Airtel సరికొత్త అంతర్జాతీయ రోమింగ్ ప్లాన్.. 189 దేశాల్లో అన్‌లిమిటెడ్ డేటా..!

Airtel International Roaming Plan : విదేశాలకు వెళ్లే భారతీయుల కోసం ఎయిర్‌టెల్ ఒక అదిరిపోయే కొత్త అంతర్జాతీయ రోమింగ్ (IR) ప్లాన్‌ను తీసుకొచ్చింది. ఇది విదేశాల్లో భారతీయులు తమ ఫోన్లను వాడుకునే విధానాన్నే మార్చేయనుంది. ఈ ప్లాన్ ద్వారా ఏకంగా 189 దేశాల్లో అన్‌లిమిటెడ్ డేటా వాడుకోవచ్చు. ఈ ప్లాన్ వల్ల, తరచుగా విదేశాలకు వెళ్లేవారు.. విదేశాల్లో ఉన్నప్పుడు కూడా, ఇండియాలో లాగానే సులభంగా ఆన్‌లైన్‌లో ఉండొచ్చు, తమ ఫోన్‌ను వాడుకోవచ్చు.

* ప్రపంచమంతటికీ ఒకే ప్లాన్:
వేర్వేరు దేశాలకు వేర్వేరు ప్యాక్‌లు ఎంచుకునే తలనొప్పికి చెక్ పెడుతూ, అన్నింటికీ కలిపి ఒకే ఒక్క సింపుల్ ప్లాన్‌ను ఎయిర్‌టెల్ మన ముందుకు తెచ్చింది సాధారణంగా ఉండే ప్రాంతాన్ని బట్టి, దేశాన్ని బట్టి మారే రోమింగ్ ప్లాన్‌ల లాగా కాకుండా, ఎయిర్‌టెల్ తెచ్చిన ఈ కొత్త ప్లాన్ ఏకంగా 189 దేశాల్లోనూ ఒకేలా పనిచేస్తుంది.

అంటే, విదేశాలకు వెళ్లినప్పుడు సిమ్ కార్డులు మార్చాల్సిన పని లేదు, అక్కడికి వెళ్లాక లోకల్ ఆపరేటర్ల కోసం వెతుక్కోవాల్సిన అవసరం అంతకన్నా లేదు. విదేశీ గడ్డపై అడుగుపెట్టగానే, ఈ సర్వీసులు వాటంతటవే యాక్టివేట్ అయిపోతాయి. ముఖ్యంగా, ఏడాదిలో చాలా దేశాలు తిరిగే వ్యాపారవేత్తలకు, ఎన్నారైలకు ఈ ఒకే ప్లాన్ ఎంతో సౌకర్యంగా ఉంటుంది.

* రూ.4000 ప్లాన్: ఇండియాలోనూ, విదేశాల్లోనూ డబుల్ బెనిఫిట్స్..
ఈ కొత్త ఆఫర్‌లో భాగంగా ఎయిర్‌టెల్ రూ.4000లతో ఒక ప్రత్యేక అంతర్జాతీయ రీఛార్జ్ ప్లాన్‌ను కూడా పరిచయం చేసింది. ఈ ప్లాన్‌తో, అంతర్జాతీయంగా వాడుకోవడానికి 5GB డేటా, 100 నిమిషాల వాయిస్ కాల్స్ (మాట్లాడుకోవడానికి) లభిస్తాయి. దీని వ్యాలిడిటీ ఏకంగా ఒక సంవత్సరం ఉంటుంది.

అంతేకాదు, ఇదే ప్లాన్‌తో ఇండియాలో ఉన్నప్పుడు రోజుకు 1.5GB డేటా, అపరిమిత వాయిస్ కాల్స్ కూడా వస్తాయి. అంటే, ఈ ప్యాక్ విదేశాల్లోనే కాదు, మన దేశంలో ఉన్నప్పుడు కూడా ఉపయోగపడుతుంది. రెండు రకాలుగానూ మంచి విలువను అందిస్తుంది. దీనివల్ల కస్టమర్లు చాలా లాభపడతారు.

