శామ్‌సంగ్ గెలాక్సీ S25 సిరీస్.. సరికొత్త RAM టెక్నాలజీతో నెక్స్ట్ లెవెల్ పెర్ఫార్మెన్స్!!

శామ్‌సంగ్ ఫ్యాన్స్‌కి ఒక కిక్కిచ్చే న్యూస్ వెలుగులోకి వచ్చింది. జనవరి 22, 2025న విడుదల కానున్న గెలాక్సీ S25 సిరీస్ ఊహించని మార్పులతో రాబోతోంది. డిజైన్ దగ్గరనుంచి పనితీరు వరకు, ప్రతి విషయంలోనూ ఈ కొత్త ఫోన్లు ప్రత్యేకంగా ఉండబోతున్నాయి.

ఇప్పటివరకు తెలిసిన సమాచారం ప్రకారం, శామ్‌సంగ్ తన 2025 ఫ్లాగ్‌షిప్ ఫోన్లను సరికొత్త టెక్నాలజీతో నింపేస్తోంది.

* కొత్త రామ్ టెక్నాలజీతో శామ్‌సంగ్ గెలాక్సీ S25 సిరీస్

గెలాక్సీ S25 సిరీస్‌లో శామ్‌సంగ్ సరికొత్త LPDDR5X RAMను ఉపయోగించబోతోంది. ఈ RAM 12 నానోమీటర్ల తయారీ విధానంతో వస్తోంది. ఇంతకు ముందు గెలాక్సీ S24 మోడళ్లలో వాడిన 13 నానోమీటర్ల RAMతో పోలిస్తే ఇది చాలా పెద్ద అప్‌గ్రేడ్. ఈ చిన్న సైజు చిప్ వల్ల ఫోన్ తక్కువ పవర్ తీసుకుంటుంది, వేడిని తగ్గించి, ముఖ్యంగా కష్టమైన పనులు చేసేటప్పుడు మంచి పనితీరును అందిస్తుంది.

ప్రస్తుతానికి, శామ్‌సంగ్ ఈ అధునాతన RAMను చిప్స్ కోసం మైక్రోన్‌తో పార్ట్‌నర్‌షిప్ కుదుర్చుకుంది. అయితే, భవిష్యత్తులో శామ్‌సంగ్ స్వయంగా తయారు చేసిన RAM కూడా ఈ ఫోన్లలో కనిపించనుంది.

* చిన్న ఫోన్‌లో కూడా అదిరిపోయే ఫీచర్లు..

చిన్న గెలాక్సీ ఫోన్లను ఇష్టపడేవారికి కూడా మంచి న్యూస్ వినిపిస్తోంది. బేస్ మోడల్ అయిన గెలాక్సీ S25 ఏకంగా 12GB RAMతో రాబోతోంది. గత మోడళ్లలో ఇది 8GB మాత్రమే ఉండేది. ఇక గెలాక్సీ S25 అల్ట్రా విషయానికొస్తే, 1TB స్టోరేజ్ వేరియంట్‌లో 16GB వరకు RAM ఉండొచ్చని సమాచారం. అంటే, ఎక్కువ యాప్స్ వాడేవారికి, ఒకేసారి చాలా పనులు చేసేవారికి ఇది గొప్ప అప్‌గ్రేడ్ అని చెప్పొచ్చు.

* పవర్‌ఫుల్ ప్రాసెసర్

ఈ కొత్త RAMతో పాటు, శక్తివంతమైన స్నాప్‌డ్రాగన్ 8 ఎలైట్ చిప్‌సెట్ కూడా గెలాక్సీ S25 సిరీస్‌లోని అన్ని మోడళ్లలో ఉండబోతోంది. ఈ రెండూ కలిస్తే ఫోన్ మరింత వేగంగా పనిచేస్తుంది, వేడి తగ్గుతుంది, శామ్‌సంగ్ ఆన్-డివైస్ AI ఫీచర్లను కూడా చాలా బాగా హ్యాండిల్ చేస్తుంది. దీంతో ఫోన్ పనితీరులో మీరు స్పష్టమైన మార్పును చూడొచ్చు.

* డిజైన్‌లోనూ సరికొత్త మార్పులు..

గెలాక్సీ S25 అల్ట్రా డిజైన్‌కు సంబంధించిన కొన్ని చిత్రాలు లీక్ అయ్యాయి. వాటిని చూస్తే, ఫోన్ మూలలు గుండ్రంగా ఉండబోతున్నాయని తెలుస్తోంది. దీనివల్ల ఫోన్‌ను పట్టుకోవడానికి చాలా సౌకర్యవంతంగా ఉంటుంది. అయితే, స్క్రీన్ మాత్రం ఫ్లాట్‌గానే ఉండనుంది. ఇక గెలాక్సీ S25, S25+ మోడళ్ల వెనుక కెమెరా చుట్టూ గెలాక్సీ Z ఫోల్డ్ 6లో కనిపించినట్టుగా రింగులు ఉండబోతున్నాయి.

* యాపిల్ తరహా ఫీచర్ శామ్‌సంగ్‌లోనూ

శామ్‌సంగ్ తన గెలాక్సీ S25 సిరీస్‌తో మాగ్నెటిక్ కేసులను కూడా పరిచయం చేయబోతోంది. ఇవి యాపిల్ మాగ్‌సేఫ్ లాగా పనిచేస్తాయి. ఈ కేసుల సహాయంతో ఫోన్‌ను అనుకూలమైన యాక్సెసరీలకు చాలా సులభంగా అటాచ్ చేసుకోవచ్చు. ఇది చాలా యూజ్‌ఫుల్ ఫీచర్ అని చెప్పొచ్చు.

* ఇవన్నీ ఎందుకంటే?

కొత్త 12nm RAM, వేడిని తగ్గించే టెక్నాలజీ, ఎక్కువ మెమరీ వంటి ఫీచర్లు గెలాక్సీ S25 సిరీస్‌ను అత్యుత్తమ పనితీరు, సామర్థ్యంతో నింపడానికి ఉపయోగపడతాయి. వీటికి సరికొత్త డిజైన్, యాక్సెసరీలు తోడవ్వడంతో, ఈ సిరీస్ శామ్‌సంగ్‌కి ఒక మైలురాయిగా నిలిచిపోతుందని చెప్పడంలో ఎలాంటి సందేహం లేదు.