16GB RAMతో వన్‌ప్లస్ 13s కొత్త వేరియంట్ లాంచ్.. గేమింగ్, బ్యాటరీలో ఇది రారాజు!

ప్రముఖ స్మార్ట్‌ఫోన్ బ్రాండ్ వన్‌ప్లస్.. తన కాంపాక్ట్ మోడల్ ‘వన్‌ప్లస్ 13s’లో కొత్తగా 16GB RAM + 512GB స్టోరేజ్ వేరియంట్‌ను భారత్‌లోకి తీసుకొచ్చింది. దీని ధరను ₹68,999గా నిర్ణయించింది. ఈ కొత్త వేరియంట్ సేల్స్ ఇప్పటికే అమెజాన్, వన్‌ప్లస్ స్టోర్‌లలో ప్రారంభమయ్యాయి. ఎంపిక చేసిన బ్యాంక్ కార్డులపై రూ.2,000 వరకు ఇన్‌స్టంట్ డిస్కౌంట్ కూడా లభిస్తోంది. ఈ ఫోన్ బ్లాక్ వెల్వెట్, గ్రీన్ సిల్క్, పింక్ శాటిన్ రంగుల్లో నేటి (సెప్టెంబర్ 19) నుంచి అందుబాటులో ఉంది.

సెప్టెంబర్ 18 నుంచే అందుబాటులోకి వచ్చిన ఈ కొత్త స్టోరేజ్ ఆప్షన్‌తో పాటు.. 12GB/256GB (ధర ₹54,999), 12GB/512GB (ధర ₹59,999) వేరియంట్లు కూడా లభిస్తున్నాయి. ఇక ఆంధ్రప్రదేశ్, తెలంగాణ కస్టమర్ల కోసం వన్‌ప్లస్ ప్రత్యేకంగా 'అష్యూర్డ్ డెలివరీ'ని అందిస్తోంది. ఎంపిక చేసిన నగరాల్లో షిప్పింగ్ అయిన ఒక రోజులోనే డెలివరీ అవుతుంది. మిగిలిన ప్రాంతాలకు ప్రయారిటీ డెలివరీ ద్వారా 2 నుంచి 4 రోజుల్లో డోర్ డెలివరీ చేస్తారు. చెక్‌అవుట్ సమయంలో మీ పిన్‌కోడ్‌కు ఈ సౌకర్యం ఉందో లేదో చూసుకోవచ్చు.

వన్‌ప్లస్ 13s (16GB RAM) ధర, ఆఫర్ల వివరాలు

బ్యాంక్ డిస్కౌంట్ ఆఫర్‌ను ఉపయోగిస్తే ఈ 16GB/512GB మోడల్‌ను రూ.66,999లకే సొంతం చేసుకోవచ్చు. HDFC, ICICI, కోటక్, IDFC ఫస్ట్, ఇండస్‌ఇండ్ బ్యాంక్ కార్డులపై ఈ ఇన్‌స్టంట్ డిస్కౌంట్ వర్తిస్తుందని గ్యాడ్జెట్స్ 360 పేర్కొంది. ఒకవేళ చెక్‌అవుట్ వద్ద అష్యూర్డ్ డెలివరీ ఆప్షన్ కనిపిచకపోతే, ప్రయారిటీ షిప్పింగ్ వర్తిస్తుంది. దీనిద్వారా డిస్పాచ్ అయిన 2 నుంచి 4 రోజుల్లో ఫోన్ మీ చేతికి అందుతుంది.

