వాట్సాప్ డెస్క్‌టాప్ యూజర్లకు హెచ్చరిక! ఈ ఒక్క ఫైల్ క్లిక్ చేస్తే మీ కంప్యూటర్ హ్యాకర్ల చేతుల్లోకి!

భారతీయ వాట్సాప్ యూజర్లకు అలర్ట్! డెస్క్‌టాప్ యూజర్లను టార్గెట్ చేస్తూ హ్యాకర్లు ప్రమాదకరమైన 'VBScript (VBS)' మాల్వేర్‌ను వ్యాప్తి చేస్తున్నారు. మీ స్నేహితుల హ్యాక్ అయిన అకౌంట్ల ద్వారా నకిలీ ఇన్‌వాయిస్‌లు, బ్యాంక్ స్టేట్‌మెంట్‌లను పంపిస్తూ బురిడీ కొట్టిస్తున్నారు. ఇలాంటి అనుమానాస్పద ఫైళ్లను పొరపాటున కూడా ఓపెన్ చేయకండి. ఒక్క క్లిక్ చేస్తే చాలు.. క్షణాల్లో మీ కంప్యూటర్ మొత్తం హ్యాకర్ల చేతుల్లోకి వెళ్లిపోతుంది.

ల్యాప్‌టాప్‌లు, పర్సనల్ కంప్యూటర్లలో (PC) పని చేసే వారే లక్ష్యంగా ఈ సైబర్ దాడి జరుగుతోంది. ఈ ఫైల్‌ను డౌన్‌లోడ్ చేయగానే, బ్యాక్‌గ్రౌండ్‌లో కొన్ని సైలెంట్ స్క్రిప్ట్‌లు రన్ అవుతాయి. ఇవి మీ బ్రౌజర్ కుకీలను దొంగిలించి, మీ సోషల్ మీడియా, ఇతర అకౌంట్లను హ్యాక్ చేస్తాయి. ఈ దాడి నుంచి తప్పించుకోవడానికి, వెంటనే మీ వాట్సాప్ లింక్డ్ డివైజ్‌లన్నింటి నుంచి లాగౌట్ అవ్వండి. మీ ఫోన్ సెట్టింగ్స్‌లోకి వెళ్లి కనెక్ట్ అయి ఉన్న సెషన్లను ఒకసారి సరిచూసుకోండి.

వాట్సాప్ డెస్క్‌టాప్/వెబ్ VBScript మాల్వేర్ బారిన పడకుండా ఉండడం ఎలా?

కొన్ని చిన్న జాగ్రత్తలు పాటిస్తే ఈ మాల్వేర్ బారిన పడకుండా సులభంగా తప్పించుకోవచ్చు. ముఖ్యంగా.vbs,.vbe లేదా.lnk ఎక్స్‌టెన్షన్లతో వచ్చే ఫైళ్ల పట్ల చాలా అప్రమత్తంగా ఉండాలి. వింత షార్ట్‌కట్‌లు లేదా అనుమానాస్పద పేర్లతో ఉండే జిప్ ఫైళ్లను అస్సలు డౌన్‌లోడ్ చేయొద్దు. మీ స్నేహితుల నుంచి అడగకుండానే ఏదైనా ఫైల్ వస్తే, వెంటనే వారికి ఫోన్ చేసి కనుక్కోండి. ఒకవేళ పొరపాటున క్లిక్ చేసినట్లయితే, డేటా లీక్ కాకుండా ఉండటానికి వెంటనే మీ ఇంటర్నెట్ కనెక్షన్‌ను కట్ చేయండి.

మీ కంప్యూటర్‌లో మాల్వేర్ పూర్తిగా తొలగిపోవడానికి మరికొన్ని జాగ్రత్తలు అవసరం. మీ స్టార్టప్ టాస్క్‌లు (Startup Tasks), డౌన్‌లోడ్స్ ఫోల్డర్‌ను చెక్ చేసి, తెలియని యాప్స్ ఏవైనా ఉంటే డిలీట్ చేయండి. మీ డివైజ్‌లో గూగుల్ ప్లే ప్రొటెక్ట్ ఆన్‌లో ఉందో లేదో చూసుకోండి. ఒకవేళ ఏదైనా ఆర్థిక మోసం జరిగితే, వెంటనే జాతీయ సైబర్ క్రైమ్ హెల్ప్‌లైన్ నంబర్ 1930 కి కాల్ చేయండి. అలాగే ప్రభుత్వ అధికారిక వెబ్‌పోర్టల్‌లో కూడా ఫిర్యాదు చేయవచ్చు.

ఆన్‌లైన్‌లో సురక్షితంగా ఉండాలంటే నిరంతరం అప్రమత్తంగా ఉండడం చాలా ముఖ్యం. మీ వాట్సాప్ మొబైల్ యాప్‌లో టూ-స్టెప్ వెరిఫికేషన్ (Two-step verification) ఎనేబుల్ చేసుకోండి. మీ ప్రొఫైల్‌లో ఏదైనా తేడా కనిపిస్తే, వెంటనే మీ కాంటాక్ట్స్‌లో ఉన్నవారిని అలర్ట్ చేయండి. ఈ చిన్నపాటి జాగ్రత్తలు సైబర్ నేరగాళ్ల బారిన పడకుండా మిమ్మల్ని కాపాడతాయి. సకాలంలో స్పందిస్తే మీ బ్యాంక్ అకౌంట్లు, వ్యక్తిగత చాట్‌లు సురక్షితంగా ఉంటాయి.