రూ. 35 వేల బడ్జెట్‌లో బెస్ట్ ఫోన్ ఏది? సామ్‌సంగ్ vs వన్‌ప్లస్ పోరులో అసలు విజేత ఎవరు?

భారతదేశ మిడ్-రేంజ్ స్మార్ట్‌ఫోన్ మార్కెట్‌లో రూ. 35,000 బడ్జెట్‌లో రెండు క్రేజీ ఫోన్ల మధ్య గట్టి పోటీ నడుస్తోంది. అవే Samsung Galaxy A56 5G, OnePlus Nord CE 6. తాజాగా తగ్గిన ధరలు, బ్యాంక్ డిస్కౌంట్లతో ఈ రెండు ఫోన్లు కస్టమర్లను ఎంతగానో ఆకట్టుకుంటున్నాయి. కెమెరా, బ్యాటరీ, పెర్ఫార్మెన్స్ విషయంలో దేనికదే సాటిగా నిలుస్తున్నాయి. మరి మీ అవసరాలకు తగ్గట్టుగా ఏ ఫోన్ ఎంచుకుంటే లాభమో ఇప్పుడు చూద్దాం.

క్యాష్‌బ్యాక్‌లు, బ్యాంక్ ఆఫర్లు, ఎక్స్ఛేంజ్ బోనస్‌ల వల్ల ఫోన్ల అసలు ధర చాలా వరకు తగ్గుతోంది. ఇన్‌స్టంట్ కార్డ్ డిస్కౌంట్లు, ట్రేడ్-ఇన్ ఆఫర్లతో సామ్‌సంగ్ తగ్గించిన ధరకే లభిస్తుంటే.. వన్‌ప్లస్ తక్కువ ప్రారంభ ధర, బాక్స్‌లోనే ఫాస్ట్ ఛార్జర్ ఇస్తూ పోటీగా నిలిచింది. అయితే నో-కాస్ట్ ఈఎంఐ (NCEMI) ఎంచుకునేటప్పుడు ప్రాసెసింగ్ ఫీజుల రూపంలో హిడెన్ ఛార్జీలు పడే అవకాశం ఉంది. అందుకే ఆర్డర్ కన్ఫర్మ్ చేసే ముందే ఫైనల్ చెక్ అవుట్ ప్రైస్‌ను సరిచూసుకోవడం ముఖ్యం.

సామ్‌సంగ్ గెలాక్సీ A56 5G వర్సెస్ వన్‌ప్లస్ నార్డ్ CE 6: ఫీచర్ల పోలిక

రోజువారీ వినియోగానికి, వీడియోగేమ్స్ ఆడేవారికి డిస్‌ప్లే క్వాలిటీ చాలా ముఖ్యం. సామ్‌సంగ్ అవుట్‌డోర్‌లో అద్భుతమైన బ్రైట్‌నెస్, కలర్స్‌తో మెరుగైన విజువల్ ఎక్స్‌పీరియన్స్‌ను అందిస్తుంది. మరోవైపు, వన్‌ప్లస్ 144Hz రిఫ్రెష్ రేట్‌తో చాలా స్మూత్ స్క్రోలింగ్ అనుభూతిని ఇస్తుంది. వన్‌ప్లస్‌లోని స్నాప్‌డ్రాగన్ చిప్‌సెట్ గేమింగ్ సమయంలో స్థిరమైన ఫ్రేమ్‌రేట్‌ను అందిస్తే, సుదీర్ఘ గేమింగ్ సెషన్లలో కూడా సామ్‌సంగ్ వేడెక్కకుండా బాగా పనిచేస్తుంది.

కెమెరా విషయానికి వస్తే.. రెండింటి ఫొటోగ్రఫీ శైలిలో వ్యత్యాసం ఉంది. గెలాక్సీ A56 5G నేచురల్ స్కిన్ టోన్లు, పర్ఫెక్ట్ హెచ్‌డీఆర్ (HDR) బ్యాలెన్స్‌తో మంచి ఫొటోలు తీస్తుంది. వన్‌ప్లస్ మాత్రం తక్కువ వెలుతురులో కూడా కలర్‌ఫుల్, షార్ప్ ఫొటోలను ఇస్తుంది. ఇక బ్యాటరీ లైఫ్ విషయంలో 8000 mAh భారీ బ్యాటరీతో వన్‌ప్లస్ చాలా ముందుకు వెళ్ళింది. పైగా బాక్స్‌లోనే 80W ఫాస్ట్ ఛార్జర్ వస్తుంది. సామ్‌సంగ్‌లో మాత్రం ఛార్జర్‌ను విడిగా కొనుగోలు చేయాల్సి ఉంటుంది.

సామ్‌సంగ్ గెలాక్సీ A56 5G vs వన్‌ప్లస్ నార్డ్ CE 6: ఏది కొంటే బెటర్?

సాఫ్ట్‌వేర్, నెట్‌వర్క్ విషయానికి వస్తే.. ఎక్కువ కాలం ఫోన్ వాడాలనుకునే వారి కోసం సామ్‌సంగ్ ఎక్కువ ఏళ్ల పాటు ఆండ్రాయిడ్ అప్‌డేట్లను ఇస్తోంది. ఇక వన్‌ప్లస్ క్లీన్ సాఫ్ట్‌వేర్ ఎక్స్‌పీరియన్స్‌తో పాటు మెరుగైన 5G కనెక్టివిటీని అందిస్తుంది. రోజంతా ఎక్కువగా ఫోన్ వాడేవారికీ, గేమర్లకు వన్‌ప్లస్ సరైన ఛాయిస్ కాగా.. ఆల్ రౌండ్ కెమెరా పర్ఫార్మెన్స్, ఎక్కువ కాలం సాఫ్ట్‌వేర్ సపోర్ట్ కోరుకునే వారికి గెలాక్సీ A56 5G బెస్ట్ ఆప్షన్ అవుతుంది.