7550mAh భారీ బ్యాటరీ, 50MP OIS కెమెరా, డ్యూయల్ టోన్‌ ఫినిష్‌తో 5G ఫోన్‌.. విడుదల తేదీ వెల్లడి..!

Poco F7 Launch Date : పోకో F7 స్మార్ట్‌ఫోన్‌ భారత్‌ మార్కెట్‌లో విడుదల కానుంది. తాజాగా లాంచ్‌ తేదీని పోకో తమ X పోస్ట్ ద్వారా వెల్లడించింది. దీంతోపాటు డిజైన్‌ ను కూడా విడుదల చేసింది. భారత్ మార్కెట్‌తోపాటు గ్లోబల్‌ మార్కెట్‌లోనూ ఈ ఫోన్‌ ఒకే తేదీన విడుదల కానుంది. తాజా వివరాల ఆధారంగా విడుదల తేదీ సహా స్పెసిఫికేషన్‌ల వివరాలు కూడా వెల్లడయ్యాయి.

పోకో F7 ఎప్పుడు విడుదల కానుంది? :
పోకో ఇండియా X పోస్ట్ ఆధారంగా పోకో F7 స్మార్ట్‌ఫోన్‌ జూన్‌ 24 సాయంత్రం 5:30 గంటలకు విడుదల కానుంది. ఇదే తేదీన గ్లోబల్ మార్కెట్లో కూడా విడుదల కానుంది. విడుదల అనంతరం భారత్ మార్కెట్‌లో ఫ్లిప్‌కార్ట్‌ ద్వారా అందుబాటులోకి రానుంది. ఈ ఫోన్‌ స్పెసిఫికేషన్‌లు, ఫీచర్‌ల వివరాలు.

డ్యూయల్‌ టోన్‌ ఫినిష్‌ :
పోకో F7 స్మార్ట్‌ఫోన్‌ ప్రొమోషనల్‌ టీజర్‌ ఆధారంగా ఈ హ్యాండ్‌సెట్ వెనుక వైపు బ్లాక్‌, సిల్వర్‌తో కూడిన డ్యూయల్‌ టోన్‌ ఫినిష్‌ను కలిగి ఉంది. ఈ పోకో హ్యాండ్‌సెట్ గురించి ఇటీవలే అనేక వివరాలు లీక్‌ అయ్యాయి. దీని ఆధారంగా ఈ హ్యాండ్‌సెట్‌ 6.83 అంగుళాల అమోలెడ్‌ డిస్‌ప్లేను కలిగి ఉంటుందని సమాచారం. ఈ ఫోన్‌ అల్యూమినియం ఫ్రేమ్‌ను ను కలిగి ఉంటుందని తెలుస్తోంది.

భారీ బ్యాటరీ ఫోన్‌ :
ఇప్పటికే ఈ హ్యాండ్‌సెట్‌ బ్యాటరీ వివరాలు వెల్లడయ్యాయి. ఫ్లిప్‌కార్ట్‌ ప్రొమోషనల్‌ టీజర్‌ ఆధారంగా 90W వైర్‌ ఛార్జింగ్‌, 22.5W రివర్స్‌ ఛార్జింగ్‌ సపోర్టుతో 7550mAh బ్యాటరీతో పనిచేస్తుంది. ప్రత్యేక ఛార్జింగ్‌ టెక్నాలజీతో పనిచేస్తుందని ఫ్లిప్‌కార్ట్ తెలిపింది. రెండు రోజులపాటు ఉపయోగించుకోవచ్చని తెలుస్తోంది.

OIS సపోర్టుతో :
తాజా టీజర్‌ ఆధారంగా ఈ ఫోన్ వెనుక వైపు డ్యూయల్‌ కెమెరాలను కలిగి ఉంటుంది. ఇందులో OIS (ఆప్టికల్‌ ఇమేజ్‌ స్టెబిలైజేషన్) సపోర్టుతో 50MP ప్రైమరీ కెమెరాను కలిగి ఉంటుంది. అయితే మిగిలిన కెమెరాల వివరాలు వెల్లడి కావాల్సి ఉంది.

అయితే గతంలోనే ఈ ఫోన్‌ కెమెరాల వివరాలు లీక్‌ అయ్యాయి. ఈ లీక్స్ ఆధారంగా హ్యాండ్‌సెట్ 50MP సోనీ IMX882 ప్రైమరీ కెమెరా, 8MP అల్ట్రావైడ్‌ లెన్స్ తోపాటు ముందువైపు 20MP సెల్ఫీ కెమెరాతో అందుబాటులోకి వచ్చే అవకాశం ఉంది.

స్నాప్‌డ్రాగన్‌ చిప్‌సెట్ :
ఈ స్మార్ట్‌ఫోన్ వెనుక వైపు స్నాప్‌డ్రాగన్‌ లోగోను గుర్తించవచ్చు. దీని ఆధారంగా ఈ పోకో F7 స్మార్ట్‌ఫోన్‌ స్నాప్‌డ్రాగన్‌ చిప్‌సెట్‌ను కలిగి ఉంటుంది. దీంతోపాటు ఆండ్రాయిడ్‌ 15 పైన పనిచేసే అవకాశం ఉంది. త్వరలో మరిన్ని వివరాలు వెల్లడి కానున్నాయి. ఈ ఫోన్ రూ.30000 ధర రేంజ్‌లో భారత్‌లో లాంచ్‌ అయ్యే అవకాశం ఉంది.

ఇప్పటికే రెండు భారీ బ్యాటరీ ఫోన్‌లు :
ఈ పోకో F7 ఫోన్‌ 7550mAh బ్యాటరీతో అందుబాటులోకి రానుంది. దీంతో భారీ బ్యాటరీ ఫోన్‌గా గుర్తింపు పొందే అవకాశం ఉంది. ప్రస్తుతం భారత్ మార్కెట్‌లో iQOO Z10 మరియు వివో T4 స్మార్ట్‌ఫోన్‌లు 7300mAh బ్యాటరీతో పనిచేస్తున్నాయి.