* విమానంలోనూ కనెక్టివిటీ, 24/7 సపోర్ట్..
ఈ ప్లాన్‌తో విమానంలో ప్రయాణిస్తున్నప్పుడు కూడా కనెక్టివిటీ ఉంటుంది. ఎంపిక చేసిన విమానయాన సంస్థల ఫ్లైట్స్‌లో 250MB డేటా వాడుకోవచ్చు. దీనితో ప్రయాణంలో ఉన్నప్పుడు బ్రౌజ్ చేయడం, మెసేజ్‌లు పంపడం, లేదా కాల్స్ చేసుకోవడం వంటివి చేయొచ్చు. ప్రయాణ సమయంలో ఏవైనా సమస్యలు వస్తే సహాయం కోసం ఎయిర్‌టెల్ 24/7 కస్టమర్ సపోర్ట్‌ను కూడా అందిస్తోంది.

* ఆటో-రెన్యూవల్, యాప్ ద్వారా సులభమైన కంట్రోల్
తరచుగా విదేశీ ప్రయాణాలు చేసేవారికి మరింత సులభతరం చేయడానికి, ఎయిర్‌టెల్ ఆటో-రెన్యూవల్ ఆప్షన్‌ను కూడా జోడించింది. ప్లాన్‌కు సంబంధించిన పూర్తి వివరాలు, అంటే డేటా వాడకం ఎంతైంది, బిల్లింగ్ వివరాలు, అవసరమైతే అదనపు డేటా లేదా నిమిషాలు యాడ్ చేసుకోవడం వంటివన్నీ ఎయిర్‌టెల్ థ్యాంక్స్ యాప్ ద్వారానే సులభంగా మేనేజ్ చేసుకోవచ్చు.

* ట్రావెల్ సిమ్‌లకు బదులుగా స్మార్ట్, సురక్షితమైన ఆప్షన్
ఎయిర్‌పోర్టుల్లో దొరికే లోకల్ లేదా ఇంటర్నేషనల్ సిమ్‌లతో పోలిస్తే, ఈ ప్లాన్ చాలా తెలివైన మరియు సురక్షితమైన ప్రత్యామ్నాయం అని ఎయిర్‌టెల్ చెబుతోంది. ఎందుకంటే, ఆ సిమ్‌లు కొనడానికి తరచుగా గుర్తింపు రుజువులు సమర్పించాల్సి ఉంటుంది, వాటి నమ్మకం కూడా ఒక్కోసారి ప్రశ్నార్థకమే.

కొన్ని ట్రావెల్ సిమ్‌లు 5GB కంటే ఎక్కువ డేటా ఇవ్వొచ్చు గానీ, ఎయిర్‌టెల్ అందిస్తున్న ఈ ప్లాన్‌తో మీ సొంత ఇండియన్ నంబర్‌నే వాడుకునే సౌలభ్యం ఉంటుంది. విదేశాల్లో వేరే ఫోన్ సెటప్ అవసరం లేకుండా మీ పనులు చక్కబెట్టుకోవచ్చు. అయితే ఇక్కడ ఒక విషయం గమనించాలి.

* ఫెయిర్ యూసేజ్ పాలసీ (FUP) వర్తిస్తుంది
ఈ ప్లాన్ అన్‌లిమిటెడ్ డేటా అని చెబుతున్నా, నెట్‌వర్క్ నాణ్యతను కాపాడటానికి 'ఫెయిర్ యూసేజ్ పాలసీ' (FUP) అమలులో ఉంటుంది. అంటే, నిర్దిష్ట డేటా పరిమితిని దాటిన తర్వాత, వేగం తగ్గించబడుతుంది. ఇది దుర్వినియోగాన్ని నివారించడానికి ఉద్దేశించినది. అయితే, వేగం తగ్గినా కూడా యూజర్లు కనెక్టెడ్‌గానే ఉంటారు, ఆన్‌లైన్ సేవలు వాడుకోవచ్చు.