5200mAh భారీ బ్యాటరీ, 120Hz డిస్‌ప్లేతో రెడ్‌మీ A5 వచ్చేసింది.. ధర, ఫీచర్ల వివరాలివే..

Redmi A5 launched: షావోమి (Xiaomi) కంపెనీ తక్కువ ధరలో మంచి ఫీచర్లతో కొత్త 4G స్మార్ట్‌ఫోన్ రెడ్‌మీ A5 (Redmi A5)ను గ్లోబల్ మార్కెట్లోకి తెచ్చింది. దీనిలో పెద్ద 6.88-అంగుళాల HD+ డిస్‌ప్లే, అది కూడా సూపర్ స్మూత్ 120Hz రిఫ్రెష్ రేట్‌తో వస్తుంది. సెల్ఫీల కోసం ముందు వైపు 8MP కెమెరా ఉంది. ఈ ఫోన్ వేగంగా పనిచేయడానికి యూనిసోక్ (Unisoc) T7250 ప్రాసెసర్‌ను అమర్చారు.

4GB వరకు RAM ఉండగా, అదనంగా మరో 4GB వర్చువల్ RAM పెంచుకునే సౌకర్యం కూడా ఉంది. బ్యాటరీ లైఫ్ గురించి ఆందోళనే వద్దు, ఎందుకంటే దీనిలో శక్తివంతమైన 5200mAh బ్యాటరీ ఉంది. చూడటానికి కూడా చాలా స్టైలిష్‌గా, ప్రీమియం లుక్‌తో ఆకట్టుకుంటుంది.

* డిస్‌ప్లే, డిజైన్

రెడ్‌మీ A5లో 6.88-అంగుళాల HD+ LCD స్క్రీన్ (1640x720 పిక్సెల్స్ రిజల్యూషన్‌) ఉంది. దీని 120Hz రిఫ్రెష్ రేట్‌తో ఫోన్ వాడకం స్మూత్‌గా అనిపిస్తుంది. అంతేకాదు, కళ్లకు హానికరం కాని TÜV రైన్‌లాండ్ సర్టిఫైడ్ ఐ ప్రొటెక్షన్ ఫీచర్ కూడా ఉంది. కళ్లపై ఒత్తిడి తగ్గించడానికి DC డిమ్మింగ్ టెక్నాలజీని ఇది సపోర్ట్ చేస్తుంది.

* ఫోన్ డిజైన్, పనితీరు

ఆధునిక ఫ్లాట్-ఫ్రేమ్ డిజైన్‌తో, మెటాలిక్ లాంటి ఫినిషింగ్‌తో వస్తుంది. ఇది మిడ్‌నైట్ బ్లాక్, శాండీ గోల్డ్, లేక్ గ్రీన్, ఓషన్ బ్లూ అనే నాలుగు రంగులలో లభిస్తుంది. లేక్ గ్రీన్, ఓషన్ బ్లూ రంగుల ఫోన్లలో ప్రకృతి స్ఫూర్తితో కూడిన ప్రత్యేకమైన గీతల నమూనా ఉంటుంది. దీని వెనుకభాగం మ్యాట్ ఫినిష్‌తో వస్తుంది.

దీనివల్ల మరకలు, వేలిముద్రలు అంత సులభంగా పడవు. ఈ ఫోన్ 1.8GHz వేగంతో పనిచేసే Unisoc T7250 ఆక్టా-కోర్ ప్రాసెసర్‌తో, రెడ్‌మి A5 రోజువారీ పనులను వేగంగా, సులభంగా పూర్తి చేస్తుంది. గ్రాఫిక్స్ కోసం దీనిలో Mali-G57 MP1 GPUని ఉపయోగించారు. ఈ ఫోన్ 3GB, 4GB LPDDR4X ర్యామ్ ఆప్షన్లలో లభిస్తుంది.

