UPIలో సరికొత్తగా 'టాప్ & పే' ఫీచర్.. క్యూఆర్ కోడ్ స్కాన్ అవసరం లేదు, ఏఐతో సమస్యలకు చెక్!

భారత యూనిఫైడ్ పేమెంట్స్ ఇంటర్‌ఫేస్ (UPI) సెప్టెంబర్ 11న రెండు సరికొత్త ఫీచర్లను అందుబాటులోకి తెచ్చింది. దుకాణాల్లో క్యూఆర్‌ కోడ్ స్కాన్ చేయాల్సిన అవసరం లేకుండా నేరుగా చెల్లింపులు చేసే 'టాప్ & పే' (Tap & Pay) ఒకటైతే, యూజర్ల సందేహాలు, సమస్యలను పరిష్కరించేందుకు ఏఐతో పనిచేసే 'మైయూపీఐ' (MyUPI) రెండోది. గ్లోబల్ ఫిన్‌టెక్ ఫెస్ట్ 2026 వేదికగా వీటిని ప్రకటించారు. యూజర్లకు డిజిటల్ చెల్లింపులను మరింత వేగవంతంగా, సులభంగా మార్చడమే వీటి ప్రధాన లక్ష్యం. 'టాప్ & పే' వల్ల బిల్లింగ్ కౌంటర్ వద్ద సమయం ఆదా అవుతుంది. ఇక 'మైయూపీఐ' ద్వారా వివిధ బ్యాంకులు, పేమెంట్ యాప్‌ల మధ్య ఉండే లావాదేవీల సమస్యలు చకచకా పరిష్కారమవుతాయి. ఇవి ఏదో ఒక యాప్‌కే పరిమితం కాకుండా యూపీఐ నెట్‌వర్క్ మొత్తంలో అందుబాటులోకి రానున్నాయి.

'టాప్ & పే' విధానంలో క్యూఆర్‌ కోడ్‌ను స్కాన్ చేయాల్సిన పనిలేదు. ఇది నియర్-ఫీల్డ్ కమ్యూనికేషన్ (NFC) సాంకేతికతతో పనిచేస్తుంది. కొత్తగా వస్తున్న యూపీఐ క్యూఆర్‌ కోడ్‌లు లేదా స్మార్ట్ సౌండ్‌పాడ్‌లపై ఉండే "Tap here" ఐకాన్ వద్ద ఫోన్‌ను తాకిస్తే పేమెంట్ పూర్తవుతుంది. ఆండ్రాయిడ్ యూజర్లు ముందుగా గూగుల్ పే ఓపెన్ చేసి, 'Tap & Pay' ఆప్షన్‌పై క్లిక్ చేయాలి. ఆ తర్వాత పేమెంట్ అమౌంట్ ఎంటర్ చేసి, పేమెంట్ టెర్మినల్ వద్ద ఫోన్‌ను ఉంచాలి. ఒకవేళ యూపీఐ లైట్ (UPI Lite) ఉపయోగిస్తుంటే, ₹500 కంటే తక్కువ ఉండే చెల్లింపులకు పిన్ ఎంటర్ చేయాల్సిన అవసరం కూడా ఉండదు.

UPI టాప్ & పే: ఎలా ఉపయోగించాలి? సపోర్ట్ చేసే ఫోన్లు, పిన్ నియమాలు ఇవే!

