ఆపిల్ మెగా ఈవెంట్ ఫిక్స్: ఐఫోన్ 18 ప్రో, ఫోల్డబుల్ ఆల్ట్రా రాకపై క్లారిటీ.. భారత్‌లో ప్రీ-ఆర్డర్లు ఎప్పుడంటే?

ఆపిల్ ప్రేమికులు ఆసక్తిగా ఎదురుచూస్తున్న ఆపిల్ మెగా ఈవెంట్ తేదీ ఖరారైంది. సెప్టెంబర్ 9న భారత కాలమానం ప్రకారం రాత్రి 10:30 గంటలకు "సర్ ప్రైజ్ అండ్ షైన్" (Surprise and Shine) ఈవెంట్‌ను నిర్వహించనున్నట్లు ఆపిల్ ఇన్విటేషన్లను విడుదల చేసింది. ఈ క్రమంలో భారతీయ యూజర్లు కొత్త ఐఫోన్ల ప్రీ-ఆర్డర్లు ఎప్పుడు ప్రారంభమవుతాయి? ఇండియాలో ధర ఎంత ఉండొచ్చు? అలాగే విక్రయాల తేదీలు, ప్రచారంలో ఉన్న ఫోల్డబుల్ ‘ఐఫోన్ ఆల్ట్రా’కు సంబంధించిన సమాచారం కోసం ముమ్మరంగా శోధిస్తున్నారు. ఈవెంట్ స్ట్రీమింగ్‌కు ముందే ఆపిల్ లిస్టింగ్స్, విశ్వసనీయ నివేదికల ఆధారంగా లభించిన తాజా వివరాలు మీకోసం..

సాధారణంగా ఆపిల్ సెప్టెంబర్ ఈవెంట్ ముగిసిన తర్వాత వచ్చే మొదటి శుక్రవారం నుంచి భారత్‌లో ప్రీ-ఆర్డర్లు ప్రారంభమవుతాయి. ఈ లెక్కన సెప్టెంబర్ 11న ప్రీ-ఆర్డర్లు షురూ అయ్యే అవకాశం ఉంది. గతేడాది ఇండియాలో సాయంత్రం 5:30 గంటలకు ప్రీ-ఆర్డర్లు ప్రారంభించగా, ఈసారి కూడా అదే సమయాన్ని కొనసాగించవచ్చని భావిస్తున్నారు. ఈవెంట్ లైవ్ స్ట్రీమ్‌తో పాటు ఆపిల్ న్యూస్‌రూమ్ పోస్ట్‌లో ఈ విషయమై అధికారిక ప్రకటన రానుంది. దీనికి సంబంధించిన యూట్యూబ్ లైవ్‌స్ట్రీమ్ లింక్ ఇప్పటికే అందుబాటులోకి వచ్చింది.

ఆపిల్ సెప్టెంబర్ 9 ఈవెంట్ టైమింగ్స్, ఐఫోన్ 18 ప్రో, ఫోల్డబుల్ ఆల్ట్రా వివరాలు

ఈ కార్యక్రమంలో ఐఫోన్ 18 ప్రో (iPhone 18 Pro), ప్రో మాక్స్ (Pro Max) మోడళ్లు ప్రధాన ఆకర్షణగా నిలవనున్నాయి. ఇక ఎప్పటినుంచో ప్రచారంలో ఉన్న ఫోల్డబుల్ ఐఫోన్ ఆల్ట్రాను ఈ వేదికపైనే ఆపిల్ పరిచయం చేయనున్నట్లు తెలుస్తోంది. ఈ ఫోన్‌ను తెరిచినప్పుడు (Unfolded) ఐపాడ్ తరహా ఇంటర్‌ఫేస్‌తో పాటు పక్కపక్కనే రెండు యాప్‌లను వాడుకునే వెసులుబాటు ఉంటుందని బ్లూమ్‌బెర్గ్ తెలిపింది. అయితే 18 ప్రో మోడళ్లతో పోలిస్తే, ఈ ఫోల్డబుల్ ఫోన్ స్టాక్ పరిమితంగానే అందుబాటులో ఉండే అవకాశం ఉందని, దశలవారీగా విక్రయానికి రానుందని విశ్లేషకులు భావిస్తున్నారు.

