అమెజాన్ ఎకో స్పాట్ ఇండియాలో రిలీజ్.. ఫీచర్లు అదుర్స్.. ధర ఎంతంటే..?

ఈ-కామర్స్ దిగ్గజం అమెజాన్ షాపింగ్ సర్వీసులకే పరిమితం కాకుండా అనేక స్మార్ట్ హోమ్ డివైజ్‌లు కూడా లాంచ్ చేస్తూ వినియోగదారులను ఆకట్టుకుంటోంది. తాజాగా ఈ సంస్థ తన సరికొత్త "ఎకో స్పాట్" స్మార్ట్ అలారం క్లాక్‌ను ఇండియాలో లాంచ్ చేసింది.

రూ.8,999 ధరతో విడుదలైన ఈ గ్యాడ్జెట్, అలెక్సా పవర్‌తో స్మార్ట్‌గా పనిచేస్తుంది. దీని 2.83-అంగుళాల టచ్‌స్క్రీన్, చూడగానే ఆకట్టుకునే డిజైన్‌తో పాటు, కస్టమ్ అలారాలు, స్మార్ట్ హోమ్ కంట్రోల్స్, అలెక్సా ఫీచర్లన్నీ ఇందులో ఉన్నాయి.

ఈ ఎకో స్పాట్ క్లాక్ బెడ్‌రూమ్ ఎక్స్‌పీరియన్స్ మరింత మెరుగుపరుస్తుంది. ఇది కేవలం సమయాన్ని చూపించే సాధారణ గడియారం కాదు. అలెక్సా వాయిస్ కమాండ్స్‌తో స్మార్ట్ హోమ్ డివైజ్‌లను కంట్రోల్ చేయడం నుంచి ఇష్టమైన పాటలు వినడం వరకు, వాతావరణం గురించి తెలుసుకోవడం నుంచి క్యాలెండర్ అప్‌డేట్‌ల వరకు అన్నీ చేయవచ్చు.

* డిస్‌ప్లే

దీని డిస్‌ప్లేని నచ్చినట్లు మార్చుకోవచ్చు. 8 స్పెషల్ క్లాక్ ఫేస్‌లు, ఆరు కలర్ ఆప్షన్స్‌తో (ఆరెంజ్, టీల్, మెజెంటా వంటివి) మీ గదికి సరిపోయేలా సెట్ చేసుకోవచ్చు. క్లాక్ ఫేస్‌లకు తగ్గ రంగులను ఎంచుకుని బెడ్ రూమ్ లుక్కే మార్చేయొచ్చు.

* అలారం ఫీచర్లు

అలారాల విషయంలో కూడా ఎకో స్పాట్ అదిరిపోయే ఫీచర్లను అందిస్తోంది. ఇష్టమైన పాటలను అలారం టోన్‌గా సెట్ చేసుకోవచ్చు లేదా "అరోరా", "డేబ్రేక్" వంటి ప్రీలోడ్ చేసిన ట్యూన్లను ఎంచుకోవచ్చు. ఇంకా ముఖ్యమైన విషయం ఏంటంటే, స్నూజ్ చేయాలంటే స్క్రీన్‌ను టచ్ చేయాల్సిన అవసరం లేదు, "అలెక్సా, స్నూజ్" అని చెప్తే చాలు.

* సౌండ్ క్వాలిటీ

సౌండ్ క్వాలిటీ విషయంలో కూడా ఎకో స్పాట్ ఏ మాత్రం తీసిపోదు. 1.73-అంగుళాల ఫ్రంట్-ఫైరింగ్ స్పీకర్‌తో క్రిస్టల్ క్లియర్ సౌండ్, మంచి బేస్‌ను అందిస్తుంది. అంతేకాదు, అమెజాన్ మ్యూజిక్, స్పాటిఫై, జియోసావ్న్ వంటి వాటి నుంచి ఇష్టమైన పాటలు, పాడ్‌కాస్ట్స్‌, ఆడియోబుక్స్‌ను వినొచ్చు. పాట ప్లే అవుతున్నప్పుడు స్క్రీన్‌పై టైటిల్, ఇతర వివరాలు కూడా కనిపిస్తాయి.

* స్మార్ట్ హోమ్ ఇంటిగ్రేషన్

ఎకో స్పాట్ అలెక్సా సపోర్ట్ చేసే అన్ని స్మార్ట్ డివైజ్‌లతోనూ పనిచేస్తుంది. లైట్లు, ఫ్యాన్లు, ఇతర అప్లయెన్సెస్‌ను అలెక్సా రూటీన్స్‌తో కంట్రోల్ చేయవచ్చు. అంతేకాదు, ఇందులో అడ్వాన్స్‌డ్‌ అల్ట్రాసౌండ్ మోషన్ డిటెక్షన్ ఫీచర్ కూడా ఉంది. దీని ద్వారా గదిలోకి ఎవరైనా రాగానే లైట్లు వెలగడం వంటి పనులను ఆటోమేటిక్‌గా చేయవచ్చు.

కమ్యూనికేషన్ ఫీచర్లు

దీనితో ఇతర అలెక్సా ఎనేబుల్డ్ డివైజ్‌లకు ఆడియో కాల్స్ చేసుకోవచ్చు, ఇంటిలోని వారందరికీ అనౌన్స్‌మెంట్స్ చేయవచ్చు. అంతేకాదు, "డ్రాప్ ఇన్" అనే ఫీచర్ ద్వారా వెంటనే ఇతరులతో మాట్లాడవచ్చు.

ప్రైవసీ

ప్రైవసీకి కూడా అమెజాన్ తగిన ప్రాధాన్యత ఇచ్చింది. ఎకో స్పాట్‌లో మైక్రోఫోన్ ఆన్/ఆఫ్ బటన్ ఉంది. మీ వాయిస్ రికార్డింగ్‌లను డిలీట్ చేసే ఆప్షన్ కూడా అందుబాటులో ఉంది. కాబట్టి మీ వ్యక్తిగత సమాచారం భద్రంగా ఉంటుందనడంలో సందేహం లేదు.

ధర, లభ్యత

ఎకో స్పాట్ బ్లాక్, బ్లూ రంగుల్లో లభిస్తుంది. దీని అసలు ధర రూ. 8,999 అయినా, లిమిటెడ్ టైమ్ ఆఫర్‌లో భాగంగా ఇప్పుడు కేవలం రూ.6,449కే సొంతం చేసుకోవచ్చు. దీన్ని అమెజాన్.ఇన్, బ్లింకిట్, క్రోమా (ఆన్‌లైన్, ఆఫ్‌లైన్)లలో కొనుగోలు చేయవచ్చు.