రెడ్‌మీ నోట్ 17 ప్రో మాక్స్ లీక్.. ఆండ్రాయిడ్ 16, 9210mAh బ్యాటరీతో త్వరలో ఎంట్రీ!

రెడ్‌మీ నోట్ 17 ప్రో మాక్స్ త్వరలోనే మార్కెట్లోకి అడుగుపెట్టబోతోంది. తాజాగా ఈ స్మార్ట్‌ఫోన్ గీక్‌బెంచ్ బెంచ్‌మార్క్ డాటాబేస్‌లో ప్రత్యక్షమైంది. మోడల్ నంబర్ 2609FRA74Gతో దర్శనమిచ్చిన ఈ ఫోన్, గ్లోబల్ ల్యాంచ్‌కు సిద్ధమవుతున్నట్లు తెలుస్తోంది. దీంతో భారత్‌లోని టెక్ ప్రియులు ఈ ఫోన్ ల్యాంచ్ అప్‌డేట్స్ కోసం ఆసక్తిగా ఎదురుచూస్తున్నారు. అంతేకాదు, గీక్‌బెంచ్‌లో కనిపించిన ఈ డివైజ్ లేటెస్ట్ ఆండ్రాయిడ్ 16 ఆపరేటింగ్ సిస్టమ్‌తో పనిచేస్తుండటం విశేషం.

బెంచ్‌మార్క్ లిస్టింగ్ వివరాల ప్రకారం.. ఈ ఫోన్‌లో క్వాల్కమ్ స్నాప్‌డ్రాగన్ 6 జెన్ 5 ఆక్టా-కోర్ ప్రాసెసర్‌ను అందించారు. దీనికి తోడు 8GB ర్యామ్, షావోమీకి చెందిన లేటెస్ట్ హైపర్‌ఓఎస్ 3 (HyperOS 3) స్కిన్ ఉండనున్నాయి. ఇక గీక్‌బెంచ్ టెస్టింగ్‌లో ఈ ఫోన్ సింగిల్-కోర్‌లో 924 పాయింట్లు, మల్టీ-కోర్ టెస్టులో 2,923 పాయింట్లు సాధించింది. ఈ స్కోర్లను బట్టి చూస్తే, రోజువారీ వినియోగంలోనే కాకుండా గేమింగ్‌లోనూ ఈ ఫోన్ మంచి పర్‌ఫార్మెన్స్ అందిస్తుందని భావించవచ్చు.

రెడ్‌మీ నోట్ 17 ప్రో మాక్స్ ఇండియా ల్యాంచ్, ధర వివరాలు

త్వరలోనే ఈ ఫోన్ బ్యూరో ఆఫ్ ఇండియన్ స్టాండర్డ్స్ (BIS) పోర్టల్‌లో దర్శనమిస్తుందని భావిస్తున్నారు. సాధారణంగా ఇండియన్ వేరియంట్ మోడల్ కోడ్ బయటకు రాగానే.. ఈ-కామర్స్ దిగ్గజాలైన అమెజాన్, ఫ్లిప్‌కార్ట్‌లలో ప్రామో పేజీలు, 'నోటిఫై మీ' ఆప్షన్లు అందుబాటులోకి వస్తాయి. ఆగస్టు చివరి వారంలో లేదా సెప్టెంబర్ ప్రారంభంలో ఈ ఫోన్ భారత్‌లో అధికారికంగా విడుదలయ్యే అవకాశముందని టెక్ వర్గాలు అంచనా వేస్తున్నాయి. సర్టిఫికేషన్ ప్రక్రియ పూర్తయిన వెంటనే టీజర్లు రావడం ప్రారంభమవుతాయి.

భారత మార్కెట్లో ఈ ఫోన్ ధర రూ.25,000 నుండి రూ.32,000 రేంజ్‌లో ఉండే అవకాశం ఉంది. ఈ ధరతో అప్పర్ మిడ్-రేంజ్ విభాగంలో పోకో (POCO), ఐకూ (iQOO) ఫోన్లకు ఇది గట్టి పోటీ ఇవ్వనుంది. ఇందులో వేగవంతమైన యాప్ లోడింగ్ కోసం హై-ఎండ్ వేరియంట్లలో UFS 4.0 ఫ్లాష్ మెమరీని అందించవచ్చని తెలుస్తోంది. అంతేకాకుండా, అప్‌గ్రేడెడ్ డిస్‌ప్లే, మెరుగైన బ్యాటరీతో వస్తున్న ఈ ఫోన్.. హెవీ గేమింగ్ ప్రియులకు మంచి ఛాయిస్‌గా మారనుంది.

రెడ్‌మీ నోట్ 17 ప్రో మాక్స్ మార్కెట్ అంచనాలు

లీకైన సమాచారం ప్రకారం.. ఈ స్మార్ట్‌ఫోన్‌లో ఆప్టికల్ ఇమేజ్ స్టెబిలైజేషన్ (OIS) సపోర్ట్‌తో కూడిన 50MP ప్రైమరీ కెమెరా ఉండనుంది. అలాగే 100W ఫాస్ట్ ఛార్జింగ్ సపోర్ట్‌తో ఏకంగా 9,210mAh భారీ బ్యాటరీని అందించనున్నట్లు సమాచారం. ఆఫీషియల్ టీజర్లు విడుదలయ్యాకే పూర్తి కెమెరా ఫీచర్లు, సేల్ ఆఫర్లపై స్పష్టత రానుంది. ఏది ఏమైనా, మిడ్-రేంజ్‌లో కొత్త ఫోన్ కొనేందుకు చూస్తున్న భారతీయ యూజర్లు ఈ ల్యాంచ్ కోసం చాలా ఆసక్తిగా ఎదురుచూస్తున్నారు.