ఆండ్రాయిడ్ కనుమరుగు కాబోతోందా..?

స్మార్ట్‌ఫోన్ ప్రపంచాన్ని శాసిస్తోంది...

మొబైల్ ఫోన్ అనుభవాలను రోజురోజుకు మార్చేస్తున్న గూగుల్ ఆండ్రాయిడ్ రకరకాల ఆపరేటింగ్ సిస్టంలతో స్మార్ట్‌ఫోన్ ప్రపంచాన్ని శాసిస్తోంది. కప్ కేక్‌తో మొదలైన ఆండ్రాయిడ్ వోఎస్‌ల ప్రస్థానం అంచెలంచెలుగా ఎగబాకుతూ డోనట్, ఇక్లెయర్, ఫ్రోయో, జింజర్‌బ్రెడ్, హనీకూంబ్, ఇస్‌క్రీమ్ శాండ్విచ్, జెల్లీబీన్, కిట్ క్యాట్, లాలీపాప్, మార్ష్‌మల్లో, నౌగట్, ఓరియో ఇంకా ఆండ్రాయిడ్ పీ పేర్లతో విస్తరించింది.

ఆండ్రాయిడ్‌ను గూగుల్ స్థాపించలేదు..

వాస్తవానికి ఆండ్రాయిడ్‍‌ను గూగుల్ స్థాపించలేదు. ఆండీ రూబిన్, క్రిస్ వైట్, నిక్ సియర్స్, రిచ్ మైనర్ అనే డెవలపర్లు ఆండ్రాయిడ్ ఆపరేటింగ్ సిస్టంను ఆక్టోబర్ 2003లో అందుబాటులోకి తీసుకువచ్చారు. ఆ తరువాత ఆండ్రాయిడ్ మొత్తాన్ని గూగుల్ $50 మిలియన్లకు కొనుగోలు చేసింది.

మొబైల్ ఆపరేటింగ్ సిస్టం కాదు..

గూగుల్ తన మొదటి ఆపరేటింగ్ సిస్టంను 2007లో ఆవిష్కరించింది. అయితే ఈ ఆపరేటింగ్ సిస్టంను కెమెరాల కోసం డెవలప్ చేసారు. ఆ తరువాత స్మార్ట్‌ఫోన్‌లకు ఓఎస్ కీలకమని గుర్తించిన గూగుల్ మరిన్ని ఫీచర్ల పై పరిశోధనలు చేపట్టింది. ఆండ్రాయిడ్ ఆపరేటింగ్ సిస్టంను ఆరంభంలో కేవలం డిజిటల్ కెమెరాల కోసమే అభివృద్థి చేయటం జరిగింది. ఆ తరువాత ఈ ఓఎస్‌ను స్మార్ట్‌ఫోన్‌ల కోసం గూగుల్ ఉపయోగించింది.

మొదటి ఫోన్ 2008లో...

ఆండ్రాయిడ్ ఆపరేటింగ్ సిస్టంతో విడుదలైన మొట్టమొదటి స్మార్ట్‌ఫోన్ హెచ్‌టీసీ డ్రీమ్. ఈ స్మార్ట్‌ఫోన్ 2008 అక్టోబర్‌లో విడుదలైంది. డివైస్‌లో లైనెక్స్ ఆధారిత ఆండ్రాయిడ్ ఆపరేటింగ్ సిస్టంను గూగుల్ ఉపయోగించింది. ఆండ్రాయిడ్ వర్షన్ 1.0 నుంచి 1.6 వరకు అప్‌గ్రేడ్ చేసుకోవచ్చు.

లైసెన్స్‌ను ఉచితంగా పొందవచ్చు..

స్మార్ట్‌ఫోన్ తయారీ కంపెనీలకు గూగుల్ తన ఆండ్రాయిడ్ ఆపరేటింగ్ సిస్టం లైసెన్స్‌ను ఏ విధమైన చెల్లింపులు లేకుండా ఆఫర్ చేస్తోంది. ఆండ్రాయిడ్ ఆపరేటింగ్ సిస్టంను విశ్వవ్యాప్తం చేయటంతో గూగుల్ మొబైల్ అడ్వరటైజింగ్ విభాగంలో సింహ భాగాన్ని దక్కించుకుంది.