* స్టోరేజ్

స్టోరేజ్ విషయానికొస్తే, 64GB + 128GB eMMC 5.1 ఆప్షన్లు ఉన్నాయి. ఇంకా ఎక్కువ స్టోరేజ్ కావాలనుకుంటే, మైక్రో SD కార్డ్ ద్వారా ఏకంగా 2TB (టెరాబైట్) వరకు పెంచుకోవచ్చు. విశేషం ఏంటంటే, 3 సంవత్సరాలు (36 నెలలు) వాడిన తర్వాత కూడా ఫోన్ పనితీరు స్మూత్‌గానే ఉంటుందని షావోమి చెబుతోంది.

* కెమెరాలు

రెడ్‌మీ A5 వెనుకవైపు డ్యూయల్ కెమెరా సెటప్‌ను కలిగి ఉంది. ఇందులో 32MP మెయిన్ కెమెరాతో పాటు, మరో సెకండరీ కెమెరా కూడా ఉంది. ముందు వైపు, స్క్రీన్ పైభాగంలో ఉన్న నాచ్ డిజైన్‌లో 8MP సెల్ఫీ కెమెరాను అమర్చారు. తక్కువ వెలుతురులోనూ మంచి ఫోటోలు తీయడానికి వెనుక కెమెరాకు సహాయంగా LED ఫ్లాష్ ఉంది.

* బ్యాటరీ, భద్రత, సాఫ్ట్‌వేర్

ఈ ఫోన్‌లో పెద్ద 5200mAh బ్యాటరీని అమర్చారు. ఇది 15W ఛార్జింగ్‌కు సపోర్ట్ చేస్తుంది. ఒక్కసారి ఛార్జ్ చేస్తే ఎక్కువ సేపు వస్తుందని, 1,000 సార్లు ఛార్జింగ్ చేసిన తర్వాత కూడా బ్యాటరీ ఆరోగ్యం బలంగా ఉంటుందని కంపెనీ హామీ ఇస్తోంది.

భద్రత విషయానికొస్తే, ఫోన్ పక్క భాగంలో ఫింగర్‌ప్రింట్ స్కానర్, AI టెక్నాలజీతో పనిచేసే ఫేస్ అన్‌లాక్ ఫీచర్లు ఉన్నాయి. రెడ్‌మీ A5 ఆండ్రాయిడ్ 15 (గో ఎడిషన్)‌తో పనిచేస్తుంది. ఇది తక్కువ ర్యామ్‌తో కూడా వేగంగా పనిచేసేలా, తేలికైన సాఫ్ట్‌వేర్ అనుభవాన్ని అందిస్తుంది.

* కనెక్టివిటీ

డ్యూయల్ 4G VoLTE, Wi-Fi (2.4GHz, 5GHz రెండూ సపోర్ట్ చేస్తుంది). బ్లూటూత్ 5.2, GPS, గ్లోనాస్, గెలీలియో, BDS (B1C మాత్రమే) వంటి అన్ని ముఖ్యమైన ఆప్షన్లు ఉన్నాయి. వీటితో పాటు ఆధునిక USB టైప్-సి పోర్ట్, FM రేడియో, మీ పాత వైర్డ్ హెడ్‌ఫోన్‌ల కోసం 3.5mm ఆడియో జాక్ కూడా ఉన్నాయి.

* ధర, లభ్యత

గ్లోబల్ మార్కెట్లలో రెడ్‌మీ A5 ధర సుమారుగా 79 డాలర్లు (అంటే దాదాపు మన కరెన్సీలో రూ.6,751.54)గా ఉంది. ఇండోనేషియాలో, 4GB RAM + 128GB స్టోరేజ్ మోడల్ ధర 11,99,000 ఇండోనేషియా రుపియాలు (అంటే దాదాపు రూ.6,187.78)గా నిర్ణయించారు.

ఈ ఫోన్ షావోమి అధికారిక ఆన్‌లైన్ స్టోర్‌తో పాటు, ఎంపిక చేసిన రిటైల్ దుకాణాల్లో కొనుగోలుకు అందుబాటులో ఉంది. ఇదే ఫోన్ భారతదేశంలో ఈ వారం చివరిలో పోకో సి71 (Poco C71) పేరుతో విడుదల కావచ్చని వార్తలు వినిపిస్తున్నాయి.