E, 3G, H, H+, G..ఈ నెట్‌వర్క్ సిగ్నల్స్‌ అర్థమేంటి..?

2జీ ఇంటర్నెట్

వైర్‌లెస్ కమ్యూనిషన్ ప్రసారాలకు ఉపయోగించిన రెండవ తరం టెక్నాలజీనే 2జీ నెట్‌వర్క్‌గా పిలుస్తారు. ఎస్ఎంఎస్, ఎంఎంఎస్ వంటి డేటా సర్వీసులను ఈ నెట్‌‌వర్క్ మొబైల్ ఫోన్‌లకు అందిస్తుంది. 2జీ నెట్‌వర్క్ గరిష్ట వేగం సెకనుకు 50 kilobitsగా ఉంటుంది. ఈ స్పీడులో ఇంటర్నెట్ బ్రౌజింగ్ చాలా నెమ్మదిగా ఉంటుంది. 

G లేదా GPRSను 2.5జీ అని కూడా పిలుస్తారు

జీపీఆర్ఎస్ (జనరల్ ప్యాకెట్ రేడియ్ సర్వీస్)ను 2.5జీ అని కూడా పిలవటం జరుగుతోంది. ఈ నెట్‌వర్క్ స్పీడ్ సెకనుకు 114 కేబీపీఎస్ వరకు ఉంటుంది. ఈ స్పీడ్‌లో వెబ్ పేజీలు చాలా నెమ్మదిగా ఓపెన్ అవుతాయి. ఇన్‌స్టెంట్ మెసేజింగ్ వేగంగా ఉంటుంది.

E or EDGE

EDGE (ఎన్‌హాన్సుడ్ డేటా రేట్స్ ఫర్ జీఎస్ఎమ్ ఎవల్యూషన్) నెట్‌వర్క్, ఇతర నెట్‌వర్క్‌లతో పోలిస్తే 3 రెట్లు వేగంగా స్పందిస్తుంది. ఈ నెట్‌వర్క్ సపోర్ట్ స్పీడ్ సెకనుకు 217కేబీపీఎస్‌గా ఉంటుంది. నిరుత్సాహపరిచే విషయం ఎంటంటే ఈ స్పీడులో తక్కువ రిసల్యూషన్ వీడియోలు సైతం ఓపెన్ అవ్వవు.

3G

3జీ నెట్‌వర్క్ అనేది యూనివర్శల్ మొబైల్ టెలీకమ్యూనికేషన్స్ సర్వీస్ స్టాండర్డ్స్ ఆధారంగా డిజైన్ కాబడింది. ఈ నెట్‌వర్క్ స్పీడ్ సెకనుకు 384 కేబీపీఎస్‌గా ఉంటుంది. ఈ స్పీడులో ఆన్‌లైన్ వీడియోలతో పాటు మ్యూజిక్ స్ట్రీమింగ్‌ను అంతరాయం లేకుండా ఆస్వాదించవచ్చు. ప్రపంచవ్యాప్తంగా అత్యధికంగా ఉపయోగించబడుతోన్న నెట్‌వర్క్‌‌లలో 3జీ ఒకటి.

H స్టాండర్డ్ అంటే..?

H స్టాండర్డ్ అనేది HSPA+ (హైస్పీడ్ ప్యాకెట్ యాక్సెస్) ఆధారంగా స్పందిస్తుంది. ఈ నెట్‌వర్క్ స్పీడ్ 7.2 ఎంబీపీఎస్‌గా ఉంటుంది. ఈ నెట్‌వర్క్ స్పీడులో యూట్యూబ్ వీడియోలతో పాటు వెబ్ బ్రౌజింగ్‌ను హైక్వాలిటీతో ఆస్వాదించవచ్చు. సినిమాలను సైతం అలవోకగా డౌన్‌లోడ్ చేసుకోవచ్చు.

H+ స్టాండర్డ్ అంటే..?

H+ స్టాండర్డ్ HSPA+ (హైస్పీడ్ ప్యాకెట్ యాక్సెస్) ఆధారంగా స్పందిస్తుంది. ఈ నెట్‌వర్క్ స్పీడ్ 168.8 ఎంబీపీఎస్‌గా ఉంటుంది. వేగవంతమైన ఇంటర్నెట్‌ను ఈ నెట్‌వర్క్ పరిధిలో ఆస్వాదించవచ్చు.

4G LTE

ప్రస్తుత అందుబాటులో ఉన్న అన్ని మొబైల్ నెట్‌వర్క్‌లలో 4G LTEతీ ఫాస్టెస్ట్ నెట్‌వర్క్‌‌గా చెప్పుకోవచ్చు. 4G నెట్‌వర్క్ గరిష్ట వేగం సెకనుకు 1Gbpsగా ఉంటుంది. భవిష్యత్‌లో 1Tbpsను సపోర్ట్ చేసే అవకాశం. ఈ నెట్‌వర్క్ స్పీడులో హైక్వాలిటీ వెబ్‌బ్రౌజింగ్‌ను ఆస్వాదించవచ్చు.