ఇండియాలో మరో నాలుగు కొత్త Apple స్టోర్లు! Tim Cook అధికారికంగా ప్రకటించారు. ఏయే సిటీలలో అంటే ...?

భారతదేశంలో ఆపిల్ మరో నాలుగు కొత్త రిటైల్ స్టోర్లను ప్రారంభించనున్నట్లు ఆపిల్ సంస్థ CEO టిమ్ కుక్ అధికారికంగా ప్రకటించారు. ఇది కొత్త వార్త కానప్పటికీ ఇంతకు ముందు అనధికారిక లీక్ లు మరియు అంచనాలు మాత్రమే వచ్చాయి. అయితే, ఇప్పుడు సంస్థ CEO టిమ్ కుక్ అధికారికంగా ప్రకటించడం ప్రత్యేకతను సంతరించుకుంది.

ఏది ఏమైనప్పటికీ, సెప్టెంబర్ 2024 త్రైమాసికంలో భారతదేశంలో రికార్డు స్థాయి ఆదాయాలను చూసిన తర్వాత టిమ్ కుక్ నుండి ఈ ప్రకటన మొదటిసారి అధికారికంగా వచ్చాయి. ఐఫోన్‌ల అమ్మకాల పెరుగుదల కారణంగా, ఆపిల్ తన ఆదాయాలు ప్రతి ప్రాంతంలో 6% పెరుగుతుందని టిమ్ కుక్ ధృవీకరించారు.

శుక్రవారం కంపెనీ ఆదాయాల సమావేశంలో, టిమ్ కుక్ మాట్లాడుతూ, "ఐఫోన్ ప్రతి భౌగోళిక విభాగంలో వృద్ధి చెందింది, ఈ వర్గానికి కొత్త సెప్టెంబర్ త్రైమాసిక ఆదాయ రికార్డును సూచిస్తుంది...మరియు మేము భారతదేశంలో మరింత ఉత్సాహంతో ఉన్నాము. ఆల్ టైమ్ రెవెన్యూ రికార్డ్ సాధించాము."

దేశంలో మరో నాలుగు స్టోర్లను యాపిల్ ప్రారంభిస్తున్నట్లు కూడా తెలిపారు. ప్రస్తుతం, దేశంలో ఉన్న రెండు స్టోర్లు 2023 ప్రారంభంలో ఢిల్లీ మరియు ముంబైలో లాంచ్ చేయబడ్డాయి. గతంలో, యాపిల్ రిటైల్ సీనియర్ వైస్ ప్రెసిడెంట్ డైడ్రే ఓ'బ్రియన్ కంపెనీ భారతదేశంలో నాలుగు కొత్త స్టోర్‌లతో ముందుకు వస్తుందని ధృవీకరించారు.

ఈ కొత్తగా రాబోయే నాలుగు స్టోర్లు ఢిల్లీ, ముంబైలకు మరో రెండు కొత్త స్టోర్లు, మరో రెండు స్టోర్లు బెంగళూరు, పూణే నగరాలలో లాంచ్ కానున్నాయి.

ప్రపంచవ్యాప్తంగా ఐప్యాడ్‌ల అమ్మకాల్లో కూడా ఆపిల్ సంస్థ వృద్ధిని సాధించింది. యాపిల్ చీఫ్ ఫైనాన్షియల్ ఆఫీసర్ లూకా మాస్త్రి మాట్లాడుతూ, "అభివృద్ధి చెందిన మార్కెట్లలో వృద్ధితో పాటు, మెక్సికో, బ్రెజిల్, మధ్యప్రాచ్యం, భారతదేశం మరియు దక్షిణాసియాలో రెండంకెల వృద్ధితో అనేక అభివృద్ధి చెందుతున్న మార్కెట్లలో కూడా మేము బలమైన పనితీరును కనబరిచాము. ఐప్యాడ్ ఇన్‌స్టాల్ చేయబడిన బేస్ ఆల్-టైమ్ హైకి చేరుకుంది మరియు ఈ త్రైమాసికంలో ఐప్యాడ్‌లను కొనుగోలు చేసిన వినియోగదారులలో సగానికి పైగా కొత్త వినియోగదారులు ఉన్నారని చెప్పారు."

కౌంటర్‌పాయింట్ నివేదిక ప్రకారం, సెప్టెంబర్ 2024 త్రైమాసికంలో యాపిల్ విలువ పరంగా 22% వద్ద భారతదేశంలో రెండవ అత్యధిక మార్కెట్ వాటాను కలిగి ఉంది. దేశంలో ఎక్కువ మంది వ్యక్తులు ప్రీమియం ఫోన్‌లకు అప్‌గ్రేడ్ అవుతున్నందున, Apple మరియు Samsung నుండి వచ్చిన పరికరాలు వారి బ్రాండ్ విలువ కారణంగా మొదటి ఎంపికలుగా ఉన్నాయి.

సంస్థ ఇటీవల, ఆపిల్ ఇంటెలిజెన్స్‌ (Apple intelligence) ని అందుబాటులోకి తెచ్చిన విషయం తెలిసిందే. iOS 18.1 మరియు iPadOS 18.1, macOS Sequoia 15.1 సాఫ్ట్‌వేర్‌ అప్‌డేట్‌ ద్వారా ఈ ఫీచర్‌లు యూజర్‌లకు అందుబాటులోకి వచ్చాయి. ఫలితంగా ఐఫోన్‌, ఐప్యాడ్‌, మ్యాక్‌ సహా మరిన్ని డివైస్‌ల పనితీరు మరింత మెరుగుపడుతుందని, వినియోగదారులకు మరిన్ని ఫీచర్‌లు అందుబాటులోకి వస్తాయని ఆపిల్ చెబుతోంది.

ఆపిల్‌ ఇంటెలిజెన్స్‌ను ఐఫోన్‌ 15 ప్రో, ఐఫోన్‌ 15 ప్రో మ్యాక్స్, ఐఫోన్‌ 16, ఐఫోన్‌ 16 ప్లస్‌, ఐఫోన్‌ 16 ప్రో, ఐఫోన్‌ 16 ప్రో మ్యాక్స్ సహా ఐమ్యాక్‌ M1 సహా తర్వాత వెర్షన్‌లు సపోర్టు చేస్తాయి. వీటితోపాటు మ్యాక్ మిని M1 సహా తర్వాత వెర్షన్‌లు, మ్యాక్‌బుక్‌ ఎయిర్‌ M1 సహా తర్వాత మోడళ్లు, మ్యాక్‌ స్టూడియో M1 మ్యాక్స్‌ సహా తర్వాత విడుదలైన మోడళ్లు ఆపిల్‌ ఇంటెలిజెన్స్‌ను సపోర్టు చేస్తాయి.