6000mAh బ్యాటరీ, 50MP కెమెరా, స్నాప్‌డ్రాగన్ 8 ఎలైట్‌తో వన్‌ప్లస్ 13 మినీ.. ధర, స్పెసిఫికేషన్లు లీక్‌!

OnePlus 13 Mini: వన్‌ప్లస్ (OnePlus) కంపెనీ తన వన్‌ప్లస్ 13 సిరీస్‌ను మరింత విస్తరించేందుకు సిద్ధమవుతున్నట్లు వార్తలు వస్తున్నాయి. ఈసారి మార్కెట్లోకి "వన్‌ప్లస్ 13 మినీ (OnePlus 13 Mini)" పేరుతో ఒక సరికొత్త చిన్న సైజు ఫ్లాగ్‌షిప్ ఫోన్‌ను తీసుకురాబోతోందని సమాచారం. ఇప్పటికే ఈ సిరీస్‌లో ఖరీదైన మోడల్‌గా వన్‌ప్లస్ 13, మిడ్‌-రేంజ్ వేరియంట్‌గా వన్‌ప్లస్ 13R లాంచ్ అయిన విషయం తెలిసిందే.

ఇప్పుడు, చిన్న సైజులో ఉంటూనే పవర్‌ఫుల్ ఫీచర్లు కావాలనుకునే వారి కోసం వన్‌ప్లస్ ఈ మినీ మోడల్‌ను తెస్తున్నట్లు తెలుస్తోంది. లీకుల ప్రకారం, ఈ OnePlus 13 Mini అదిరిపోయే స్పెసిఫికేషన్లు, భారీ బ్యాటరీతో చిన్న స్మార్ట్‌ఫోన్ల విభాగంలోనే కొత్త ట్రెండ్ సెట్ చేయగలదని అంటున్నారు.

* ఎప్పుడు రావచ్చు? ధర ఎంత ఉండొచ్చు? (అంచనా)

ఈ వన్‌ప్లస్ 13 మినీ ఫోన్ ముందుగా చైనాలో 2025 ఏప్రిల్ చివరి నాటికి విడుదల కావొచ్చని, ఆ తర్వాత మే నెలలో భారతదేశంలో కూడా అడుగుపెట్టే అవకాశం ఉందని అంచనా వేస్తున్నారు. అయితే, ప్రపంచవ్యాప్తంగా ఇతర దేశాలలో ఇది అందుబాటులోకి వస్తుందా లేదా అనే దానిపై ఇంకా స్పష్టత లేదు.

* ధర

ఇది చైనాలో 3,099 యువాన్లు (సుమారు రూ.37,000) లోపు ఉండొచ్చని ఊహాగానాలు వినిపిస్తున్నాయి. కానీ, ఈ ఫోన్‌ను భారతదేశంలో విడుదల చేస్తారా లేదా అనే విషయాన్ని వన్‌ప్లస్ కంపెనీ ఇంకా అధికారికంగా ప్రకటించలేదు. వన్‌ప్లస్ చివరిసారిగా 2022లో వన్‌ప్లస్ 10T అనే కాంపాక్ట్ ఫోన్‌ను ఇండియాలో రూ.49,999 ధరకు విడుదల చేసింది.

* స్పెసిఫికేషన్లు, ఫీచర్లు ఎలా ఉండొచ్చు? (అంచనా)

వన్‌ప్లస్ 13 మినీ ఫోన్‌లో క్వాల్‌కమ్ స్నాప్‌డ్రాగన్‌ 8 ఎలైట్ చిప్‌సెట్‌ ను ఉపయోగించే అవకాశం ఉంది. ఇదే ప్రాసెసర్‌ను ప్రస్తుతం మార్కెట్‌లోని టాప్ ఆండ్రాయిడ్ ఫ్లాగ్‌షిప్ ఫోన్‌లలో వాడుతున్నారు. కాబట్టి, గేమింగ్, మల్టీటాస్కింగ్, రోజువారీ పనుల కోసం అత్యుత్తమ పనితీరును ఆశించవచ్చు. ఈ ఫోన్ ఆండ్రాయిడ్ 15 ఆధారిత OxygenOS 15 ఆపరేటింగ్ సిస్టమ్‌తో రానుంది.

