8000mAh బ్యాటరీతో ఒప్పో కొత్త ఫోన్లు: 50MP సెల్ఫీ కెమెరా, 144Hz డిస్‌ప్లేతో అదరగొడుతున్నాయి!

ఒప్పో నుంచి కొత్తగా వచ్చిన F35, F35 ప్రొ స్మార్ట్‌ఫోన్లు నేటి (అక్టోబర్ 11) నుంచి భారతదేశంలో విక్రయానికి అందుబాటులోకి వచ్చాయి. భారీ 8,000mAh బ్యాటరీ, 80W ఫాస్ట్ ఛార్జింగ్, 50MP ఆల్ట్రా-వైడ్ సెల్ఫీ కెమెరా వీటిలో ప్రధాన ఆకర్షణగా నిలుస్తున్నాయి. ఇక డిస్‌ప్లే విషయానికొస్తే.. F35 మోడల్‌లో 6.57-అంగుళాల FHD+ 120Hz AMOLED స్క్రీన్ ఉండగా, ప్రొ వేరియంట్‌లో 6.78-అంగుళాల 1.5K 144Hz AMOLED స్క్రీన్‌ను అందించారు. ఈ ఫోన్లు మీడియాటెక్ డైమెన్సిటీ 6360 మ్యాక్స్, 7360 మ్యాక్స్ ప్రాసెసర్లతో పనిచేస్తాయి. వీటిని ఒప్పో ఈ-స్టోర్, ఫ్లిప్‌కార్ట్, అమెజాన్ సహా రిటైల్ స్టోర్ల ద్వారా కొనుగోలు చేయవచ్చు.

విద్యార్థులు, గేమర్లు, కంటెంట్ క్రియేటర్లకు ఈ ఫోన్లు ఎంతో ఉపయోగపడతాయి. 8,000mAh పెద్ద బ్యాటరీ ఉండటంతో ఆన్‌లైన్ క్లాసులు, రీల్స్ చూడటం, సుదీర్ఘ ప్రయాణాల్లో ఫోన్ వాడటం చాలా సులువు అవుతుంది. పైగా 80W ఫాస్ట్ ఛార్జింగ్ వల్ల తక్కువ సమయంలోనే ఫోన్ ఛార్జ్ అయిపోతుంది. బ్యాటరీ అయిపోతుందనే బెంగే ఉండదు. అలాగే, 50MP అల్ట్రా-వైడ్ సెల్ఫీ కెమెరాతో సెల్ఫీ స్టిక్ అవసరం లేకుండానే గ్రూప్ ఫోటోలు హ్యాపీగా తీసుకోవచ్చు. దీనికున్న IP69K ప్రొటెక్షన్ వర్షంలో బయటకు వెళ్లినా, బైక్ రైడింగ్ చేస్తున్నప్పుడు లేదా అవుట్‌డోర్ షూటింగ్స్ సమయంలో ఫోన్‌కు మంచి రక్షణనిస్తుంది.

ఒప్పో F35 ప్రొ: 144Hz AMOLED, 50MP సెల్ఫీ కెమెరా, డైమెన్సిటీ 7360 మ్యాక్స్

స్మూత్ పెర్ఫార్మెన్స్, స్థిరమైన గేమింగ్ కోరుకునే వారికి 'ప్రొ' మోడల్ బెస్ట్ ఆప్షన్. దీనిలోని 6.78-అంగుళాల 1.5K 144Hz AMOLED డిస్‌ప్లే గేమింగ్, స్క్రోలింగ్ అనుభవాన్ని వేరే లెవెల్‌కి తీసుకెళ్తుంది. 50MP ప్రధాన కెమెరాకు OIS (ఆప్టికల్ ఇమేజ్ స్టెబిలైజేషన్) సపోర్ట్ ఉండటంతో నైట్ షాట్స్, రీల్స్ తీసేటప్పుడు ఫోటోలు, వీడియోలు షేక్ అవ్వకుండా చాలా క్లియర్‌గా వస్తాయి. మీడియాటెక్ డైమెన్సిటీ 7360 మ్యాక్స్ ప్రాసెసర్ వల్ల మల్టీ టాస్కింగ్, గ్రాఫిక్స్ పెర్ఫార్మెన్స్ అద్భుతంగా ఉంటుంది. ఫోన్ వేడెక్కకుండా ఉండేందుకు ఇందులో వేపర్ ఛేంబర్ కూలింగ్ సిస్టమ్‌ను కూడా అందించారు. ఇది సన్‌రైజ్ ఆరెంజ్, వేవ్ బ్లూ, ట్విలైట్ బ్రౌన్ కలర్లలో ప్రీమియం లుక్‌తో లభిస్తుంది.

ఒప్పో F35: 120Hz AMOLED, 8,000mAh బ్యాటరీ, డైమెన్సిటీ 6360 మ్యాక్స్

స్టాండర్డ్ F35 మోడల్ ధర, ఫీచర్ల పరంగా సరైన బ్యాలెన్స్‌గా ఉంటుంది. దీనిలోని 6.57-అంగుళాల FHD+ 120Hz డిస్‌ప్లే సోషల్ మీడియా ఫీడ్ స్క్రోల్ చేయడానికి, గేమ్‌లు ఆడటానికి చాలా స్మూత్‌గా పనిచేస్తుంది. దీనిలోని 50MP ఫ్రంట్ కెమెరా ఆటోఫోకస్ ఫీచర్‌తో రావడం వల్ల సెల్ఫీలు చాలా షార్ప్‌గా వస్తాయి. డైమెన్సిటీ 6360 మ్యాక్స్ ప్రాసెసర్ రోజువారీ పనులను వేగంగా పూర్తి చేస్తూ బ్యాటరీ లైఫ్‌ను కాపాడుతుంది. మీరు 60fps కంటే ఎక్కువ గేమింగ్ ఎక్కువగా ఆడకపోతే, రోజువారీ వాడకంలో 120Hz కి, 144Hz కి పెద్ద తేడా ఏమీ అనిపించదు.

ఒప్పో F35, F35 ప్రొ ధరలు, వేరియంట్లు, ఆఫర్ల వివరాలు

ధరల విషయానికొస్తే.. ఒప్పో F35 6GB+128GB వేరియంట్ ప్రారంభ ధర రూ.38,999 కాగా, 8GB+128GB వేరియంట్ ధర రూ.42,999గా ఉంది. ఇక F35 ప్రొ వేరియంట్లు 6GB+128GB రూ.45,999, 8GB+128GB రూ.49,999 మరియు 8GB+256GB మోడల్ రూ.54,999 కి లభిస్తాయి. F35 మోడల్ మిస్ట్ పింక్, టైటానియం గ్రే, వేవ్ బ్లూ కలర్లలో.. ప్రొ మోడల్ సన్‌రైజ్ ఆరెంజ్, ట్విలైట్ బ్రౌన్, వేవ్ బ్లూ రంగుల్లో అందుబాటులో ఉన్నాయి. నేటి నుంచే ఒప్పో అధికారిక వెబ్‌సైట్, ఫ్లిప్‌కార్ట్, అమెజాన్, ఆఫ్ లైన్ స్టోర్లలో వీటికి సంబంధించి విక్రయాలు ప్రారంభమయ్యాయి. కొనుగోలు చేసే సమయంలో బ్యాంక్ డిస్కౌంట్లు, ఎక్స్చేంజ్ ఆఫర్లను సరిచూసుకోవడం మర్చిపోకండి.