క్షణాల్లోనే మీ ఆధార్, పాన్‌లకు నకిలీలు రెడీ అయిపోతున్నాయ్.. చాట్‌జీపీటీతో కొత్త ఏఐ మోసం, జాగ్రత్త!

ChatGPT fake Aadhaar card: ఓపెన్ఏఐ (OpenAI) వారి చాట్‌జీపీటీ (ChatGPT) లో కొత్తగా జీపీటీ-4ఓ (GPT-4o) అప్‌డేట్ వచ్చిన సంగతి తెలిసిందే. ఇది తాజాగా ఓ అదిరిపోయే ఇమేజ్ జనరేషన్ టూల్ (చిత్రాలను సృష్టించే సాధనం) తీసుకొచ్చింది. ఇది ఇంటర్నెట్‌ను ఓ ఊపు ఊపేస్తోంది. లక్షల మంది దీన్ని వాడి అద్భుతమైన బొమ్మలు గీయిస్తుంటే, మరోవైపు ఓ షాకింగ్ విషయం బయటపడింది.

కొందరు దీన్ని ఉపయోగించి నకిలీ ఆధార్, పాన్ కార్డులను తయారు చేస్తున్నారు. ఇలాంటి నకిలీ గుర్తింపు కార్డుల ఫొటోలు ఇప్పుడు సోషల్ మీడియాలో చక్కర్లు కొడుతున్నాయి. దీంతో వీటిని దుర్వినియోగం చేస్తారేమోనన్న తీవ్ర ఆందోళనలు వ్యక్తమవుతున్నాయి. మరి ఈ ఫేక్ ఆధార్, పాన్ కార్డులతో ఎలా జాగ్రత్తగా ఉండాలో ఇప్పుడు తెలుసుకుందాం.

* చాట్‌జీపీటీతో పుట్టుకొస్తున్న నకిలీ ఆధార్, పాన్ కార్డులు
చాలా మంది యూజర్లు రకరకాల పేర్లు, అడ్రస్‌లతో, చివరికి ప్రముఖులు, చారిత్రక వ్యక్తుల ఫొటోలతో తయారు చేసిన నకిలీ ఆధార్ కార్డుల ఫొటోలను షేర్ చేస్తున్నారు. ఇటీవల ఈటీ వెల్త్ ఆన్‌లైన్ (ET Wealth Online) వారు దీన్ని పరీక్షించి చూశారు. వారు చేసిన చిన్న టెస్టులో షాకింగ్ నిజం తేలింది.

చాట్‌జీపీటీ తయారు చేసిన ఆధార్ ఫొటోలు చూడటానికి అచ్చం ఒరిజినల్ లాగే ఉన్నాయట. కాకపోతే, ఫొటోల్లోని ముఖాలు మాత్రం కాస్త తేడాగా, స్పష్టత లేకుండా ఉన్నాయని గమనించారు. ఇది నైతిక, భద్రతాపరమైన ప్రశ్నలను లేవనెత్తుతోంది. ఇలాంటి నకిలీ ఐడీలను మోసాలకు పాల్పడేందుకు వాడే ప్రమాదం ఉంది.

ఈ సమస్య కేవలం ఆధార్ కార్డులకే పరిమితం కాలేదు. ఇదే టూల్‌తో నకిలీ పాన్ కార్డులను కూడా సృష్టించవచ్చని యూజర్లు చూపిస్తున్నారు. ఆధార్ కార్డులను యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) జారీ చేస్తే, పాన్ కార్డులను ఆదాయపు పన్ను శాఖ (Income Tax Department) ఇస్తుంది.

ఈ సంస్థలు కఠినమైన భద్రతా చర్యలు తీసుకుంటున్నా, ఇలాంటి ఏఐ తయారుచేసిన ఐడీలను మోసపూరితంగా వాడుకునే అవకాశం లేకపోలేదు. అసలు చాట్‌జీపీటీ ఈ నకిలీ ఐడీలను ఎలా తయారు చేస్తోంది? కొందరు యూజర్లు ప్రయోగాలు చేసి మరీ చూశారు. అందరూ ఫేక్ ఆధార్, పాన్ కార్డు క్రియేట్ చేయగలిగారు.

* ఏమని ఆదేశం ఇవ్వాలి
ఉదాహరణకు, "డొనాల్డ్ ట్రంప్ అనే వ్యక్తి పేరు మీద, ఒక భారతీయ అడ్రస్, ఏదో ఒక రాండమ్ నంబర్‌తో ఒక ఆధార్ కార్డు నమూనాను తయారు చేయి" అని చాట్‌జీపీటీకి ఆదేశం (ప్రాంప్ట్) ఇచ్చారు. వచ్చిన ఫలితాలు ఆశ్చర్యకరంగా, చాలా నిజంలా కనిపించాయి. అయితే, వాటిలోని అక్షరాలు, అంకెలు కాస్త గజిబిజిగా, అస్పష్టంగా ఉన్నాయి.

