ఐఫోన్ 16e యూజర్లకు మ్యాగ్‌సేఫ్ కట్.. ఎందుకో చెప్పేసిన యాపిల్?

iPhone 16e: యాపిల్ కంపెనీ రీసెంట్‌గా ఐఫోన్ 16e అనే కొత్త ఫోన్‌ను రిలీజ్ చేసింది. ఇది చాలా తక్కువ ధరలో లభించే ఐఫోన్. ఈ ఫోన్‌లో లేటెస్ట్ A18 చిప్‌తో పాటు యాపిల్ ఇంటెలిజెన్స్ సపోర్ట్ కూడా ఉంది. కానీ, కొత్త ఐఫోన్లలో ఉండే కొన్ని ముఖ్యమైన ఫీచర్లు మాత్రం ఇందులో మిస్సయ్యాయి. డైనమిక్ ఐలాండ్, అల్ట్రా-వైడ్‌బ్యాండ్ (UWB) కనెక్టివిటీ, మ్యాగ్‌సేఫ్ వైర్‌లెస్ ఛార్జింగ్ వంటి ఫీచర్లు ఇందులో లేవు.

వీటిలో మ్యాగ్‌సేఫ్ లేకపోవడం గురించే ఇప్పుడు అందరూ ఎక్కువగా మాట్లాడుకుంటున్నారు. మ్యాగ్‌సేఫ్ ఫీచర్‌ను ఎందుకు తీసేశారో ఇప్పుడు స్వయంగా యాపిల్ కంపెనీనే చెప్పింది. ఐఫోన్ 16e ఫోన్‌ను మెయిన్‌గా ఎవరి కోసం అయితే తయారు చేశారో, వాళ్లలో చాలామంది వైర్ ఛార్జింగ్‌కే ఎక్కువ ఇష్టపడతారని యాపిల్ తెలిపింది.

బడ్జెట్ యూజర్లు మ్యాగ్‌సేఫ్‌ను చాలా తక్కువగా వాడతారని, చాలామంది యూజర్లు ఫోన్‌ను ఛార్జింగ్ కేబుల్‌తోనే ఛార్జ్ చేసుకుంటారని, అప్పుడప్పుడు మాత్రమే క్యూఐ (Qi) వైర్‌లెస్ ఛార్జింగ్‌ను యూజ్ చేస్తారని చెప్పింది. పెద్దగా ఎవరికి దీనివల్ల ఉపయోగం ఉండదు కాబట్టి దీని రిమూవ్ చేసినట్లు వివరించింది.

* ఐఫోన్ 16e నుంచి మ్యాగ్‌సేఫ్‌ను ఎందుకు తీసేసింది..

టెక్ రివ్యూయర్ జాన్ గ్రుబెర్, ఐఫోన్ 16e రివ్యూ చేస్తూ మ్యాగ్‌సేఫ్ లేకపోవడం గురించి చెప్పారు. ఆ తర్వాత యాపిల్ కంపెనీ ప్రతినిధులు ఆయనతో మాట్లాడుతూ, ఈ ఫోన్‌ను టార్గెట్ చేసిన యూజర్లు వైర్‌లెస్ ఛార్జింగ్‌పై అంతగా ఆధారపడరని, అందుకే మ్యాగ్‌సేఫ్‌ను తీసేశామని చెప్పినట్లు ఆయన కన్ఫర్మ్ చేశారు.

ఈ ఫోన్ యూజర్లు ఎక్కువగా కేబుల్ ద్వారానే ఛార్జ్ చేసుకోవడానికి ఇష్టపడతారట. అందుకే ఐఫోన్ 16eలో పాత లైట్నింగ్ పోర్ట్‌ను తీసేసి, కొత్త USB టైప్-C పోర్ట్‌ను పెట్టారు. వైర్‌లెస్ ఛార్జింగ్ మాత్రం సపోర్ట్ చేస్తుంది కానీ, మామూలు క్యూఐ స్టాండర్డ్ ద్వారా మాత్రమే. దీంతో ఛార్జింగ్ స్పీడ్ కూడా తక్కువగానే ఉంటుంది.

* మ్యాగ్‌సేఫ్ లేకపోతే వైర్‌లెస్ ఛార్జింగ్ స్లో..

మ్యాగ్‌సేఫ్ లేకపోవడం వల్ల ఐఫోన్ 16e ఫోన్‌ను క్యూఐ ఛార్జర్ యూజ్ చేసి వైర్‌లెస్‌గా ఛార్జ్ చేస్తే 7.5W స్పీడ్‌తోనే అవుతుంది. అదే మామూలు ఐఫోన్ 16, ఇంకా కాస్త ఎక్కువ ధర ఉన్న ఐఫోన్ 16 ప్రో మోడల్స్‌లో మ్యాగ్‌సేఫ్ ఉంటుంది. వాటిలో వైర్‌లెస్ ఛార్జింగ్ స్పీడ్ 15W, 25W వరకు ఉంటుంది.

మ్యాగ్‌సేఫ్‌లో బిల్ట్-ఇన్ మాగ్నెట్స్ ఉంటాయి కాబట్టి, ఛార్జర్ ఫోన్‌కు గట్టిగా అతుక్కుంటుంది. దీంతో ఛార్జింగ్ ఎఫెక్టివ్‌గా, ఎలాంటి ఇబ్బంది లేకుండా అవుతుంది. ఐఫోన్ 16e మొబైల్ కొనుగోలు చేసేవారు ఈ విషయాన్ని గమనించాలి. దీనివల్ల తమకు భవిష్యత్తులో ఎలాంటి ఇబ్బంది ఎదురవుతుందో గుర్తించాలి.

* మ్యాగ్‌సేఫ్ యాక్సెసరీలు, ఫీచర్లు ఉండవు

ఐఫోన్ 12తో మ్యాగ్‌సేఫ్ వచ్చినప్పటి నుంచి దీనికోసం మాగ్నెటిక్ వాలెట్స్, బ్యాటరీ ప్యాక్స్, స్టాండ్స్ వంటి చాలా యాక్సెసరీలు వచ్చాయి. మ్యాగ్‌సేఫ్ ఉంటే స్టాండ్‌బై మోడ్ అనే ఫీచర్ కూడా వస్తుంది. ఫోన్‌ను అడ్డంగా ఛార్జర్‌పై పెట్టినప్పుడు స్క్రీన్‌పై ఉపయోగకరమైన సమాచారం కనిపిస్తుంది. ఐఫోన్ 16e యూజర్లకు ఈ ఫీచర్లన్నీ అందుబాటులో ఉండవు.

* ఐఫోన్ 16e ధర, ఇతర ఆప్షన్లు

ఇండియాలో ఐఫోన్ 16e 128GB మోడల్ ధర రూ.59,900 నుంచి స్టార్ట్ అవుతుంది. 2023లో వచ్చిన ఐఫోన్ 15 ధర రూ.69,900 ఉంది కానీ, అమెజాన్‌లో దాదాపు రూ.61,499లకే దొరుకుతోంది. కొత్త ఐఫోన్ 16లో మ్యాగ్‌సేఫ్ ఫీచర్ ఉంది, దీని ధర రూ.79,900 కానీ, అమెజాన్‌లో రూ.72,400కు అందుబాటులో ఉంది.