ఇకపై ఎన్ని సార్లు పడితే అన్ని సార్లు డబ్బులు విత్ డ్రా చేయలేరు

రాత్రి పగలు అనే తేడా లేకుండా కచ్చితమైన సమయం

దీని ప్రకారం ఇకపై ప్రతి రెండు లావాదేవీలకు మధ్య కచ్చితమైన సమయం తప్పనిసరి కానుంది. కనీసం 6 గంటల నుంచి 12 గంటల మధ్య సమయం ఉండాలి. అప్పుడే ఏటీఎం నుంచి మనీ బదిలీ చేయడం కుదురుతుంది. ఇటీవల దేశవ్యాప్తంగా పలు ఏటీఎంల్లో మోసాలు ఎక్కువగా జరుగుతున్నాయి. ఎనీ టైమ్ మనీ అంటూ రాత్రి పగలు అనే తేడా లేకుండా మనీ విత్ డ్రా చేసుకునే అవకాశం ఉండటంతో ఇది మోసగాళ్లకు వరంగా మారిందని ఓరియంటల్ బ్యాంక్ ఆఫ్ కామర్స్ ఎండీ, సీఈవో ముకేశ్ కుమార్ తెలిపారు. ఏటీఎం మోసాల్లో మహారాష్ట్ర మొదటి స్థానంలో ఉంటే ఢిల్లీ రెండోస్థానంలో ఉంది.

క్లోనింగ్ మోసాలు

దీంతో పాటు ఏటీఎం సెంటర్లలో డబ్బులు విత్ డ్రా చేసే వ్యక్తులను మాటల్లో పెట్టి ఏటీఎం కార్డులను క్లోనింగ్ చేసి డబ్బులు కాజేస్తున్న ఘటనలు కూడా వెలుగులోకి వస్తున్నాయి.ఏటీఎం మోసాలకు పాల్పడే వారిలో విదేశీయులు ఎక్కువగా ఉన్నారు. బ్యాంకర్లు మోసాలు అడ్డుకునేందుకు పలు చర్యలు ప్రకటించారు. అందులో ఒకటి వన్ టైమ్ పాస్‌వర్డ్‌తో ఏటిఎం విత్ డ్రాయెల్ విధానం. ఇక్కడ ఏటీఎం నుంచి డబ్బు డ్రా చేయాలంటే ఓటీపీ అవసరం అవుతుంది.

వాయిస్ ఫీచర్

ఇది క్రెడిట్, డెబిట్ కార్డు ద్వారా నిర్వహించే ఆన్‌లైన్ లావాదేవీలను పోలి ఉంటుంది. అలాగే ఎవరైనా హెల్మెట్ పెట్టుకుని ఏటీఎం సెంటర్‌కి వెళ్తే.. హెల్మెట్ తీయండి అని వాయిస్ వినిపిస్తుంది. దాంతో అతడు కెమెరా కంటికి చిక్కుతాడు. ప్రస్తుతం ఓరియంటల్ బ్యాంక్ ఆఫ్ కామర్స్‌కు చెందిన 300 ఏటీఎం సెంటర్లలో ఈ వ్యవస్థను ఏర్పాటు చేశారు. త్వరలోనే బ్యాంకులన్నీ ఈ వ్యవస్థను ఏర్సాటు చేసే అవకాశం ఉంది.

మరో కీలక నిర్ణయం

ఇదిలా ఉంటే బ్యాంకర్ల సమావేశంలో ఎస్బీఐ, కెనరా బ్యాంక్‌లు మరో కీలక నిర్ణయం తీసుకున్నాయి. ఎస్బీఐ తన కస్టమర్లకు విత్‌డ్రా లిమిట్ 20వేలకు తగ్గించగా.. 10వేలకు మించి విత్‌డ్రా చేసే వారికి ఓటీపీ కచ్చితం చేసేలా కెనరా బ్యాంకు భావించింది.