ఆన్‌లైన్‌‌ ఆర్డర్‌కి బిజెపిలో చేరేందుకు లింకేంటి,లబోదిబోమన్న కస్టమర్ !

అటు కుటుంబానికి, ఇటు తనకు

కలకత్తాకు చెందిన ఓ ఫుట్‌బాల్‌ అభిమానికి ఫుట్‌బాల్‌ పట్ల అమితమైన ప్రేమ ఉంది. అయితే తన అభిమానం ఇంట్లో వాళ్లని ఇబ్బందికి గురి చేస్తుందనే విషయాన్ని గుర్తించిన అతను అటు కుటుంబానికి, ఇటు తనకు ఏఇబ్బందీ లేకుండా మ్యాచ్‌లనుఎంజాయ్‌ చేయాలనుకున్నాడు.

హెడ్‌ఫోన్‌కు బదులుగా ఒక హెయిర్‌ ఆయిల్‌ డబ్బా..

ఇందుకు రెండు టీవీ హెడ్‌సెట్‌లను ప్రముఖ ఆన్‌లైన్‌ పోర్టల్‌ ద్వారా ఆర్డర్‌ చేశాడు. అయితే ఆ ప్యాకేజి అతను ఇంట్లో లేని సమయంలో ప్యాకేజి ఇంటికి రావడంతో ఆ మరుసటి రోజు అతడు ఆ ప్యాకేజి విప్పి చూశాడు. ఎంతో ఆసక్తిగా తన హెడ్‌ఫోన్‌కోసం ఎదురు చూసిన ఆ అభిమాని బాక్స్‌లో ఉన్నదాన్ని చూసి ఒక్కసారిగా షాక్ తిన్నాడు. హెడ్‌ఫోన్‌కు బదులుగా ఒక హెయిర్‌ ఆయిల్‌ డబ్బా దర్శనమిచ్చింది.

బీజేపీ ప్రాథమిక సభ్యత్వానికి స్వాగతం

దీంతో బాధితుడు బాక్స్‌మీద ఉన్న టోల్‌ ఫ్రీకి (1800) ఫోన్‌ చేశాడు. ఫోన్‌ రింగ్‌ ఒకసారి మ్రోగి.. డిస్‌ కనెక్ట్‌ అయింది. ఆ వెంటనే బీజేపీ ప్రాథమిక సభ్యత్వానికి స్వాగతం అన్న సందేశం వచ్చింది. అయోమయంలోంచి తేరుకోకుండానే బాధితుడు అదే నెంబర్‌కు మళ్లీ డయల్‌ చేశాడు. సేమ్‌ ఎస్‌ఎంఎస్‌ రిపీట్‌.

వాళ్ల స్నేహితులతో షేర్‌ చేస్తే

ఇక ఈ విషయాన్ని వాళ్ల స్నేహితులతో షేర్‌ చేస్తే.. వాళ్లు ఇదే అనుభవాన్ని పంచుకున్నారు. అయితే వారి సలహా మేరకు కంపెనీకి చెందిన అసలైన టోల్‌ ఫ్రీ నెంబరు తెలుసుకుని తన ఫిర్యాదు నమోదు చేశాడు.

మా దగ్గర హెడ్‌ఫోన్‌ సెట్‌ ఒకటి మాత్రమే

ఇంకా ఆసక్తికర అంశం ఏంటంటే ఆయిల్‌ కావాలంటే వాడుకోండి..లేదంటే అవతల పారేయండి. దురదృష్టవశాత్తూ మా దగ్గర హెడ్‌ఫోన్‌ సెట్‌ ఒకటి మాత్రమే ఉంది. రెండో దానికి డబ్బులు వాపస్‌ చేస్తామంటూ షాపింగ్ పోర్టల్ నుండి కాల్‌ వచ్చిందట..

నూనె సీసాను బీరువాలో భద్రంగా దాచిపెట్టి..

దీంతో ఈ మొత్తం వ్యవహారంతో తెల్లబోయిన బాధితుడు మాత్రం మళ్లీ ఆన్‌లైన్‌ పోర్టల్‌ వాళ్లు వచ్చి ఆదే బాటిల్‌ వాపస్‌ ఇవ్వమంటే ఎలా అనుకుంటూ.. నూనె సీసాను బీరువాలో భద్రంగా దాచిపెట్టి... ఫుల్‌బాల్‌ మ్యాచ్‌లను మ్యూట్‌లోనే వీక్షిస్తున్నాడుట.

ఈ వ్యవహారంపై స్పందించిన ఆన్‌లైన్‌ పోర్టల్‌

మరోవైపు ఈ వ్యవహారంపై స్పందించిన ఆన్‌లైన్‌ పోర్టల్‌ కస్టమర్‌ కేర్‌ ప్రతినిధి ..అసలు 1800నెంబరు తమకు చెందినది కాదనీ.. మోసగాళ్ల వలలో పడి విలువైన సమాచారాన్ని షేర్‌ చేయొద్దంటూ కోరారు. అలాగే అంశాన్ని తమ పై అధికారుల దృష్టికి తీసుకెళ్లనున్నట్టు చెప్పారు.