద్వారా గ్యాలరీని నేరుగా మీ గూగుల్ అకౌంట్‌తో లింక్ చేసుకుని క్లౌడ్ బ్యాకప్ పొందవచ్చు. ప్రస్తుతం ఈ ఫీచర్ దశలవారీగా రోలవుట్ అవుతోంది. ఇక శామ్‌సంగ్ గ్యాలరీలో 'వన్‌డ్రైవ్' (OneDrive) సేవలు 2026 సెప్టెంబర్ 30తో ముగియనున్నందున, ఇప్పటినుంచే ఈ కొత్త ఆప్షన్‌కి మారడం మంచిది.

ఈ ఫీచర్‌ను ఎనేబుల్ చేయడానికి Gallery > Menu > Settings > Sync photos and videos ఆప్షన్‌కి వెళ్లాలి. ఈ సదుపాయం కోసం ఫోన్‌లో ఆండ్రాయిడ్ 13 లేదా ఆపై వర్షన్ ఓఎస్ ఉండాలి. అలాగే శామ్‌సంగ్ గ్యాలరీ వర్షన్ 15.9.01.7, గ్యాలరీ క్లౌడ్ సింక్ వర్షన్ 1.6.09.31కి అప్‌డేట్ చేసిన తర్వాతే ఈ టోగుల్ కనిపిస్తుంది. డివైజ్, రీజియన్ లేదా అకౌంట్‌ను బట్టి ఈ ఫీచర్ లభ్యత మారవచ్చు. ఒకవేళ మీ ఫోన్‌లో ఇది కనిపించకపోతే, గెలాక్సీ స్టోర్ నుంచి యాప్స్ అప్‌డేట్ చేసి, ఫోన్ రీస్టార్ట్ చేసి చూడండి. అకౌంట్ లింక్ అయిన తర్వాత గ్యాలరీలోనే 'గూగుల్ స్టోరేజ్ మీటర్' కూడా కనిపిస్తోంది.

శామ్‌సంగ్ గ్యాలరీ నుంచి గూగుల్ ఫొటోస్‌కి ఎలా సింక్ చేయాలి? (స్టెప్-బై-స్టెప్ ప్రాసెస్)

ముందుగా గ్యాలరీ యాప్ ఓపెన్ చేసి, మెనూ > సెట్టింగ్స్ > సింక్ ఫొటోస్ అండ్ వీడియోస్ ఎంచుకోండి. ఆ తర్వాత మీ గూగుల్ అకౌంట్‌లో సైన్ ఇన్ అవ్వండి. కెమెరా, స్క్రీన్‌షాట్స్ వంటి ఏయే ఫోల్డర్లు బ్యాకప్ అవ్వాలో సెలెక్ట్ చేసుకోండి. మొబైల్ డేటా వృథా కాకుండా ఉండటానికి 'వై-ఫై' మాత్రమే ఎంచుకుని, ఫోన్ ఛార్జింగ్‌లో ఉన్నప్పుడు సింక్ చేయండి. తొలిసారి బ్యాకప్ చేసేటప్పుడు స్టోరేజ్ సైజ్ ఎంత ఉందో చెక్ చేసుకోండి. డూప్లికేట్ అప్‌లోడ్లను నివారించడానికి గూగుల్ ఫొటోస్ యాప్‌లో ఉన్న ఇన్-బిల్ట్ బ్యాకప్‌ను ఆఫ్ చేయడం మంచిది. సింక్ జరుగుతున్నంత సేపు గ్యాలరీ యాప్‌ను ఫోర్స్ క్లోజ్ చేయకండి.

డూప్లికేట్స్ నివారణ, ఫొటోల డెలిషన్ మరియు రికవరీ సీక్రెట్స్!

బ్యాకప్ మరియు డెలిషన్స్ రెండూ రెండు యాప్‌లలోనూ సింక్ అవుతాయి. అంటే గ్యాలరీలో లేదా గూగుల్ ఫొటోస్‌లో ఏదైనా ఫొటోను డెలీట్ చేస్తే అది రెండింటిలోనూ డిలీట్ అయిపోతుంది. అయితే 'ప్రైవేట్ ఆల్బమ్' విషయంలో కాస్త జాగ్రత్తగా ఉండాలి. సింక్ అయిన ఫొటోను ప్రైవేట్ ఆల్బమ్‌లోకి మూవ్ చేస్తే దాని క్లౌడ్ బ్యాకప్ కాపీ శాశ్వతంగా డెలీట్ అవుతుంది, అది ట్రాష్ (Trash) ఫోల్డర్‌కి కూడా వెళ్లదు. ఫొటోలు ఎడిట్ చేసినప్పుడు ఒరిజినల్, ఎడిటెడ్ కాపీలు రెండూ వేర్వేరుగా సేవ్ అవుతాయి. గూగుల్ ఫొటోస్ ట్రాష్‌లోని ఐటమ్స్ 30 రోజుల తర్వాత ఆటోమేటిక్‌గా డిలీట్ అవుతాయి కాబట్టి అవసరమైన వాటిని ఆలోపే రికవర్ చేసుకోవడం మేలు.

స్టోరేజ్ మేనేజ్‌మెంట్.. గూగుల్ ఫొటోస్ బ్యాకప్ కోసం సూపర్ టిప్స్

గూగుల్ ఉచిత అకౌంట్‌తో 15GB షేర్డ్ స్టోరేజ్ మాత్రమే లభిస్తుంది. కాబట్టి ఫొటోలు, వీడియోలు ఎక్కువగా ఉంటే గూగుల్ వన్ (Google One) ప్లాన్స్ తీసుకోవాల్సి ఉంటుంది. పెద్ద మొత్తంలో ఫొటోలు మొదటిసారి సింక్ చేసేటప్పుడు మొబైల్ డేటా కాకుండా వై-ఫై వాడటం ఉత్తమం. భద్రత కోసం ఎస్‌డీ కార్డ్ లేదా పీసీలో ఒక లోకల్ బ్యాకప్ కాపీ ఉంచుకోవడం మంచిది. మీరు ఇప్పటికీ వన్‌డ్రైవ్ ఉపయోగిస్తుంటే.. 2026 సెప్టెంబర్ 30 నాటికి ఒరిజినల్ ఫొటోలను డౌన్‌లోడ్ చేసుకుని, నేరుగా వన్‌డ్రైవ్ యాప్‌కి మారండి. దీనివల్ల మీ బ్యాకప్‌కు ఎలాంటి ఆటంకం ఉండదు. గూగుల్ వన్ ప్లాన్స్‌తో టెరాబైట్ల కొద్దీ స్టోరేజ్ పొందవచ్చు, దీనిని ఫ్యామిలీ మెంబర్స్‌తో కూడా షేర్ చేసుకోవచ్చు.