స్మార్ట్‌ఫోన్లపై జీఎస్టీ తగ్గింపు: రూ.20 వేల లోపు ఫోన్ కొనేవారు ఇప్పుడే కొనాలా? లేక అక్టోబర్ వరకు ఆగాలా?

నిజానికి 57వ జీఎస్టీ కౌన్సిల్ సమావేశం సెప్టెంబర్ 12న జరగాల్సి ఉంది. కానీ BRICS సదస్సు కారణంగా ఈ భేటీని అక్టోబర్ 7కు వాయిదా వేశారు. ఈ సమావేశం న్యూఢిల్లీలో జరగనుంది. ప్రస్తుతం స్మార్ట్‌ఫోన్లపై 18 శాతం వస్తు సేవల పన్ను (GST) అమలవుతోంది. దీంతో రూ.10,000, రూ.15,000, రూ.20,000 బడ్జెట్ పరిధిలో కొత్త ఫోన్ కొనాలనుకునే కొనుగోలుదారులు.. 'ఇప్పుడే కొనేయాలా? లేక జీఎస్టీ మీటింగ్ వరకు ఆగాలా?' అనే అయోమయంలో పడ్డారు. జీఎస్టీ మార్పుల అంచనాలు, పన్ను తగ్గితే మారే ధరల లెక్కలు, అసలు ఎవరు వేచి చూడాలనే వివరాలు ఈ ఆర్టికల్‌లో తెలుసుకుందాం.

ఈ కామర్స్ ప్లాట్‌ఫారమ్‌లలో కనిపించే మొబైల్ ధరలన్నీ (MOP) జీఎస్టీతో కలిపే ఉంటాయి. ఒకవేళ ప్రభుత్వం పన్ను తగ్గిస్తే, స్మార్ట్‌ఫోన్ కంపెనీలు ఆ ప్రయోజనాన్ని కస్టమర్లకు పూర్తిగా బదిలీ చేస్తే ఫోన్ల ధరలు తగ్గుతాయి. ప్రస్తుతం ఉన్న 18 శాతం పన్ను ఆధారంగా.. జీఎస్టీని 12 శాతానికి లేదా 5 శాతానికి తగ్గిస్తే ధరల్లో ఎంత వ్యత్యాసం ఉంటుందో లెక్కిద్దాం. మిగతా వస్తువులపై పన్ను తగ్గింపు కష్టమేనని అధికారులు సంకేతాలిచ్చినప్పటికీ, ఫోన్లపై మాత్రం జీఎస్టీ తగ్గించే అవకాశం ఉందనే చర్చ నడుస్తోంది.

ఫోన్లపై జీఎస్టీ తగ్గింపు: రూ.20 వేల లోపు ఫోన్ల ధరల లెక్కలివే!

జీఎస్టీ స్లాబ్‌లు తగ్గితే మీరు కొనే ఫోన్ ధరపై పడే ఇంపాక్ట్ ఇక్కడ చూడవచ్చు. ప్రస్తుత ధర ఆధారంగా బేస్ ప్రైస్‌ను లెక్కించి, దానికి 12 శాతం, 5 శాతం జీఎస్టీని వర్తింపజేసి ఈ చార్ట్ రూపొందించాం. ఇక్కడ పేర్కొన్న సంఖ్యలను రౌండ్ ఆఫ్ చేశాం. అయితే బ్రాండ్, సేల్ ఛానెల్‌ను బట్టి అసలు తగ్గింపులో స్వల్ప మార్పులు ఉండవచ్చు.

రూ.10k / ₹15k / ₹20k కొనుగోలుదారులు: ఆగాలా? ఇప్పుడే కొనేయాలా?

మీ పాత ఫోన్ పూర్తిగా పాడైపోయి, అత్యవసరంగా ఫోన్ కావాల్సిన విద్యార్థులు, మొదటిసారి 5జీ ఫోన్ కొనేవారు పెద్దగా ఆలోచించకుండా ఇప్పుడే కొనేయడం మంచిది. ఆన్‌లైన్ క్లాసులకు సరిపోయే కెమెరా, బలమైన బ్యాటరీ, నమ్మకమైన 5జీ నెట్‌వర్క్ దొరుకుతున్నప్పుడు స్వల్ప పన్ను తగ్గింపు కోసం ఆగాల్సిన పనిలేదు. అయితే గేమర్లు, పవర్ యూజర్లు మాత్రం అక్టోబర్ 7 వరకు వేచి చూడవచ్చు. జీఎస్టీపై స్పష్టత వచ్చాక బ్యాంకు ఆఫర్లతో కలిపి మంచి డీల్ సొంతం చేసుకోవచ్చు. ఇక రూ.10,000 లోపు ఫోన్ కొనేవారు బ్యాటరీ, బిల్డ్ క్వాలిటీకి ప్రాధాన్యమివ్వాలి. రూ.15,000 పరిధిలో డిస్‌ప్లే, కెమెరాలకు.. రూ.20,000 బడ్జెట్‌లో ప్రొసెసర్ థర్మల్స్ (హీటింగ్ కంట్రోల్), ఛార్జింగ్ స్పీడ్‌కు ప్రాధాన్యత ఇవ్వడం మంచిది.

జీఎస్టీ సమావేశం, సేల్ సీజన్ టైమింగ్.. 'పన్ను తగ్గింపు' ప్రచారాల్లో నిజమెంత?

సాధారణంగా ఆన్‌లైన్ దిగ్గజాల బిగ్ సేల్స్ సెప్టెంబర్ చివరి వారంలో మొదలై అక్టోబర్ వరకు కొనసాగుతాయి. బ్యాంక్ ఆఫర్లతో వచ్చే ఈ సేల్స్ సీజన్‌లోనే అమెజాన్ 'గ్రేట్ ఇండియన్ ఫెస్టివల్', ఫ్లిప్‌కార్ట్ 'బిగ్ బిలియన్ డేస్' సేల్స్ వచ్చే అవకాశం ఉంది. అయితే, ప్రభుత్వ అధికారిక నోటిఫికేషన్ విడుదలయ్యాకే అసలైన జీఎస్టీ తగ్గింపు వర్తిస్తుంది తప్ప, యాడ్ బ్యానర్లను చూసి మోసపోవద్దు. పన్ను తగ్గితే మీ కార్ట్ లేదా ఇన్వాయిస్‌లోని 'టాక్స్' వివరాల్లో అది స్పష్టంగా కనిపిస్తుంది. అంతవరకూ 'జీఎస్టీ కట్' అని కనిపించే ప్రకటనలను కేవలం మార్కెటింగ్ ప్రచారాలుగానే భావించి, ఆఫర్లన్నీ పోను తుది ధర ఎంత పడుతోందో పోల్చి చూసుకుని కొనడం శ్రేయస్కరం.