భారత్‌లో ఆపిల్ జోరు.. కొత్త స్టోర్లు కన్ఫర్మ్ చేసిన టిమ్ కుక్.. ఫ్యాన్స్‌కు గుడ్ న్యూస్..

Apple Stores India 2025 : ఆపిల్ ఫ్యాన్స్‌కు శుభవార్త. టెక్ దిగ్గజం ఆపిల్, భారత్‌లో తన రిటైల్ స్టోర్ల సంఖ్యను పెంచడానికి సిద్ధమైంది. ఈ విషయాన్ని స్వయంగా ఆపిల్ సీఈఓ టిమ్ కుక్ వెల్లడించారు. కంపెనీ రెండో త్రైమాసిక ఆర్థిక ఫలితాల సందర్భంగా మాట్లాడుతూ, ఈ ఏడాదిలోనే భారత్‌లో కొత్త ఆపిల్ స్టోర్లు ప్రారంభించనున్నట్లు ఆయన ధృవీకరించారు. ఈ నిర్ణయం, భారత్‌ను ఆపిల్ ఎంత ప్రాధాన్యంగా చూస్తోందో తెలియజేస్తుంది.

* భారత్‌లో కొత్త ఆపిల్ స్టోర్లు ఎక్కడెక్కడ..

పెరుగుతున్న మార్కెట్‌గానే కాకుండా, కీలకమైన తయారీ కేంద్రంగా కూడా భారత్ ఆపిల్‌కు ముఖ్యంగా మారుతోంది. ప్రస్తుతం మన దేశంలో రెండు అధికారిక ఆపిల్ రిటైల్ స్టోర్లు ఉన్నాయి. ఒకటి ముంబైలోని ఆపిల్ బీకేసీ కాగా, రెండోది ఢిల్లీలోని ఆపిల్ సాకేత్. ఈ రెండింటినీ ఏప్రిల్ 2023లో ప్రారంభించారు.

ఇవే భారత్‌లో ఆపిల్ తెరిచిన తొలి భౌతిక రిటైల్ స్టోర్లు. ఇప్పుడు, మరో నాలుగు కొత్త స్టోర్లను ప్రారంభించేందుకు ఆపిల్ ప్రణాళికలు రచిస్తున్నట్లు తెలుస్తోంది. నివేదికల ప్రకారం, పుణె, నోయిడా, ముంబై (మరోటి), బెంగళూరు నగరాల్లో ఈ స్టోర్లను ఏర్పాటు చేయనున్నారు. పుణెలోని కోపా మాల్‌లో, నోయిడాలోని మాల్ ఆఫ్ ఇండియాలోనూ స్టోర్లు రానున్నాయని సమాచారం.

అయితే, టిమ్ కుక్ కచ్చితమైన ప్రదేశాలు లేదా స్టోర్ల సంఖ్యను ప్రస్తావించలేదు. ఏదేమైనా, ఈ కొత్త స్టోర్ల ద్వారా మరింత మంది భారతీయ వినియోగదారులు ఆపిల్ ఉత్పత్తులను, సేవలను నేరుగా అనుభవించే అవకాశం లభిస్తుంది. భారతదేశంపై ఆపిల్ పెట్టుబడులు ఎంత బలంగా ఉన్నాయో ఈ విస్తరణ ప్రణాళికలు తెలియజేస్తున్నాయి.

* వినియోగదారులకు మరింత చేరువగా..

కేవలం స్టోర్ల సంఖ్య పెంచడమే కాదు, వేగంగా అభివృద్ధి చెందుతున్న భారత మార్కెట్లో వినియోగదారులతో సంబంధాలను బలోపేతం చేసుకోవడం కూడా ఆపిల్ లక్ష్యం. ఆపిల్ స్టోర్లలో లభించే అనుభవం చాలా ప్రత్యేకంగా ఉంటుంది. అక్కడ వినియోగదారులు ఉత్పత్తులను కొనుగోలు చేసే ముందు వాటిని స్వయంగా వాడి చూసే (Hands-on) అవకాశం కల్పిస్తారు.

* ఐఫోన్ తయారీలో భారత్ పాత్ర పెరుగుదల

ఇప్పటికే ఉన్న ముంబై, ఢిల్లీ స్టోర్లకు అద్భుతమైన స్పందన రావడంతో, ఆపిల్ తన విస్తరణ ప్రణాళికలను వేగవంతం చేసిందని అర్థమవుతోంది. రిటైల్ రంగంలోనే కాకుండా, తయారీ రంగంలో కూడా భారత్‌లో ఆపిల్ తన కార్యకలాపాలను విస్తరిస్తోంది. జూన్ త్రైమాసికంలో అమెరికాలో విక్రయించే అత్యధిక ఐఫోన్‌లు 'మేడ్ ఇన్ ఇండియా'వే ఉంటాయని టిమ్ కుక్ వెల్లడించడం విశేషం.

అధిక సుంకాలు, వాణిజ్యపరమైన ఇబ్బందుల కారణంగా చైనాపై ఆధారపడటాన్ని తగ్గించుకునే వ్యూహంలో భాగంగా ఆపిల్ ఈ మార్పులు చేస్తోంది. కేవలం ఐఫోన్లే కాదు, అమెరికా మార్కెట్ కోసం ఐప్యాడ్‌లు, మ్యాక్‌లు, ఆపిల్ వాచ్‌లు, ఎయిర్‌పాడ్స్ వంటి ఉత్పత్తుల తయారీకి వియత్నాం కూడా కీలక కేంద్రంగా మారుతోంది.

* ఆపిల్ వ్యూహంలో భారత్‌కు పెద్దపీట

భారత్‌పై ఆపిల్ దృష్టి కేవలం భవిష్యత్ అవకాశాలకే పరిమితం కాలేదు, ప్రస్తుత కార్యకలాపాల్లోనూ భారత్ ఇప్పుడు కీలక పాత్ర పోషిస్తోంది. మరిన్ని కొత్త స్టోర్ల ప్రారంభం, పెరుగుతున్న తయారీ సామర్థ్యంతో.. భారత్ ఆపిల్‌కు ఒక ముఖ్యమైన వినియోగ మార్కెట్‌గా, శక్తివంతమైన ఉత్పత్తి కేంద్రంగా రూపాంతరం చెందుతోంది. టిమ్ కుక్ ప్రకటనతో ఆపిల్, భారత్ భవిష్యత్తుపై భారీగా పెట్టుబడులు పెట్టడానికి సిద్ధంగా ఉందని స్పష్టమవుతోంది.