ఫేస్‌బుక్ - వాట్స్‌యాప్ డీల్ : ఆసక్తికర అంశాలు

వాట్స్‌యాప్ కొనుగోలు ఫేస్‌బుక్ ప్రస్థానంలోనే పెద్దది. ఈ ఒప్పందంలో భాగంగా 4 బిలియన్ డాలర్లను క్యాష్ రూపంలో, 12 బిలియన్ డాలర్లను షేర్ల రూపంలో చెల్లిస్తున్నట్లు ఫేస్‌బుక్ యాజమాన్యం ప్రకటించింది. మిగిలిన 3 బిలియన్ డాలర్లను పరిమిత స్టాక్ యూనిట్ల రూపంలో నాలుగు సంవత్సరాల తరువాత క్యాష్ చేసుకునే విధంగా వాట్స్‌యాప్ సంస్థతో ఫేస్ బుక్ డీల్ కుదర్చుకుంది.

ఈ కొనుగోలును టెక్నాలజీ చరిత్రలోనే అతిపెద్ద కొనుగోలుగా విశ్లేషకులు అభివర్ణిస్తున్నారు.

ఈ డీల్‌కు సంబంధించి ఫేస్‌బుక్.. వాట్స్‌యాప్ కంపెనీల మధ్య రెండు సంవత్సరాలుగా చర్చలు జరుగుతున్నాయి.

బ్లూమ్‌బర్గ్ డేటా ప్రకారం 2001 తరువాత అతిపెద్ద ఇంటర్నెట్ కొనుగోలుగా ఫేస్‌బుక్ - వాట్స్‌యాప్ డీల్ చరిత్రలో నిలిచింది.

వాట్స్‌యాప్ అప్లికేషన్‌ను కొనుగోలు చేసేందుకు గూగుల్ కూడా ప్రయత్నాలు చేసింది. అయితే ఆ చర్చలు సఫలీకృతం కాలేదు.

వాట్స్‌యాప్ కంపెనీ సహ వ్యవస్థాపకుల్లో ఒకరైన బ్రెయిన్ యాక్టన్ గతంలో ఫేస్‌బుక్‌లో ఉద్యోగానికి ప్రయత్నించి విఫలమయ్యారు.

వాట్స్‌యాప్ మొబైల్ మెసెంజర్ సర్వీసుకు ప్రపంచవ్యాప్తంగా 450 మిలియన్ల యూజర్లు ఉన్నారు. వారిలో 72 శాతం మంది వాట్స్‌యాప్ సర్వీసులను రోజు వినియోగించుకుంటున్న వారే.

ఫేస్‌బుక్ ఈ డీల్‌ను రద్దుచేసకున్నట్లయితే జరిమానా క్రింది 2 బిలియన్ డాలర్లను వాట్స్‌యాప్‌కు చెల్లించాల్సి ఉంటుంది.

వాట్స్ యాప్ సర్వీసులును కాలిఫోర్నియా ముఖ్య కేంద్రంగా 2009లో ప్రారంభించారు. వేగవంతంగా విస్తరిస్తున్న ఈ మొబైల్ మెసెంజర్ సర్వీసుకు ప్రపంచవ్యాప్తంగా 450మిలియన్ల యూజర్లు ఉన్నారు. ఇండియాలో వాట్స్‌యాప్‌ను వినియోగించుకునే వారి సంఖ్య 35 మిలియన్లు.

వాట్స్‌యాప్ మొబైల్ మెసేజింగ్ సర్వీసులకు యూరోప్, లాటిన్ అమెరికా ఇంకా ఇండియాలో మంచి ఆదరణ లభిస్తోంది. ఈ యాప్‌ను ఉపయోగించటం ద్వారా స్మార్ట్‌ఫోన్ యూజర్లు చాలా సులువుగా టెక్స్ట్, వాయిస్ సందేశాలతో పాటు వీడియోలు, ఫోటోలను షేర్ చేసుకోవచ్చు. కేవలం ఇంటర్నెట్ సదుపాయం పై ఈ సర్వీసు స్పందిస్తుంది. మొబైల్ నంబర్ల ఆధారంగా ఈ సర్వీసు పనిచేస్తుంది. యాప్‌ను డౌన్‌లోడ్ చేసుకున్న తొలి ఏడాది పాటు ఉచితంగా వాడుకోవచ్చు. ఆ తరువాత ఏడాదికి ఒక డాలరు (రూ.60 చొప్పున) ఫీజు చెల్లించాల్సి ఉంటుంది.