భారత్‌లో ప్రీ-ఆర్డర్లు, ఐఫోన్ ధరలు, బ్యాంక్ ఆఫర్లు

ఈవెంట్ ముగిసిన వెంటనే 'ఆపిల్ స్టోర్ ఇండియా'లో అధికారిక ఎమ్ఆర్‌పీ (MRP) వివరాలు ప్రత్యక్షమవుతాయి. ఇన్స్టంట్ క్యాష్‌బ్యాక్, నో-కాస్ట్ ఈఎమ్‌ఐ (No-cost EMI), ఫైనాన్స్ ఆఫర్ల కోసం ఆపిల్ వెబ్‌సైట్‌లోని 'వేస్ టు బై' (Ways to Buy) ఆప్షన్‌ను పరిశీలించవచ్చు. ప్రస్తుతం కొన్ని ఐఫోన్ మోడళ్లపై రూ.5,000 వరకు ఇన్స్టంట్ క్యాష్‌బ్యాక్ లభిస్తోంది. మీ పాత ఫోన్ ఎక్స్ఛేంజ్ వ్యాల్యూ అంచనా వేయడానికి 'ఆపిల్ ట్రేడ్ ఇన్'ను ఉపయోగించవచ్చు. కొత్త మోడళ్లు లాంచ్ అయ్యే సమయంలో పాత ఫోన్ల ఎక్స్ఛేంజ్ ధరలు కాస్త తగ్గే అవకాశం ఉందని గమనించగలరు.

ఆపిల్ బికెసి, సాకేత్ స్టోర్లలో లభ్యత, డెలివరీ సమయం

స్టోర్ల వద్ద క్యూ లైన్లలో నిలబడకుండా ఉండాలనుకుంటే, ఆన్‌లైన్‌లో ప్రీ-ఆర్డర్ చేసుకుని ముంబైలోని 'ఆపిల్ బికెసి' (Apple BKC) లేదా ఢిల్లీలోని 'ఆపిల్ సాకేత్' (Apple Saket) స్టోర్లలో స్వయంగా ఫోన్ పిక్-అప్ చేసుకోవచ్చు. ఆపిల్ పిక్-అప్ ప్రాసెస్ చాలా సులభంగా ఉంటుంది. అంతేకాకుండా స్టోర్ పేజీలలో ఏ టైమ్ స్లాట్ ఖాళీగా ఉందో కూడా చెక్ చేసుకోవచ్చు. గతంలో కొత్త ఐఫోన్లు లాంచ్ అయినప్పుడు బికెసి స్టోర్ వద్ద భారీ క్యూ లైన్లు కనిపించాయి. ఇక మొదటి విడతలో ఆర్డర్ చేసిన వారికి భారత్‌లో సాధారణంగా 3 నుంచి 7 రోజుల్లో డెలివరీ పూర్తవుతుంది.

ముందే చెక్ చేసుకోవాల్సిన అంశాలు: 5G బ్యాండ్లు, ఈ-సిమ్, ఛార్జర్

కొత్త ఫోన్ కొనేముందు భారతదేశంలో కీలకమైన 5G బ్యాండ్ల (ముఖ్యంగా n78; జియో వాడే n28, n258) సపోర్ట్ ఉందో లేదో సరిచూసుకోండి. పూర్తి స్పెసిఫికేషన్లు వచ్చాక ఆపిల్ సెల్యులార్ కాంపాటబిలిటీ పేజీలో మోడల్‌ వారీగా బ్యాండ్ వివరాలను చెక్ చేయవచ్చు. జియో లేదా ఎయిర్‌టెల్ వినియోగదారులు ముందే ఈ-సిమ్ (eSIM) ట్రాన్స్‌ఫర్ కోసం సిద్ధమవ్వడం మేలు. అలాగే ఐఫోన్ బాక్స్‌లో ఛార్జర్ లభించదు కాబట్టి, సపరేట్‌గా USB-C అడాప్టర్ కొనుగోలు చేయడానికి కొంత బడ్జెట్ కేటాయించుకోవాల్సి ఉంటుంది.