సన్నని, స్టైలిష్‌ డిజైన్‌తో ఆకట్టుకుంటున్న గెలాక్సీ S25 ఎడ్జ్.. ధర, స్పెసిఫికేషన్లు లీక్!

Samsung Ultra-Slim Galaxy S25 Edge: శామ్‌సంగ్ అల్ట్రా థిన్‌ "గెలాక్సీ S25 ఎడ్జ్"ని గెలాక్సీ అన్‌ప్యాక్డ్‌ 2025 ఈవెంట్‌లో టీజ్ చేసింది. గెలాక్సీ S25 సిరీస్‌లో భాగమైన ఈ ఫోన్, తన సన్నని డిజైన్‌తో అందరి దృష్టిని ఆకర్షిస్తోంది. మినిమలిస్ట్ లుక్‌తో రాబోతున్న ఈ ఫోన్ ధర, ఫీచర్ల గురించి కొన్ని రూమర్స్ హాల్చల్ చేస్తున్నాయి. ఆ వివరాలు చూద్దాం.

* సన్నని డిజైన్, కొత్త పేరు

గెలాక్సీ S25 ఎడ్జ్, గెలాక్సీ S25 ప్లస్ మోడల్ కంటే సన్నగా ఉండనుంది. దీని మందం 6.4mm మాత్రమే. అదే S25 ప్లస్ మోడల్ 7.3mm మందంతో వస్తుంది. మొదట్లో ఈ ఫోన్‌ను "గెలాక్సీ S25 స్లిమ్" అని పిలుస్తారని అనుకున్నారు, కానీ శామ్‌సంగ్ చివరకు "ఎడ్జ్" అనే పేరును ఖరారు చేసింది.

ఈ పేరు గెలాక్సీ S7 ఎడ్జ్ ఫోన్‌ను గుర్తుకు తెస్తుంది. అయితే, ఈసారి కర్వ్డ్ డిస్‌ప్లేకు బదులుగా, సన్నని, షార్ప్ డిజైన్‌తో ఈ ఫోన్ రాబోతుంది.

* టీజర్ హైలైట్స్

ఈ ఈవెంట్‌లో శామ్‌సంగ్ సంస్థ గెలాక్సీ S25 ఎడ్జ్ ఫోన్‌ను కొద్దిసేపు చూపించింది. ఇది S25 సిరీస్‌లోని ఇతర మోడళ్లలాగే ఉన్నా, చూడటానికి చాలా సన్నగా ఉంది. ఈ ఫోన్‌లో వెనుకవైపు రెండు కెమెరాలు మాత్రమే ఉన్నాయి. మిగతా S25 మోడళ్లలో ఎక్కువ కెమెరాలు ఉన్నాయి.

* ఎక్స్‌పెక్టెడ్ ఫీచర్లు, స్పెసిఫికేషన్లు

కెమెరా: ఇందులో 200MP ప్రధాన సెన్సార్, అలాగే ఆప్టికల్ జూమ్ కోసం పెరిస్కోప్ లెన్స్ ఉన్నాయి. అంటే ఫొటోలు చాలా స్పష్టంగా వస్తాయి.

చిప్‌సెట్: ఈ ఫోన్ స్నాప్‌డ్రాగన్‌ 8 ఎలైట్ చిప్‌సెట్‌తో వస్తుందని భావిస్తున్నారు. అయితే, వేడిని తగ్గించడానికి, పనితీరును మెరుగుపరచడానికి కొద్దిగా మాడిఫైడ్ ప్రాసెసర్‌ను కూడా ఉపయోగించవచ్చని అంటున్నారు.

బ్యాటరీ: సన్నని డిజైన్ కోసం 4,000mAh బ్యాటరీని అమర్చారు.

సాఫ్ట్‌వేర్: ఇది ఆండ్రాయిడ్ 15 ఆధారిత వన్ UI 7తో వస్తుందని టాక్. దీని ద్వారా ఫోన్ వాడకం చాలా సులభంగా అనిపిస్తుంది.

AI ఫీచర్లు: గెలాక్సీ AI ఫీచర్లు కూడా ఇందులో ఉండనున్నాయి.

* ధర, విడుదల తేదీ (అంచనా)

గెలాక్సీ S25 Edge ఏప్రిల్ లేదా మే 2025లో విడుదలయ్యే అవకాశం ఉంది. దీని ధర గెలాక్సీ S25 ప్లస్, S25 అల్ట్రా ఫోన్ల మధ్యలో ఉంటుందని లీక్ స్టర్స్ చెబుతున్నారు. దీని ప్రారంభ ధర 1,299 డాలర్లు లేదా భారతదేశంలో రూ.1,00,000 కంటే తక్కువగా ఉండొచ్చు.

* ఎందుకు ప్రత్యేకమైనది..

శామ్‌సంగ్, గెలాక్సీ S25 ఎడ్జ్‌ని యాపిల్ ఐఫోన్ 17 ఎయిర్‌కి పోటీగా విడుదల చేస్తోంది. ఐఫోన్ 17 ఎయిర్ (iPhone 17 Air) కూడా సన్నని డిజైన్‌తో వస్తుందని పుకార్లు ఉన్నాయి. వెయిట్, థిక్నెస్ తక్కువగా ఉంటే సింగల్ హ్యాండ్ తో వినియోగించడం సులభం అవుతుంది. చాలామంది ఇవే ఫీచర్లు కోరుకుంటున్నారు.

"ఎడ్జ్" బ్రాండ్‌ను మళ్లీ తీసుకురావడం, సన్నని, స్టైలిష్ ఫోన్లను కోరుకునే వినియోగదారులను ఆకర్షించడమే శామ్‌సంగ్ లక్ష్యం అని తెలుస్తోంది. ఈ ఫోన్ టాప్-క్లాస్ పర్ఫామెన్స్ అందించనుందని ఇండస్ట్రీ ఎక్స్‌పర్ట్స్‌ అభిప్రాయాలు వ్యక్తం చేస్తున్నారు.