10 నిమిషాల్లో శామ్‌సంగ్ గెలాక్సీ S25 స్మార్ట్‌ఫోన్ మీ ఇంటికి డెలివరీ.. టాటా సంస్థ సంచలనం..

BigBasket Samsung Galaxy S25: స్మార్ట్‌ఫోన్ ప్రియులకు బిగ్‌బాస్కెట్ గుడ్ న్యూస్ చెప్పింది. శామ్‌సంగ్ కంపెనీ గత నెలలో విడుదల చేసిన సరికొత్త గెలాక్సీ S25 సిరీస్ మొబైల్స్ ఫిబ్రవరి 7 నుంచి ఇండియాలో అమ్మకాలు మొదలు పెట్టనుంది. అయితే, టాటా వారి సొంత సంస్థ అయిన బిగ్‌బాస్కెట్ మాత్రం ఒక సంచలన ప్రకటన చేసింది. అదేంటంటే, ఈ లేటెస్ట్ శామ్‌సంగ్ గెలాక్సీ S25 సిరీస్‌ను కేవలం 10 నిమిషాల్లోనే కస్టమర్లకు డెలివరీ చేస్తామని వెల్లడించింది.

* ఎక్కడ అందుబాటులో ఉంటాయంటే

అయితే, ఈ 10 నిమిషాల డెలివరీ సేవ ఏయే నగరాల్లో లేదా ఏ ఏరియాల్లో అందుబాటులో ఉంటుందో బిగ్‌బాస్కెట్ ఇంకా చెప్పలేదు. కానీ, ఇలా స్మార్ట్‌ఫోన్లను క్షణాల్లో డెలివరీ చేయడం ఇదే మొదటిసారి కాదు. గతంలో యాపిల్ కంపెనీ ఐఫోన్ 16 విడుదల చేసినప్పుడు కూడా బిగ్‌బాస్కెట్ ఇలాగే 10 నిమిషాల్లో డెలివరీ చేసింది.

అంతేకాదు, బ్లింకిట్, జెప్టో వంటి ఇతర క్విక్-కామర్స్ సంస్థలు కూడా ఐఫోన్ 16, శామ్‌సంగ్ గెలాక్సీ S24 సిరీస్‌లను కొన్ని ప్రత్యేక ప్రాంతాల్లో ఇలాగే డెలివరీ చేశాయి. శామ్‌సంగ్ గెలాక్సీ S25 సిరీస్‌లో గెలాక్సీ S25, గెలాక్సీ S25 ప్లస్, గెలాక్సీ S25 అల్ట్రా వంటి మూడు మోడల్స్ ఉన్నాయి.

* ధరలు, EMI ఆప్షన్స్

వీటి ధరలు రూ.80,999 నుంచి మొదలవుతాయి. కానీ, బిగ్‌బాస్కెట్ మాత్రం ప్రారంభ ధరను రూ.70,999గా లిస్ట్ చేసింది. అంటే, కొన్ని డిస్కౌంట్లు కూడా ఇవ్వనున్నారు. శామ్‌సంగ్ గెలాక్సీ S25 12GB + 256GB బేస్ వేరియంట్ ధర రూ.80,999, 12GB + 512GB వేరియంట్ ధర రూ.92,999గా ఉన్నాయి.

శామ్‌సంగ్ గెలాక్సీ S25 ప్లస్ 12GB + 256GB వేరియంట్ ధర రూ.99,999, 12GB + 512GB వేరియంట్ ధర రూ.1,11,999. శామ్‌సంగ్ గెలాక్సీ S25 అల్ట్రా 12GB + 256GB వేరియంట్ ధర రూ.1,29,999, 12GB + 512GB వేరియంట్ ధర రూ.1,41,999. టాప్ 12GB + 1TB వేరియంట్ ధర రూ.1,65,999.