ఈ సదుపాయం NFC సపోర్ట్ ఉన్న ఆండ్రాయిడ్ ఫోన్లలో మాత్రమే పనిచేస్తుంది. దీనికోసం ఫోన్ Settings లోని 'NFC and Contactless payments' విభాగంలో మీ పేమెంట్ యాప్‌ను డిఫాల్ట్‌గా సెట్ చేసుకోవాలి. ప్రస్తుతం ఐఫోన్లలో (iPhones) ఈ యూపీఐ టాప్ & పే సపోర్ట్ చేయదు. యాపిల్ ఇచ్చిన 'Tap to Pay' ఫీచర్ కేవలం వ్యాపారుల వాడకానికి మాత్రమే పరిమితం. ₹500 కంటే ఎక్కువ మొత్తాన్ని పేమెంట్ చేసేటప్పుడు గూగుల్ పే యూపీఐ పిన్‌ను అడుగుతుంది. ఒకవేళ బయోమెట్రిక్ యూపీఐ ఎనేబుల్ చేసి ఉంటే పిన్ అవసరం ఉండదు. ప్రస్తుతం ఫోన్‌పే, భీమ్ యాప్‌లు ఈ బయోమెట్రిక్ యూపీఐ సదుపాయాన్ని అందిస్తున్నాయి. దీని పరిమితిని ఎన్‌పీసీఐ (NPCI) రూ.10,000 వరకు పెంచింది.

MyUPI AI: ప్రత్యేకతలు, సపోర్ట్.. ఇది యూజర్లకు ఎలా ఉపయోగపడుతుంది?

ఎన్‌పీసీఐ రూపొందించిన 'FiMI' స్మాల్ లాంగ్వేజ్ మోడల్‌ ఆధారంగా 'MyUPI' పనిచేస్తుంది. వివిధ యూపీఐ యాప్‌లకు సంబంధించి కస్టమర్ సపోర్ట్‌ను ఒకే తాటిపైకి తీసుకురావడమే దీని ముఖ్య ఉద్దేశం. దీని ద్వారా లావాదేవీలు, ఆటో పే మ్యాండేట్‌ల వివరాలను ఒకేచోట చూడవచ్చు. పేమెంట్ సమస్యలు ఎదురైనప్పుడు యూజర్లకు సరైన పరిష్కారం చూపుతుంది. అలాగే లావాదేవీల సమయంలో భద్రతా సూచనలను ఇస్తుంది. ఇది కేవలం ఏదో ఒక యాప్‌ చాట్‌బాట్ కాదని, మొత్తం యూపీఐ ఇకోసిస్టమ్‌కు సపోర్ట్ ఇచ్చే హెల్ప్‌డెస్క్ అని అధికారులు తెలిపారు. దీనివల్ల సమస్యలు వచ్చినప్పుడు బ్యాంకులు, యాప్‌ల చుట్టూ తిరిగే తిప్పలు తప్పుతాయి.

రోల్‌అవుట్, సేఫ్టీ టిప్స్: ఈ 'టాప్ & పే' ఫీచర్‌ను ఎక్కడ ట్రై చేయవచ్చు?

యూపీఐ క్యూఆర్‌ కోడ్‌లు, డైనమిక్ క్యూఆర్‌ స్క్రీన్‌లు లేదా స్మార్ట్ సౌండ్‌పాడ్‌లపై "Tap to Pay" గుర్తు కనిపిస్తే ఈ ఫీచర్‌ను ఉపయోగించవచ్చు. ముందుగా ప్రముఖ షాపింగ్ మాల్స్, సూపర్‌మార్కెట్లలో ఇది అందుబాటులోకి రానుంది. ఒకవేళ మీ ఫోన్ పోయినట్లయితే.. వెంటనే ఫోన్‌ను లాక్ లేదా రీసెట్ (Wipe) చేయాలి. ఆ తర్వాత మీ బ్యాంక్ లేదా 'డిజీసాథి' (DigiSaathi)ని సంప్రదించి యూపీఐ ఖాతాను, యూపీఐ లైట్‌ను బ్లాక్ చేయాలని కోరాలి. సురక్షితమైన వాడకం కోసం అవసరం లేనప్పుడు ఫోన్లో NFC ఆఫ్‌ చేసి ఉంచడం మంచిది. అలాగే రూటెడ్ (Rooted) ఫోన్లలో వీటిని వాడకపోవడమే మంచిది.