రెడ్‌మీ నోట్ 17 vs ఐకూ Z11: భారీ బ్యాటరీ కావాలా లేక పవర్‌ఫుల్ గేమింగ్? ఏది బెస్ట్?

భారతదేశ మిడ్-రేంజ్ స్మార్ట్‌ఫోన్ మార్కెట్‌లో ప్రస్తుతం గట్టి పోటీ నడుస్తోంది. భారీ బ్యాటరీ లైఫ్‌తో షియోమీ ఇటీవల 'రెడ్‌మీ నోట్ 17'ని మార్కెట్‌లోకి తెచ్చింది. మరోవైపు, పవర్‌ఫుల్ పెర్ఫార్మెన్స్ కోరుకునే యూజర్లు భారత్‌లో లాంచ్ కాబోతున్న 'ఐకూ Z11' కోసం ఈగర్‌గా వెయిట్ చేస్తున్నారు. దీంతో, ఇప్పుడే రెడ్‌మీ ఫోన్ కొనేయాలా? లేక ఐకూ వచ్చే వరకు ఆగాలా? అని టెక్ లవర్స్ తెగ ఆలోచిస్తున్నారు.

రెడ్‌మీ నోట్ 17లో ఏకంగా 8,000mAh సిలికాన్-కార్బన్ బ్యాటరీని అందించారు. సాధారణ వాడకంలో ఒకసారి ఛార్జ్ చేస్తే ఏకంగా మూడు రోజుల పాటు నాన్‌స్టాప్‌గా పనిచేస్తుంది. దీనికి తోడు 45W ఫాస్ట్ ఛార్జింగ్ సపోర్ట్ ఉంది. ఇక ఐకూ Z11 విషయానికొస్తే.. ఇది పూర్తిగా గేమింగ్, పీక్ పెర్ఫార్మెన్స్ లవర్స్ కోసం వస్తోంది. BGMI లాంటి హెవీ గేమ్‌లలో హై ఫ్రేమ్ రేట్లతో పాటు 90W ఫాస్ట్ ఛార్జింగ్ సపోర్ట్‌ను ఇందులో ఇస్తున్నారు.

Redmi Note 17 vs iQOO Z11: ఫీచర్ల పోలిక

డిస్‌ప్లే, కెమెరా విషయంలోనూ ఈ రెండు ఫోన్ల మధ్య స్పష్టమైన తేడా కనిపిస్తుంది. రెడ్‌మీ ఫోన్‌లో కంటికి శ్రమ తగ్గించే పిడబ్ల్యూఎమ్ (PWM) స్క్రీన్ ఫ్లిక్కర్‌తో కూడిన 120Hz AMOLED డిస్‌ప్లే అందించారు. వీడియోలు స్మూత్‌గా రికార్డ్ చేయడానికి ఇందులో ఎలక్ట్రానిక్ ఇమేజ్ స్టెబిలైజేషన్ (EIS) ఉంది. మరోవైపు, ఐకూ Z11లో ఆప్టికల్ ఇమేజ్ స్టెబిలైజేషన్ (OIS) ఇస్తున్నారు. దీనివల్ల రాత్రివేళల్లోనూ మంచి షార్ప్ ఫొటోలు, సూపర్ క్లారిటీతో 4K వీడియోలు రికార్డ్ చేయవచ్చు. క్రియేటర్లకు ఇది చాలా బాగా ఉపయోగపడుతుంది.

Redmi Note 17 vs iQOO Z11: ఏది బెస్ట్? ఏది కొనాలి?

ఈ రెండు స్మార్ట్‌ఫోన్లు లేటెస్ట్ ఆండ్రాయిడ్ 16 ఆపరేటింగ్ సిస్టమ్‌పై పనిచేస్తాయి. మనదేశంలోని అన్ని ప్రధాన 5G బ్యాండ్లతో పాటు VoWiFi కాలింగ్ ఫీచర్‌ను సపోర్ట్ చేస్తాయి. ప్రస్తుతం రెడ్‌మీ నోట్ 17 మార్కెట్‌లో అందుబాటులో ఉంది. మంచి బ్యాంక్ ఆఫర్లతో లభిస్తోంది. పదే పదే ఛార్జర్ వెతుక్కోకుండా రోజులు తరబడి బ్యాటరీ లైఫ్ కోరుకునేవారికి రెడ్‌మీ నోట్ 17 సూపర్ ఆప్షన్ అని చెప్పొచ్చు.

చివరిగా ఏ ఫోన్ కొనాలనేది మీ రోజువారీ వాడకంపైనే ఆధారపడి ఉంటుంది. మీకు తిరుగులేని బ్యాటరీ లైఫ్ మాత్రమే కావాలనుకుంటే కళ్ళు మూసుకుని రెడ్‌మీ నోట్ 17 కొనేయవచ్చు. అలా కాకుండా హెవీ గేమింగ్, ఫాస్ట్ ఛార్జింగ్, బెస్ట్ కెమెరా పెర్ఫార్మెన్స్ కావాలనుకుంటే మాత్రం ఐకూ Z11 కోసం కొద్ది రోజులు ఆగడం మంచిది. ఆ వేచి చూసే సమయానికి తగినట్లే ఐకూ బెస్ట్ పెర్ఫార్మెన్స్ ఇస్తుంది.