హువావే పురా ఎక్స్: ఇదేం ఫోల్డబుల్ ఫోన్ రా బాబు.. 50MP కెమెరా, మడత పెడితే ఇంత వెడల్పుగా మారుతోంది!

Huawei Pura X Foldable: హువావే కంపెనీ చైనాలో కొత్త రకం ఫోల్డబుల్ ఫోన్ తీసుకొచ్చింది. దీని పేరు "పురా ఎక్స్ (Pura X)". ఇది మూతలా తెరుచుకునే డిజైన్‌తో వస్తోంది. శాంసంగ్ గెలాక్సీ Z ఫ్లిప్ 6, మోటారోలా రేజర్ 50 అల్ట్రా ఫోన్ల లాగా పొడుగ్గా కాకుండా, ఇది కాస్త వెడల్పుగా ఉంది. సాధారణంగా ఫోన్లు పొడవుగా ఉంటే నిలువుగా పట్టుకుని వాడటానికి బాగుంటాయి.

కానీ ఈ ఫోన్ వెడల్పుగా ఉండటం వల్ల అడ్డంగా, నిలువుగా ఎలా పట్టుకున్నా వాడటానికి చాలా సౌకర్యవంతంగా ఉంటుంది. ఈ హువావే పురా X ఫోన్ ధర చైనాలో 7,499 యువాన్ల (దాదాపు రూ.89,534) నుంచి మొదలవుతుంది. ఈ ఫోన్ ఎరుపు, ఆకుపచ్చ, తెలుపు, బూడిద, నలుపు రంగుల్లో లభిస్తుంది.

* వేరియంట్ల వారీగా ధరలు..
చైనాలో విమాల్ అనే వెబ్‌సైట్‌లో మార్చి 21 నుంచి అమ్మకాలు మొదలవుతాయి. 12GB RAM + 256GB స్టోరేజ్ వేరియంట్ ధర 7,499 యువాన్లు (దాదాపు రూ.89,534). 12GB RAM + 512GB స్టోరేజ్ వేరియంట్ రూ.7,999 యువాన్ల (దాదాపు రూ.95,547)కు లభిస్తుంది.

16GB RAM + 512GB స్టోరేజ్ వేరియంట్ ధర 8,999 యువాన్లు (దాదాపు రూ.1,07,446). టాప్-ఎండ్ వేరియంట్ విషయానికి వస్తే, 16GB RAM + 1TB స్టోరేజ్‌తో వస్తుంది. దీని ధర 9,999 యువాన్లు, అంటే మన డబ్బుల్లో దాదాపు రూ.1,19,386.

* డిజైన్ అదిరింది..
హువావే పురా X చూడటానికి చిన్నగా ఉన్నా, వెడల్పుగా ఉంటుంది. ఫోన్ తెరిచినప్పుడు పొడవు 143.2 mm, వెడల్పు 91.7 mm ఉంటుంది. మడత పెడితే 91.7 mm పొడవు, 74.3 mm వెడల్పుకు కుంచించుకుపోతుంది. శాంసంగ్ గెలాక్సీ Z ఫ్లిప్ 6 పొడవుగా ఉంటుంది కానీ ఇది అంత వెడల్పుగా ఉండదు.

* డిస్‌ప్లే, పనితీరు..
లోపల 6.3 అంగుళాల OLED డిస్‌ప్లే ఇచ్చారు. 2120 x 1320 రిజల్యూషన్‌తో పిక్చర్లు చాలా క్లారిటీగా ఉంటాయి. స్క్రీన్ రిఫ్రెష్ రేట్ 1Hz-120Hz మధ్య ఉంటుంది. అంటే పనిని బట్టి స్క్రీన్ వేగం మారుతూ ఉంటుంది. టచ్ చేస్తే వెంటనే ప్రతిస్పందిస్తుంది. వెలుతురు బాగా వచ్చే చోట కూడా స్క్రీన్ చాలా స్పష్టంగా కనిపిస్తుంది.

బయట వైపు చిన్న 3.5 అంగుళాల OLED స్క్రీన్ కూడా ఉంది. ఈ ఫోన్ హువావే కంపెనీ సొంత ఆపరేటింగ్ సిస్టమ్ హార్మోనీ OS 5.0.1తో పనిచేస్తుంది. దీంట్లో (డీప్‌సీక్, హువావే పంగు (DeepSeek, Huawei Pangu) లాంటి కొత్త టెక్నాలజీలు కూడా ఉన్నాయి.

* స్టోరేజ్, కెమెరాలు
గేమ్స్ ఆడటానికి, చాలా యాప్స్ ఒకేసారి వాడటానికి వీలుగా 16GB వరకు RAM ఇచ్చారు. ఫొటోలు, వీడియోలు, ఏవైనా ఫైల్స్ దాచుకోవడానికి 1TB వరకు స్టోరేజ్ ఉంది. సెల్ఫీల కోసం ముందు వైపు 10.7MP కెమెరా ఇచ్చారు. వెనుకవైపు మూడు కెమెరాలు ఉన్నాయి.

వాటిలో రెండు ముఖ్యమైనవి 50MP మెయిన్ కెమెరా (ఆప్టికల్ ఇల్యూషన్ స్టెబిలైజేషన్), 40MP అల్ట్రా-వైడ్ యాంగిల్ కెమెరా, అలాగే 8MP టెలిఫొటో కెమెరా దూరంగా ఉన్న వాటిని జూమ్ చేసినా పిక్చర్ క్వాలిటీ తగ్గకుండా ఫొటోలు తీస్తుంది. వెనక కెమెరాలు కూడా ఫొటోలు షేక్ అవ్వకుండా ఉండే ఫీచర్‌తో వస్తాయి.

* బ్యాటరీ, ఛార్జింగ్
హువావే పురా X ఫోన్‌లో 4,720mAh బ్యాటరీ ఉంది. ఇది చాలా సేపు వస్తుంది. అంతేకాదు, 66W ఫాస్ట్ వైర్డ్ ఛార్జింగ్, 40W వైర్‌లెస్ ఛార్జింగ్ సపోర్ట్ చేస్తుంది. ఈ ఫోన్ నీళ్లలో పడ్డా, దుమ్ము పడ్డా పాడవకుండా ఉంటుంది (IPX8 రేటింగ్). Wi-Fi, బ్లూటూత్, NFC, NavIC లాంటి ఫీచర్లు కూడా ఉన్నాయి.

అసలు హైలైట్ ఫీచర్ ఏంటంటే "AI టెలిపోర్టేషన్". దీంతో మీరు చేతులతో గాలిలో సైగలు చేస్తూనే పాటలు, ఫొటోలు, వీడియోలు ఒక ఫోన్ నుంచి ఇంకో ఫోన్‌కి పంపించొచ్చు. ఇప్పుడైతే ఈ ఫోన్ చైనాలోనే రిలీజ్ చేశారు. ఇండియాలో ఎప్పుడు వస్తుందో ఇంకా చెప్పలేదు. కానీ త్వరలోనే వేరే దేశాల్లో కూడా రిలీజ్ చేస్తారేమో చూడాలి.