8000mAh బ్యాటరీ vs 90W ఛార్జింగ్.. రెడ్‌మీ నోట్ 17, ఇన్ఫినిక్స్ నోట్ 60 ప్రోలో ఏది బెస్ట్?

భారత్‌లో మిడ్‌రేంజ్ స్మార్ట్‌ఫోన్ కొనుగోలుదారులకు ఇప్పుడు సరైన ఫోన్‌ను ఎంచుకోవడం కాస్త కష్టంగానే మారింది. రిటైల్ స్టోర్లలో రెడ్‌మీ నోట్ 17 5జీ ప్రారంభ ధర ₹27,999 కాగా.. ఇన్ఫినిక్స్ నోట్ 60 ప్రో 5జీ ఆన్‌లైన్‌లో ₹30,999 ప్రారంభ ధరతో లభిస్తోంది. రోజూ ఫోన్ ఎక్కువగా వాడేవారికోసం ఈ రెండింటిలోనూ భారీ బ్యాటరీలు, అద్భుతమైన AMOLED డిస్‌ప్లేలను అందించారు. అయితే మీకు అన్‌లిమిటెడ్ బ్యాటరీ లైఫ్ కావాలా? లేక సూపర్ ఫాస్ట్ ప్రాసెసింగ్ స్పీడ్ కావాలా? అనేదాన్ని బట్టే మీ పర్ఫెక్ట్ ఫోన్‌ను ఎంచుకోవాల్సి ఉంటుంది.

బ్యాటరీ టైమ్ విషయానికి వస్తే రెడ్‌మీదే పైచేయి. ఇందులో ఏకంగా 8,000mAh భారీ బ్యాటరీ ఉంది. నాన్‌స్టాప్‌గా వీడియోలు చూసినా, గేమ్స్ ఆడినా ఇది రెండు రోజులు ఈజీగా పనిచేస్తుంది. అంతేకాదు, ఇతర గాడ్జెట్లను ఛార్జ్ చేయడానికి ఇది 22.5W రివర్స్ వైర్డ్ ఛార్జింగ్‌కు కూడా సపోర్ట్ చేస్తుంది. మరోవైపు ఇన్ఫినిక్స్ తేలికపాటి డిజైన్‌లో కాస్త చిన్నదైన 6,500mAh బ్యాటరీతో వస్తుంది. అయితే, ఇందులో ఏకంగా 90W ఫాస్ట్ ఛార్జింగ్‌తో పాటు అరుదైన 30W వైర్‌లెస్ ఛార్జింగ్ సపోర్ట్ ఇచ్చారు. దీంతో చిన్న బ్రేక్ తీసుకునే లోపే ఫోన్ చకచకా ఛార్జ్ అయిపోతుంది.

రెడ్‌మీ నోట్ 17 vs ఇన్ఫినిక్స్ నోట్ 60 ప్రో: పెర్ఫార్మెన్స్, కెమెరా ఎలా ఉన్నాయంటే?

డిస్‌ప్లే క్వాలిటీ, ప్రాసెసింగ్ పవర్‌లో ఇన్ఫినిక్స్ స్పష్టమైన ఆధిక్యంలో ఉంది. దీనిలోని 6.78-ఇంచ్ 1.5K AMOLED స్క్రీన్ 144Hz రిఫ్రెష్ రేట్‌తో అద్భుతమైన స్మూత్ ఎక్స్‌పీరియన్స్‌ను ఇస్తుంది. మల్టీ-టాస్కింగ్ వేగంగా సాగేందుకు ఇందులో క్వాల్కమ్ స్నాప్‌డ్రాగన్ 7s జెన్ 4 ప్రాసెసర్‌ను అమర్చారు. అంతేకాకుండా, తక్కువ వెలుతురులోనూ షార్ప్ ఫోటోలు తీసేందుకు వీలుగా దీని 50MP ప్రైమరీ కెమెరాకు OIS (ఆప్టికల్ ఇమేజ్ స్టెబిలైజేషన్) సపోర్ట్ ఉంది. ఇక రెడ్‌మీ విషయానికి వస్తే, ఇది క్వాల్కమ్ స్నాప్‌డ్రాగన్ 4 జెన్ 4 చిప్‌సెట్‌తో పాటు కాస్త పెద్దదైన 6.99-ఇంచ్ 120Hz డిస్‌ప్లేతో వస్తుంది.

చివరిగా ఈ రెండింటిలో ఏది కొనాలనేది మీ రోజువారీ అవసరాలపైనే ఆధారపడి ఉంటుంది. మీరు ఎక్కువగా ప్రయాణాలు చేస్తూ, ఛార్జింగ్ పాయింట్లకు దూరంగా ఉంటారనుకుంటే రెడ్‌మీ నోట్ 17 బెస్ట్ ఆప్షన్. దీనిలోని భారీ బ్యాటరీ ఛార్జింగ్ టెన్షన్‌ను పూర్తిగా దూరం చేస్తుంది. అలాకాకుండా మీకు సూపర్ ఫాస్ట్ ఛార్జింగ్, స్మూత్ గేమింగ్ ఎక్స్‌పీరియన్స్ కావాలనుకుంటే ఇన్ఫినిక్స్ నోట్ 60 ప్రో వైపు వెళ్ళవచ్చు. మొబైల్ గేమర్లు, ఫోటోగ్రాఫర్లకు ఇన్ఫినిక్స్ అందించే పెర్ఫార్మెన్స్, కెమెరా స్టెబిలిటీ ఖచ్చితంగా నచ్చుతాయి.