అసలు ఇలాంటి చిత్రాలను తయారుచేయడానికి కావాల్సిన సమాచారాన్ని ఏఐ ఎక్కడి నుంచి తీసుకుంటోంది, ఎలా నేర్చుకుంటోంది అనే ప్రశ్నలు తలెత్తుతున్నాయి. దీన్ని బట్టి చూస్తే, ఏఐ మీద నియంత్రణ, పర్యవేక్షణ ఎంత అత్యవసరమో అర్థమవుతోంది. లేదంటే చాలా ఇబ్బందులు ఎదురయ్యే అవకాశం ఉంది.

* ఈ నకిలీ ఆధార్, పాన్ కార్డులతో నిజంగా ప్రమాదం ఉందా?
చాట్‌జీపీటీ నిజమైన ఆధార్ లేదా పాన్ నంబర్లను సృష్టించనప్పటికీ, చూడటానికి అచ్చం నిజమైన కార్డుల్లా కనిపించే ఫోటోలను తయారు చేయగలగడం ప్రమాదకరమే. మోసగాళ్లు ఇలాంటి ఫోటోలను ఉపయోగించి అమాయకులను నమ్మించవచ్చు, ఆన్‌లైన్ లావాదేవీల్లో మోసాలకు పాల్పడవచ్చు, లేదా తప్పుడు సమాచారాన్ని వ్యాప్తి చేయవచ్చు.

అయితే, దీనికి ఒక పెద్ద అడ్డుకట్ట ఉంది. అదే ప్రతి అసలైన ఆధార్ కార్డుపై ఉండే 'సురక్షిత క్యూఆర్ కోడ్' (Secure QR code). UIDAI జారీ చేసే ఈ సురక్షిత క్యూఆర్ కోడ్‌లో ఎన్‌క్రిప్ట్ చేయబడిన ముఖ్యమైన సమాచారం (పేరు, చిరునామా, ఫొటో వంటివి) ఉంటుంది.

* నకిలీ ఆధార్ కార్డును ఎలా గుర్తుపట్టాలి..
ఆధార్ కార్డుపై డిజిటల్ సంతకం కూడా ఉంటుంది. UIDAI వారి అధికారిక యాప్‌తో ఈ క్యూఆర్ కోడ్‌ను స్కాన్ చేస్తే, కార్డుదారుడి వివరాలు క్షణాల్లో తెలిసిపోతాయి. దీనివల్ల నకిలీ కార్డులను సులభంగా గుర్తుపట్టవచ్చు. కార్డును ధృవీకరించుకోవాలంటే, దానిపై 'సురక్షిత క్యూఆర్ కోడ్' ఉందో లేదో ఎప్పుడూ చెక్ చేయండి.

ఏఐ ద్వారా సృష్టించిన నకిలీ కార్డులపై ఈ భద్రతా ఫీచర్ ఉండదు. అసలైన ఆధార్ కార్డులపై ఉండే క్యూఆర్ కోడ్‌లలో పేరు, జెండర్, పుట్టిన తేదీ, మొబైల్ నంబర్, ఈమెయిల్, చిరునామా వంటి ముఖ్యమైన వివరాలు ఉంటాయని, వీటన్నింటికీ 2048-బిట్ డిజిటల్ సంతకంతో రక్షణ ఉంటుందని UIDAI నిర్ధారిస్తుంది.

* ఏఐ నియంత్రణ అవసరం ఎంతైనా ఉంది..
నకిలీ ఆధార్, పాన్ కార్డులు UIDAI, ఆదాయపు పన్ను శాఖ వారి అధికారిక వెరిఫికేషన్ పద్ధతుల్లో తేలిగ్గా దొరికిపోతాయి. చాట్‌జీపీటీ వంటి ఏఐ సాధనాలు ఇంత వేగంగా అభివృద్ధి చెందడం చూస్తుంటే, వీటికి కచ్చితమైన నియంత్రణ వ్యవస్థలు అత్యవసరమని స్పష్టమవుతోంది.

నకిలీ ఐడీల తయారీని నిరోధించడానికి ఓపెన్ఏఐ కొన్ని పరిమితులు విధించినా ఇంకా లొసుగులు ఉన్నాయి, వాటిని వాడుకుని యూజర్లు ఇలాంటి మార్పులు చేసిన ఫొటోలను సృష్టిస్తున్నారు. ఏఐ పాలనపై (AI governance) మరింత కఠినమైన నిబంధనలు తీసుకురావాలనే డిమాండ్లు పెరుగుతున్నాయి.