రూ. 25 వేల బడ్జెట్‌లో బెస్ట్ 5G ఫోన్ ఏది? రెడ్‌మీ 17C vs ఇన్‌ఫినిక్స్ హాట్ 70 ప్రో పోలిక!

రెడ్‌మీ 17C 5G (Redmi 17C 5G) ఫోన్ రూ. 20,999 ప్రారంభ ధరతో అక్టోబర్ 1న భారత్‌లో లాంచ్ అయింది. దీని మొదటి సేల్ అక్టోబర్ 7 నుంచి ప్రారంభం కానుంది. మరోవైపు, ఇన్‌ఫినిక్స్ హాట్ 70 ప్రో 5G/5G+ (Infinix Hot 70 Pro 5G/5G+) ఎంఆర్‌పీ రూ. 24,999గా ఉంది. కానీ బ్యాంక్ ఆఫర్లతో దీని ధర రూ. 22,999కి తగ్గడంతో పాటు, 9 నెలల నో-కాస్ట్ EMI, రూ. 1,999 విలువైన యాక్సెసరీస్ వోచర్ లభిస్తాయి. రూ. 25,000 లోపు ధరలో ఈ రెండూ 5G, పెద్ద బ్యాటరీలు, వాటర్ స్ప్లాష్ రెసిస్టెన్స్‌తో వస్తున్నాయి. మరి వీటిలో మీ డబ్బుకి ఏది సరైన విలువనిస్తుంది? ఏది బెటర్?

యూజర్ల కంటి సౌకర్యానికే రెడ్‌మీ ప్రాధాన్యత ఇచ్చింది. దీనిలోని 6.9-ఇంచుల 120Hz HD+ LCD డిస్‌ప్లే TÜV ఫ్లికర్ ఫ్రీ, DC డిమ్మింగ్ ఫీచర్లతో వస్తుంది. ఇది కళ్లపై ఒత్తిడి పడకుండా కాపాడుతుంది. దీని పీక్ బ్రైట్‌నెస్ 810-నిట్స్ (HBM). ఇక ఇన్‌ఫినిక్స్ విషయానికొస్తే, ఇది మరింత షార్ప్‌గా ఉండే 144Hz FHD+ LCD డిస్‌ప్లేతో సవాల్ విసురుతోంది. ఎండలో కూడా స్పష్టంగా కనిపించేలా దీని అవుట్‌డోర్ బ్రైట్‌నెస్ 910–950 నిట్స్ వరకు ఉంటుంది. వైడ్‌వైన్ L1 సర్టిఫికేషన్ ఉన్నప్పటికీ నెట్‌ఫ్లిక్స్‌లో HDR పనిచేయదు. యూట్యూబ్‌లో HDR సపోర్ట్ ఉన్నప్పటికీ, టోన్ మేపింగ్ ఫలితాలు మారవచ్చు.

రెడ్‌మీ 17C 5G vs ఇన్‌ఫినిక్స్ హాట్ 70 ప్రో 5G+: కెమెరాలు, గేమింగ్, బ్యాటరీ పర్ఫార్మెన్స్

డే-లైట్‌లో ఇన్‌ఫినిక్స్ హాట్ 70 ప్రో తీసే ఫొటోలు మంచి పంచ్ ఆఫ్‌ కలర్స్‌తో, ఉత్తమ డైనమిక్ రేంజ్‌తో వస్తాయి. అయితే ప్రత్యర్థులతో పోలిస్తే డీటైలింగ్ కాస్త తక్కువగా ఉంటుంది. రాత్రి వేళల్లో తక్కువ నోయిస్‌తో ఫొటోలు పర్వాలేదనిపిస్తాయి. ఇందులో ఆప్టికల్ ఇమేజ్ స్టెబిలైజేషన్ (OIS) లేదు, కాబట్టి 2K30 రికార్డింగ్ ఉన్నప్పటికీ చేతితో తీసే వీడియోలు చాలా సాధారణంగా ఉంటాయి. ఇక రెడ్‌మీ 17Cలోని 50-మెగాపిక్సెల్ కెమెరా, 1080p30 వీడియో రికార్డింగ్ ఓ మోస్తరుగా ఉంటాయి. సోషల్ మీడియాలో పోస్ట్ చేసే ఫొటోలకు ఇది బాగానే సెట్ అవుతుందని ప్రాథమిక రివ్యూలు చెప్తున్నాయి. అయితే దీనిపై పూర్తి టెస్టింగ్ జరగాల్సి ఉంది.