* డిస్‌ప్లే

ఇందులో 6.31-అంగుళాల LTPO OLED ఫ్లాట్ స్క్రీన్ ఉండొచ్చని సమాచారం. ఇది 1.5K రిజల్యూషన్, 120Hz రిఫ్రెష్ రేట్‌తో వస్తుంది. పేరుకు "మినీ" అయినా, ఈ స్క్రీన్ సైజు ఫోన్‌ను చేతిలో ఇమిడిపోయేలా ఉంచుతూనే, వాడటానికి సౌకర్యంగా ఉండేలా మంచి బ్యాలెన్స్‌ను అందిస్తుంది. ఒంటి చేత్తో వాడటానికి ఇది చాలా అనువుగా ఉంటుంది.

* కెమెరాలు

వన్‌ప్లస్ 13 మినీలో డ్యూయల్-కెమెరా సిస్టమ్ ఉండొచ్చు. ఇందులో 50MP ప్రైమరీ సెన్సార్ (OIS), 2x ఆప్టికల్ జూమ్ అందించే 50MP టెలిఫోటో లెన్స్ ఉంటాయి. ఇందులో మూడో కెమెరా/అల్ట్రా-వైడ్ ఉండకపోవచ్చు. కానీ ఈ రెండు కెమెరాలతోనే నాణ్యమైన ఫోటోలు, మంచి జూమ్ సామర్థ్యాన్ని అందించడమే లక్ష్యంగా పెట్టుకున్నట్లు తెలుస్తోంది.

* హైలైట్ బ్యాటరీనే

ఇందులో ఏకంగా 6,000mAh భారీ బ్యాటరీ ఉండొచ్చని గట్టిగా వినిపిస్తోంది. ఇది స్టాండర్డ్ వన్‌ప్లస్ 13, 13R మోడళ్ల కంటే కూడా పెద్దది. ఇలాంటి చిన్న ఫోన్లలో ఇంత పెద్ద బ్యాటరీ ఉండటం చాలా అరుదు. అంతేకాకుండా, ఈ ఫోన్ 80W వైర్డ్ ఛార్జింగ్, 50W వైర్‌లెస్ ఛార్జింగ్‌కు కూడా సపోర్ట్ చేస్తుందని అంచనా.

* డిజైన్, ఇతర ఫీచర్లు

వన్‌ప్లస్ 13 మినీ డిజైన్ విషయంలో ఐఫోన్ 16 సిరీస్ స్ఫూర్తితో వస్తుండొచ్చని లీక్స్ సూచిస్తున్నాయి. కెమెరా మాడ్యూల్ నిలువుగా పిల్-ఆకారంలో లేదా అడ్డంగా ఉండొచ్చని చిత్రాలు చూపిస్తున్నాయి. అలాగే వన్‌ప్లస్ ఫోన్లలో ప్రత్యేకంగా ఉండే అలర్ట్ స్లైడర్ స్థానంలో, ఐఫోన్ 15 ప్రో సిరీస్‌లో ఉన్నట్లుగా ఒక యాక్షన్ బటన్ రావొచ్చని అంటున్నారు.

ఇది నిజంగా జరిగితే, వన్‌ప్లస్ ఫోన్ల డిజైన్‌లో ఇది ఒక కీలకమైన మార్పు అవుతుంది. వన్‌ప్లస్ 13 మినీ మార్కెట్‌లో iQOO 13 వంటి పెద్ద ఫ్లాగ్‌షిప్ ఫోన్లకు, చివరికి సొంత వన్‌ప్లస్ 13కి కూడా గట్టి పోటీ ఇచ్చే అవకాశం ఉంది. అయితే, ఇవన్నీ ప్రస్తుతానికి అంచనాలు, లీకుల ఆధారంగా వస్తున్న వార్తలే. వన్‌ప్లస్ కంపెనీ అధికారికంగా ధృవీకరించే వరకు ఈ వివరాలను కచ్చితమైన సమాచారంగా భావించకూడదు.