సెప్టెంబర్ 24న మివి వన్ 5G లాంచ్: రూ.15 వేల లోపు బడ్జెట్‌లో అదిరిపోయే ఫీచర్లు, ఆఫర్లు!

ప్రముఖ భారతీయ ఆడియో బ్రాండ్ 'మివి' (Mivi) స్మార్ట్‌ఫోన్ రంగంలోకి అడుగుపెడుతోంది. సెప్టెంబర్ 24న తమ తొలి 5G స్మార్ట్‌ఫోన్ 'మివి వన్ 5G' (Mivi One 5G)ని భారత్‌లో లాంచ్ చేయనుంది. ఆండ్రాయిడ్ 16, క్వాల్‌కామ్ స్నాప్‌డ్రాగన్ 5G ప్రాసెసర్‌తో పాటు బర్గండీ, బ్లూ, గ్రీన్ కలర్ వేరియంట్లలో ఈ ఫోన్ రానున్నట్లు కంపెనీ టీజ్ చేసింది. ప్రముఖ ఈ-కామర్స్ సైట్ ఫ్లిప్‌కార్ట్ ద్వారా మాత్రమే ఇది సేల్‌కు రానుంది. అక్టోబర్ 8న ప్రారంభమయ్యే ఫ్లిప్‌కార్ట్ 'బిగ్ బిలియన్ డేస్' ముందే ఈ ఫోన్ ఎంట్రీ ఇస్తుండటంతో బ్యాంక్ ఆఫర్లు, ఎక్స్ఛేంజ్ డిస్కౌంట్లతో మరింత తక్కువ ధరకే లభించే అవకాశం ఉంది.

బడ్జెట్ వినియోగదారుల నమ్మకాన్ని గెలుచుకునేందుకు మివి ఆఫ్టర్-సేల్స్ సేవలపై ప్రత్యేక శ్రద్ధ పెట్టింది. ఈ ఫోన్‌లో 50-మెగాపిక్సెల్ ప్రైమరీ కెమెరాతో కూడిన డ్యూయల్ కెమెరా సెటప్ ఉండనుంది. అలాగే 'మివి కేర్+' (Mivi Care+) సర్వీస్ ప్రోగ్రామ్‌ను కూడా పరిచయం చేస్తోంది. దీని ద్వారా ఏడాది స్టాండర్డ్ వారంటీ, 7 రోజుల రిప్లేస్‌మెంట్ గ్యారెంటీ, 500కు పైగా ఆథరైజ్డ్ సర్వీస్ సెంటర్లు, 19,000 పిన్ కోడ్లలో పికప్ అండ్ రిటర్న్ సదుపాయం కల్పిస్తోంది. ఫోన్ రిపేర్ స్టేటస్ ట్రాక్ చేయడానికి ఫోన్‌లో 'మివి కేర్' యాప్ ముందుగానే ఇన్‌స్టాల్ అయి ఉంటుంది.

మివి వన్ 5G లాంచ్ డేట్, అంచనా ధర, స్పెసిఫికేషన్లు

రూ.15,000 లోపు ధరలో మెరుగైన 5G ఫోన్‌ను అందించడమే లక్ష్యంగా మివి అడుగులు వేస్తోంది. ఈ ఫోన్‌లో 'క్వాల్‌కామ్ స్నాప్‌డ్రాగన్ 5G' చిప్‌సెట్ ఉంటుందని కంపెనీ స్పష్టం చేసింది. అయితే లీకుల ప్రకారం ఇందులో స్నాప్‌డ్రాగన్ 4 జెన్ 2 ప్రాసెసర్, 6,000mAh బ్యాటరీ, 120Hz ఎల్‌సిడి డిస్‌ప్లే ఉండే అవకాశం ఉంది. గేమింగ్, రోజంతా ఆన్‌లైన్ క్లాసులకు ఇది సరిగ్గా సరిపోతుంది. పూర్తిగా భారతదేశంలోనే తయారైన (Made in India) ఈ మివి వన్ 5G ఫోన్ సేల్స్ ఫ్లిప్‌కార్ట్‌ వేదికగా జరగనున్నాయి.

రూ.12 వేల నుంచి రూ.15 వేల బడ్జెట్‌లో వీటికి పోటీ: రెడ్‌మీ, రియల్‌మీ, మోటో, లావా

రూ.15 వేల లోపు రేంజ్‌లో ఇప్పటికే ఉన్న పోటీదారులకు గట్టి పోటీ ఇవ్వాలంటే మివి సరైన ధరతో పాటు మంచి పెర్ఫార్మెన్స్ అందించాల్సి ఉంటుంది. మార్కెట్‌లో ఇప్పటికే ఉన్న రెడ్‌మీ, రియల్‌మీ, మోటో, లావా ఫోన్‌లు భారీ బ్యాటరీలతో ఆకట్టుకుంటున్నాయి. మివి కూడా కెమెరా క్వాలిటీ, క్లీన్ సాఫ్ట్‌వేర్ అనుభవాన్ని అందించగలిగితే ఈ విభాగంలో బలమైన పోటీదారుగా నిలిచే అవకాశం ఉంది.

పండుగ సీజన్ సేల్స్ ఆఫర్లు మివికి మరింత ప్లస్ అయ్యేలా ఉన్నాయి. ఒకవేళ మివి వన్ 5G ఫోన్ ధర రూ.13,999 నుంచి రూ.14,999 మధ్య ఉంటే.. బిగ్ బిలియన్ డేస్ 10 శాతం బ్యాంక్ డిస్కౌంట్‌తో ఇది రూ.12,599 నుంచి రూ.13,499 కే లభించవచ్చు. దానికి తోడు ఎక్స్ఛేంజ్ ఆఫర్లు కూడా తోడైతే ఈ ఫోన్ రూ.10,000 నుంచి రూ.12,000 బడ్జెట్‌లోనే కొనుగోలుదారుల చేతికి వచ్చే అవకాశం ఉంది. కాబట్టి సెప్టెంబర్ 24న జరిగే లాంచ్‌లో బ్యాటరీ సైజ్, ఛార్జింగ్ స్పీడ్, ఆండ్రాయిడ్ అప్‌డేట్స్ పాలసీ వివరాలను తెలుసుకున్నాకే కొనుగోలుపై ఒక నిర్ణయానికి రండి.