గేమింగ్‌లో ఇన్‌ఫినిక్స్ హాట్ 70 ప్రోలోని డైమెన్సిటీ 7100 చిప్‌సెట్ సూపర్ స్మూత్ పర్ఫార్మెన్స్ ఇస్తుంది. BGMI గేమ్‌లో దాదాపు 30 నిమిషాల పాటు 90fps వద్ద ల్యాగ్ లేకుండా ఆడవచ్చని, ఫోన్ కొద్దిగా వేడెక్కినా పర్ఫార్మెన్స్ తగ్గలేదని టెక్ రివ్యూయర్లు పేర్కొన్నారు. ఇది 6–7 గంటల స్క్రీన్-ఆన్ టైమ్‌ను ఇస్తుంది. అలాగే కేవలం 63 నిమిషాల్లో 0 నుంచి 100% ఛార్జ్ అవుతుంది. మరోవైపు, రెడ్‌మీలోని డైమెన్సిటీ 6300 ప్రాసెసర్ రోజువారీ అవసరాలకు, క్యాజువల్ గేమింగ్‌కు బాగా సరిపోతుంది. దీనిలోని 33W ఛార్జర్‌తో ఫోన్ పూర్తిగా ఛార్జ్ అవ్వడానికి సుమారు గంట సమయం పడుతుంది.

రెడ్‌మీ 17C 5G vs ఇన్‌ఫినిక్స్ హాట్ 70 ప్రో 5G+: నెట్‌వర్క్, సాఫ్ట్‌వేర్.. చివరిగా ఏది బెస్ట్?

భారత్‌లో నెట్‌వర్క్ కనెక్టివిటీకి 5G బ్యాండ్లు చాలా ముఖ్యం. రెడ్‌మీ SA/NSA బ్యాండ్లు: n1, n3, n5, n8, n28, n40, n78లకు సపోర్ట్ చేస్తుంది. ఇవి ఎయిర్‌టెల్, జియో నెట్‌వర్క్‌లకు సరిగ్గా సరిపోతాయి. ఇన్‌ఫినిక్స్ n77, n78 బ్యాండ్లకు కూడా సపోర్ట్ ఇస్తుంది. అయితే రెండింటిలోనూ VoNR ఉందో లేదో స్పష్టంగా చెప్పలేదు. సాఫ్ట్‌వేర్ విషయంలో ఇన్‌ఫినిక్స్ మూడు ఆండ్రాయిడ్ అప్‌డేట్లు, ఐదేళ్ల సెక్యూరిటీ అప్‌డేట్ల హామీ ఇస్తుండగా, రెడ్‌మీ తన పాలసీని ఇంకా వెల్లడించలేదు. గేమింగ్ కావాలనుకునే వారు ఇన్‌ఫినిక్స్ వైపు, విలువైన ఫీచర్లు, ఐ-కేర్ డిస్‌ప్లే కోరుకునేవారు రెడ్‌మీ వైపు మొగ్గు చూపవచ్చు.

ఎవరికి ఏ ఫోన్ బెటర్ అంటే: కెమెరా ప్రాధాన్యత కలిగిన క్రియేటర్లు రెడ్‌మీ 17C పూర్తి రివ్యూల కోసం వేచి చూడటం లేదా మంచి OIS ఉన్న ఫోన్లను పరిశీలించడం బెటర్. బ్యాటరీ, లాంగ్ బ్యాకప్ కోరుకునే స్టూడెంట్లకు రెండూ మంచి ఆప్షన్లే, కాకపోతే ఇన్‌ఫినిక్స్ వేగంగా ఛార్జ్ అవుతుంది. ఇక గేమర్లు, స్ట్రీమర్లకు ఇన్‌ఫినిక్స్‌లోని స్మూత్ గ్రాఫిక్స్, బ్రైట్ FHD+ స్క్రీన్ లబ్ధి చేకూరుస్తాయి. ఎక్కువ కాలం సాఫ్ట్‌వేర్ అప్‌డేట్లు కావాలనుకునే వారు ఇన్‌ఫినిక్స్ వైపు, పరిమిత బడ్జెట్ ఉన్నవారు రెడ్‌మీ వైపు మొగ్గు చూపవచ్చు.