స్నాప్‌డ్రాగన్ 8 ఎలైట్ పెర్ఫార్మెన్స్.. గేమింగ్ టెస్ట్ వివరాలు

వన్‌ప్లస్ 13s ఫోన్‌లో BGMI గేమ్‌ను 120fps వద్ద ఆడవచ్చు. OxygenOS వల్ల ఇతర ప్రధాన గేమ్‌లు 60fps వద్ద రన్ అవుతాయి. అయితే కాల్ ఆఫ్ డ్యూటీ: మొబైల్ గేమ్‌ను తక్కువ సెట్టింగ్స్‌లో 120fps వరకు ఆడొచ్చు. ఇండిపెండెంట్ టెస్టుల్లో ఈ ఫోన్ 70-81 శాతం వరకు స్థిరమైన CPU పెర్ఫార్మెన్స్‌ను కనబరిచింది. కాంపాక్ట్ సైజ్ ఫోన్ అయినప్పటికీ, ఎక్కువ సేపు BGMI ఆడినా కూడా ఫోన్ ఉష్ణోగ్రత 41°C వరకే పెరగడం విశేషం.

డిస్‌ప్లే, బ్యాటరీ, ఛార్జింగ్ సపోర్ట్

ఇందులో 6.32-అంగుళాల 1.5K LTPO AMOLED డిస్‌ప్లే ఇచ్చారు. ఇది 120Hz రిఫ్రెష్ రేట్, 2,160Hz PWM డిమ్మింగ్‌తో పాటు తడి వేళ్లతో కూడా వాడేలా 'ఆక్వా టచ్' ఫీచర్‌ను సపోర్ట్ చేస్తుంది. ఇక 5,850mAh బ్యాటరీకి 80W SUPERVOOC ఛార్జింగ్ సపోర్ట్ ఉంది. కేవలం అరగంట ఛార్జింగ్‌తో రోజంతా వాడుకోవచ్చని వన్‌ప్లస్ చెబుతోంది. PCMark టెస్టుల్లో ఇది దాదాపు 19 గంటల బ్యాటరీ లైఫ్‌ను ఇచ్చింది. ఆన్‌లైన్ క్లాస్‌లు వినేవారికి, రీల్స్ చేసేవారికి, ప్రయాణాలు ఎక్కువగా చేసేవారికి ఇది బాగా ఉపయోగపడుతుంది.

కెమెరా పెర్ఫార్మెన్స్.. క్రియేటర్లకు ఎలా ఉందంటే?

50MP సోనీ LYT-700 మెయిన్ కెమెరాతో పగటిపూట తీసే ఫోటోలు స్పష్టంగా, మంచి రంగులతో వస్తాయి. నైట్ లైట్‌లో కూడా ప్రైమరీ కెమెరా ఓకే అనిపిస్తుంది. అయితే 50MP 2x టెలిఫోటో కెమెరాకు OIS (ఆప్టికల్ ఇమేజ్ స్టెబిలైజేషన్) లేకపోవడంతో వివరాలు అంత స్పష్టంగా రావు. ఇందులో అల్ట్రావైడ్ కెమెరా లేదు. ఇక 32MP సెల్ఫీ కెమెరా మాత్రం షార్ట్ వీడియోలు (రీల్స్), వీడియో కాల్స్‌కు చాలా బాగుంటుంది.

పోటీ ఫోన్లు vs వాల్యూ: గెలాక్సీ S26 FE, ఐకూ 15, ఐఫోన్ 18 డీల్స్

మార్కెట్‌లో పోటీదారుల విషయానికొస్తే.. శామ్‌సంగ్ గెలాక్సీ S26 FE ప్రారంభ ధర ₹79,999 కాగా, ఐకూ 15 ధర ₹76,999–79,999 మధ్య ఉంది. ఇక ఆపిల్ ఐఫోన్ 18 ప్రో ఆరంభ ధర ₹1,64,900గా ఉంది (కార్డులపై ₹7,000 క్యాష్‌బ్యాక్, ఆథరైజ్డ్ పార్ట్‌నర్ వద్ద ₹10,000 వరకు ఎక్స్ఛేంజ్ బోనస్ ఉన్నాయి). వీటిన్నింటితో పోలిస్తే వన్‌ప్లస్ 13s తక్కువ ధరలోనే లభిస్తోంది. కాకపోతే ఇందులో అల్ట్రావైడ్ కెమెరా లేకపోవడం ఒక్కటే లోటు.