HDFC బ్యాంక్ క్రెడిట్ కార్డుదారులకు 9 నెలల వరకు నో-కాస్ట్ EMI ఆప్షన్ కూడా ఉంది. గెలాక్సీ S25 అల్ట్రా మోడల్ టైటానియం ఫ్రేమ్‌తో వస్తోంది. గొరిల్లా గ్లాస్ ఆర్మోర్ 2 ప్రొటెక్షన్ కూడా ఉంది. 6.9-ఇంచ్ QHD+ డైనమిక్ AMOLED 2X డిస్‌ప్లే, 120Hz రిఫ్రెష్ రేట్‌తో స్క్రీన్ చాలా స్మూత్‌గా ఉంటుంది.

* ఫీచర్లు

ఇవి స్నాప్‌డ్రాగన్‌ 8 జెన్ 3 ఫర్ గెలాక్సీ ప్రాసెసర్‌తో వస్తున్నాయి. కెమెరా కూడా అదిరిపోతుంది. 200MP మెయిన్ కెమెరా, 50MP అల్ట్రా-వైడ్ లెన్స్ ఉన్నాయి. 5000mAh బ్యాటరీతో 45W ఫాస్ట్ ఛార్జింగ్ సపోర్ట్ చేస్తుంది. కేవలం 30 నిమిషాల్లో 65% ఛార్జింగ్ అవుతుందట. ఛార్జర్ మాత్రం విడిగా కొనాలి.

AI ఫీచర్స్ కూడా చాలా ఉన్నాయి. కాల్ ట్రాన్స్‌క్రిప్షన్, ఫోటో అసిస్ట్ టూల్స్ వంటివి కూడా ఉన్నాయి. భద్రత కోసం నాక్స్ వాల్ట్ ప్రొటెక్షన్ కూడా ఇచ్చారు. గెలాక్సీ S25 ప్లస్ మోడల్‌లో 6.7-అంగుళాల QHD+ అమోలెడ్ డిస్‌ప్లే, 4900mAh బ్యాటరీ ఉంది.

స్టాండర్డ్ గెలాక్సీ S25 మోడల్‌లో 6.2-అంగుళాల FHD+ AMOLED స్క్రీన్, 4000mAh బ్యాటరీ ఉంటుంది. ఈ రెండు మోడల్స్‌లోనూ ట్రిపుల్ కెమెరా సెటప్ ఉంటుంది. 50MP మెయిన్ సెన్సార్, 12MP అల్ట్రా-వైడ్ లెన్స్, 10MP టెలిఫోటో కెమెరా (3x ఆప్టికల్ జూమ్‌) ఉన్నాయి.

* ఎలక్ట్రానిక్స్ కూడా బిగ్‌బాస్కెట్‌లో

బిగ్‌బాస్కెట్ ఇప్పుడు కేవలం కిరాణా సరుకులే కాదు, టెక్నాలజీ ప్రొడక్ట్స్ కూడా డెలివరీ చేస్తోంది. శామ్‌సంగ్ లేటెస్ట్ ఫోన్ సిరీస్‌తో పాటు, ఐఫోన్ 16, వన్‌ప్లస్ 13R, రెడ్‌మి నోట్ 14, ఇంకా చాలా రకాల డివైజ్‌లను కూడా డెలివరీ చేస్తున్నారు. టాబ్లెట్స్, ల్యాప్‌టాప్స్ కూడా అమ్మడం మొదలుపెట్టారు.

బిగ్‌బాస్కెట్ చీఫ్ బయింగ్ అండ్ మెర్చండైజింగ్ ఆఫీసర్ శేషు కుమార్ తిరుమల మాట్లాడుతూ, "శామ్‌సంగ్ S25 సిరీస్‌ను 10 నిమిషాల్లో డెలివరీ చేయడం ద్వారా, ప్రీమియం టెక్నాలజీని మా యూజర్లకు చాలా త్వరగా చేర్చే ప్రయత్నం చేస్తున్నాం" అని అన్నారు.